ڈورس لیسنگ/رجانک: ڈاکٹر بیزن سبا
افریقہ ءِ میانجی ہند ءِ یک میتگے ءَ یک چکُے گوں وتی پت ءُ مات ءَ یک لوگے ءَ جاہمنند اَت۔ آئی ءِ عمر دوازدہ سال ات ، آوانی لوگ دمک ءِ گڈی ایوکیں گِس ات کہ ایشی ءِ ریل گاڑی ءِ لین ات ءُ کشءَ درٛچکءُ باگ اِت انت۔ آئی ءِ روچ وتی گس ءِ کش ءُ گوٛر ءِ درٛچک ءُ باگانی میانجی ءَ لیب ءُ گْوٛازی ءَ گوٛست بلئے یک سالے ءَ پد اے درٛچک ءُ دار گُڈّگ بوت انت ءُ پد ءَ نوکیں لوگءُ جاگہ بندگ بوت ءُ نوکیں مردم اتک ءُ آباد بوت اَنت۔ میتگ پرٛاہ ءُ مزن تِر بوت۔آئی ءِ دلءَ اے درٛچکانی گُڈّگ ءُ نوکیں لوگانی بندگ چو تیرے ءَ سُمبگ ءَ ات۔ہما درٛچک ءُ کور کہ یک وہدے پہ مڑاہ مِکّ ءُ تچان ات انت، ہماوانی جاگہءَ دیوال مِکّ ات انت ءُ دمک جوڑ بوتگ ات انت کہ ہمودءَ آئی ءِ دلءَروگ نہ لوٹ ات۔کسانیں ساہدار چِداں شت ءُ بیگواہ بوت انت۔ آئی ءِ گسءَ در نہ کپگءَ ہمیش گمان بوت کہ آ نابود ءُ بیواکیں
بچکے۔
آپہ گیمُرتگیں دلے میتگ ءِ بستگیں ماڑی ءُ لوگانی دیم ءَ اوشتات ءُ ادءِ گاریں درٛچک ءُ دارانی یات ءَ کپت، تچوکیں آپ ءُ چمّگ ئِےگیر آورت اَنت۔ مردم آئیءِ کِرّءُ گْور ءَ گوٛست انت گُڑا روکیں چماں گوں آئی ءِ نیمگ ءَ چاران بوت انت۔ وہدیکہ آوانی لوگ ءِ دیمی ماڑیءِچکاں آئی ءَ را پہ توازہ ءُ کلاگ زیرگ ءَ توار پِر جت۔ آوانی لوگءِدیمی ماڑیءَ اسپیت پوستیں، زاگُل چمیں زہگ ءُ مردم نندوک ات انت کہ یکے دومی ءَ آوانی پجارگ سک گرٛان ات،انچش کہ یک رنگ ءِ ساہدار یک بکسے ءِ تہ ءَ بند کنگ بوتگ انت۔ ایشانی جاکءُ کوکار ءَ آئی ءِ دلءَیک بیمّے ودی کتگ ات۔ آئی ءِ جند برز ءُ بارگ بندیں بچکے ات۔ آئی ءِ چم زنڈ ءُ رژنائیں چہرے دیگ ءَ ات انت۔
آئی ءِ ماتءَ ہر وہدءَ آئی ءَ را پہ زہرناکی گُر دات کہ پرچا وتی اُمر ءُ قدّ ءِ چکاں گوٛازیءَ نہ روئے دُرٛاہیں روچ لوگ ءَ کپتگ ءُ پانگ ئے۔
آ مات ءِ سک فرمانبردار ءُ مہروانے ات۔ پرے گپ ءِ بدلءَ ہچ ئِے نہ گوٛشت بلکیں پہ بے تواری آئی ءِ کش ءَ اتک ءُ نشت ءُ آئی ءَ را گُد ءِ دوچگ ءَ چاران ئِے کت۔مات ءِ نُرنڈگ ءِ بدل ءَ آئی ءَدائم وتی پادانی دیم ءِ سِنگ لگت جت ءُ گوٛشت:
’’من نہ زاناں‘‘۔ آئی ءَ وتی چم ہمے برز ءُ کوہیں ماڑیاں بے تواری سکّ دات انت۔ ہمے امیت ءَ کہ مات ہم آئی ءَرا چارگ ءَ انت۔ ہمے وڑ ءَ آ سدّک ات کہ مات دل ءَ ہرچی بہ گوٛشیت بلئے آئی ءِ ہستی پرآئی ءَ وشی اِنت۔ آئی ءِ پت ہم دلءَ وش نہ ات کہ بچ پرچا چوش اِنت۔
پمیشکہ یک روچے آئی ءِ مات لاچار بوت کہ آئیءِپیش دارگ ءِ ہاتر ءَ ڈاکٹرے لوٹائینت ئِے۔ ہما روچءَآئیءَڈاکٹر ءِ گپ دلءَداشت کہ ’’بچ مادر ء موجود شر شر نہ انت‘‘۔ آئی ءِ دل اے حبرءَہر وہدءَ سرءُ چیر ات کہ میتگ ءِ مردم آئی ءَ را مدام انچیں وڑے ءَ چار اَنت کہ گوٛشیگ ءَ آوانی تب ءُ میل ءَ جتائیں مردمے۔ بلئے پرے حبرءَ نا کہ آ دل تپرکہ بوت ءُ نیکہ میاریگ۔ البتہ ہمے بوت کہ آئی ءَ دیست کہ مات برے برے آئی ءِ جاورال ءِ سرءَ سکّ دل تپرکہ انت ءُ گرٛیت۔پمیشا آئی ءَ مار اِت کہ ماتءَ ابید آئیءِ زند نا سرجم اِنت۔
وہدے آئی ءِ پتءَ چہ دنیا ءَ سَفر کت گڑا ہر مردمءَ دیست کہ آ سکّ دلپدرد ءُ گمیگ ات ۔آئیءِ چمانی ارس نہ اوشتات انت ءُ آئیءَ گوں وتی دستاں چم تاں دیراں لتارت انت۔ پد ءَ ہرکسءَ دیست کہ آ ءُ آئیءِ جنوزامیں مات ءَ زند پہ ایوکی گوٛازینان کت ءُ کدی ہم شتگیں مرد گیر نیاورت کہ آئی ءَ گوں روگءِ پجیءَ ایوکءَمیتگ ءِ ہمے لوگ پُشت ءَاِشتگ ءُ شتگ ات ءُ دگہ ہچی۔
نوں آ ءُ مات ات انت کہ ہر وہدءَ پہ آئی ءِ اسکول ءَ واتر آہگ ءِ ودار ءَ ات۔یا کدی چہ دمک ءُ میتگ ءِ گوٛازی ءُ یلہ چری ءَ واتر بیت انت۔ مات ءَ کدی ہم اے حبر ءِ گلگ ءُ زاری نہ کت کہ آ وتی کلاس ءِ چُکاں پنچ سال مستر انت،موکل ءِ روچءَ ایوک انت ءُ گوں دگہ چکاں نئے کہ ترّیت ءُ نئے کہ گْوازی ءَ دل ئِے کشّیت۔ آ شریں بچّے ات۔ مات ءِ تابعدار ءُ فرماں بردار۔ وتی سہب ءِ چاہ ءُ ارزبندے ایکمی وارت۔ مات ئِے کدی ہم جنجال نہ کرت۔ دل ریشی ءُ جاک ئِے نہ کت۔
مات ہم مہروان ات ۔ ہر وہد ءَ وتی کاراں گوں دزگلائش ات۔ آئی ءِ چم ءِ چشمک ترٛپان ات انتءُ دیم ءِ بچکند تالان ات۔ آئی ءِ دلءَمات انگت ءَ ورنا انت۔ یکروچے آئی ءَ مات ءِ کوٹی ءَ چہ آئی ءِ پشک ءِ سربِر ءِ ’’ایپرن‘‘ گوٛر ءَ کت ءُ آدینک ءِ دیم ءَوت ءَ را چار اِت گڑا تاں دیرءَ کندان ءُ ٹہک دیان بوت۔
وہد گوٛزان ات ۔تاں آئی ءِ اُمر ہبدہ سال بوت۔ آئی ءِ چمانی تہ ءَ عجبیں رژنے ودی بوتگ ات۔ شام کنگ ءَ پد گوں مات ءَ نندءُ نیاد ءِ بدل ءَ آئی ءَ میتگ ءِ دمکانی تر ءُ گرد بندات کت ءُ ادءِ نوک بستگیں لوگ ءُ ماڑی چاران کت انت۔ ماہ ءِ روژنائی ایشانی سرءَ ترٛپان ات۔آئی ءِ لوگ ءِ ڈَکّ ءِ دپ ءَ درٛچک ءُ کاہانی یک پچیں ڈگارے انگت ہست ات۔ یک ٹُوہیں درٛچکے ات کہ آئی ءِ ندارگ ءُ ساہگ آئی ءَ را سک وش بوت۔ آ درٛچک ءِ بُنءَ اوشتات۔ گْوات ءِ شیکگ ءِ توار ءَ باہند کت وہدیکہ درٛچک ءِ تاکانی میانجی ءَ کشّان بوت ہما پیم ءَ کہ آ وتی لنککاں گوں سر ءِ مُوداں رندگ ءَ انت۔
آئی ءَ گوں درٛچک ءَ برے برے انچش ڈکّ وارت کہ درٛچک ءِ بُنڈ ئِے امبازاں زُرت ءُ تاں دیراں گوں وت ءَ چک ات ءُ سینگ ءَ را سکّ ئِے دات۔ انچش کہ اے درٛچک آئی ءِ دل ءُ جبین انتءُ آ ایشی ءِ بُن ءُ روتگاں روان انت ءُ ایشی ءِ جہل ءِ تچوکیں آپاں جان شودان انت۔
اے آئی ءِ عادت جوڑ بوت کہ روزردءِ وہداں آ ہمے درٛچک ءِ چیرءَ اتک ءُآئی ءِ بُنڈ ءَ را گوں مہروانی امبازاں زرت ئِے۔آئی ءَ دمکانی روگ بند کتگ ات ءُ بیگاہ ءِ ساہت گوں ہمے درٛچک ءَ گْوازینت ۔
یک روچے عجبیں جاورے بوت آئی ءَ مار اِت کہ درٛچک ءِ بُنڈءَ آئی ءَرا گوں ترٛندی ءَ وتی نیمگ ءَ کشّان کت، انچش کہ آئی ءِ بدن، دست ءُ پاد د ُراہ گوں درٛچک ءَلچ ات ءُ کبل بوت انت۔ آئی ءِ دپ ءَلبجگی لبز درکپان بوت انت پد ءَ آ وار وار ءَ یلہ بوت ءُ لوگ ءَ مات ءِ کرءَ شت، مات پہ ایمنی نشتگ ات ءُآئی ءِ دپ ءَ تْرکّگ نہ کت ءُ مہروانیں چماں گوں چاران بوت۔ کوٹی ءِ رژنائی مُدان ءَ تالان ات۔ اے آئی ءِ ہمک روچی عادت جوڑ بوت کہ آ درٛچک ءِ کرءَ شت،درٛچک ءِ بُنڈئِے امبازاں زرت۔ وتی دل ءِ گپ ئِے گوں درٛچک ءَجت انت ءُ پد ءَ واتر گس ءَ اتک گڑا مات گوں مہروانیں بچکندءَ وداریگ ات۔
دومی نیمگ ءَ آہانی ہمساہگ ءِ لوگ ءُ مردم ءُ آوانی زند اَت کہ تیزی دیم ءَ روان ات۔ آوانی چک مزن ءُ بودناک بوّان ات انت۔ لوگانی تہ ءَ مردمانی جاک ءُ کندگ ءِ توار ات انت۔ یک بیگاہے ءَ وہدے آئیءَ وتی درٛچک امبازاں زرتگ ات تاں یک مردمے ءِ توار ءَ آ جہہ سرّینت، آئیءَ چَکّ جت چار اِت تاں کہ یک جنکے ءِتوار انت ءُ آئی ءَ را گشگ ءَ انت ’’او۔ شپ کورگ چے کنگ ءَ ئے ؟‘‘
آئی ءَپسہ نہ دات گڑا جنک آئی ءِنزیک ءَ چاران بوت کوپگءَ دست ئِے ایر کت ، آ پورا پچ لرز اِت تاں جنک ءَ پسہ دات ’’ترا چے بوت، پورا من ترا گٹّے پاتکگ‘‘۔
پد ءَ جنک ءَ آ دست ءَ گپت ءُ کشّان کت ءُ وتی لوگ ءَ برت۔ آئی ءَ کدی ہم زندءَ چشیں لوگ نہ دیستگ انچش کہ آ دگہ دنیایے ءَ سر بوتگ۔ ٹُوہیں کوٹی ،نندگ جاہ،مردمانی جاک ءُ کوکار ءُ سازءُ زیمل ءِ وشیں توار تالان ات انت۔ آئیءَ زوت چہ گسءَ دراہگ لوٹ ات ءُ پہ بچکندے گشت ئِے ’’من رواں کہ مات ودارءَ انت‘‘۔
جنک ءَ گِرّ بست کہ مہ رو۔بلئے آ دارگ ءِ پیمءَ نہ ات گڑا پد ءَ جنک آئی ءَ چہ وعدہ گپت کہ باندا من ءَ فلم ءِ چارگ ءَ بہ بر۔ آ زندگی ءَ درامدے ءَ ،جنکے ءَ گوں در ءَ نہ شتگ ات۔
دومی روچءَ آ گوں جنک ءَ قول ءِ پدءَ ڈن ءَ در کپت۔ آوتی کسانی ءِ زمانگ ءَ ابید کدی ہم فلم چارگءَ نہ شتگ۔ جنکءِ دلءَ پرآئی ءَ مہرے جہہ جنان ات گڑا آئی ءَ را گوٛشگ بوت کہ ’’تو پرچا وتءَ را اے پیم کتگ؟ تو نوں شیر مچیں زہگے نہ ئے کہ دُرٛاہیں روچ گوں مات ءَ نندئے ۔ڈن ءَ درکپ ،سنگت بدار وشی بکن‘‘۔
جنک ءِ گپاں آ کِمارنہ کت ۔ نا کہ آ دلرنج۔۔ پرچا کہ آئی ءِ بدل کنگ ارزان نہ ات۔ آئی ءِ دلءَ اے سینما،جنک،بازار ءُ ماڑی، آ درٛچک ءِ ساہگ ،مرگانی توار،ڈگار ءِ سبزی ءُ ساہدارانی سِٹ ءُ کپ ءِ دیمءَ ہچ نہ ات انت۔
آ وہدے لوگ ءَ واتر بوت گڑا لوگ ءِ پترگ ءَ پیسر کترہے درٛچک ءِ چیرءَ اوشتات۔ماہ ءِ رژنائی درٛچک ءِ تاکانی سرءَ تالان ات۔ دو گام ءَ پد آئیءَ دیم ترینت ءُ مات ءِ کوٹی ءَ پترت۔ پترگ ءِ شرطءَ آئی وہدے چم مات ءِ نیمگ ءَشانک دات انت گڑا آئی ءِ دیم رنج ءُ ملور انت گڑا ہما دمانءَ آ گشادءَ وتی کوٹی ءَ شتءُ تحت ءِ سرءَ تچک بوت۔ آئی ءَ ماتءِ بے تواریں دلرنجی دمانءَ ماریتگ ات۔ آ درٛچک ءِ حیالان بوت ءُ دومی بیگاہءَ درٛچک ءِ چیرءَ ساڑی بوت ءُ آئی ءِ بُنڈئِے امبازاں زرت۔
ہمساہگ ءِ لوگ ءِ جنک یکوئی آئی ءِ چاریگ ات بلئے آئی ءِ دل ءِ ترسے ات کہ مات ہجبر نہ منّیت کہ آ گوں جنکے ءَ ہو٘رءُ تو٘ر بہ بیت۔ پد ءَ فریڈرک ءِ دل آئی ءِ واہگدار نہ ات۔ بلئے جنک ءِ دائمی اے جست کہ تو پرچا گوں من د ُورئے،گوں من مہر نہ کن ئے۔آروس ءِ واہگدار نہ ئے۔ اے زاناں آئی ءِ تپلی حیال ءُ لیکہ ات انت کہ لاچار ات۔سور ءُ سانگءِ حبر آئی ءِ واستہ اجکہی حبر ات انت بلئے جنک ءِ واستا انچائیں گپ ات انت۔
نوں ایش بوت کہ آ جنک ءَ گوں نزیک بوتگ ات۔ آئی ءِ ہمراہ بوت ءُ امبازان ئِے زرت ئِے ءُ زورءَ پرٛنچ ات ئِے۔ انچش کہ آئیءَ درچک ءِ بُنڈ بگلاں زرتگ ات ۔پرایشی جنک وش ءُ نہ وش ات۔ آئی پہ گوگائی دپءَ وڑ وڑیں گپ ءُ نرنڈگ کش ات بلئے سور ءِ زبان دیگ ءَ بے وار ات۔درٛچک ءِ چیرءَ آ گوں جنک ءَ ہوار ات۔ بلئے وہدے لوگ ءَ واتر شت گڑا مات ءِ دیم ءَ پشل ات۔
یک روچے آئی ءِ مات نادُراہ بوت گڑا آئیءَ جنکءِ نیاد یل کت انت ءُ ماتءِ چارگءُ سہڑینگءَ دلگوش بوت۔جنک ءَ آئی ءَ را توار پِر جت بلئے پسوءَ آئیءَ گوٛشت کہ منی مات نادُراہ انت،پمن آہگ گرٛان انت۔
جنک ءِ دل پُرٛشت ءُ آئِے یلہ دات۔یکرندے پد ءَ آئی ءِ دست ءِ ریدگیں ساد سست۔ جنکءَ پد ءَ واتر نہ کت۔ آ وتی مات ءِ شپ ءُ روچ حزمت ءُ دلگوشداریءَ دزگٹ بوت۔ مات پیر بوتگ ات بلئے آ دلجم ات کہ آئی ءِ نادُراہی مرگ ءِنادُراہی نہ انت۔نوں آ ریل گاڑیانی سامانانی چست ءُ ایر ءِ کارءَ روزانداری کنگءَ ات بلئے کارءِ روگءَ ساری مات ءِ دُراہیں کار چستءُ ایر،ورگ ءُ وردن ءِ کارے کت ءُ شت ءُ واترآہگ ءَ پد آئی ءِ چارءُ دلگوش ءَ دزگٹ بوت۔
برے برے بیگاہاں آ ہمے درٛچک ءِ چیرءَ اوشتات ءُ حیالانی تہ ءَ گار بوت۔ گڑا درٛچک ءِ تاکے ءِ کپگءَ آجہہ سِرّینت ءُ اے گپ ءِ پگر سہرا کت کہ درٛچک نوں مَرگءِ کَنڈگ ءَ اِنت پرچاکہ اے پیر بوتگءُ گیشتر زندگ بوت نہ کنت۔
یک روچے آئی ءِ مات وپات بوت ۔ آئیءَ نزانت کہ مرگ چی یے !آ قبرستانءَ بے گویاکی اوشتوک ات۔ کبرانی ردءِ تہءَ بے توار ات۔آئی ءَ وتی چپ ءُ چاگردءَ چار اِت،جنک ءِ لوگءَ چم شانک دات انت بلئے کس آئی ءِ گمانی شریدار نیست ات۔
آ وہدے لوگءَ شت گڑا ماتءِ کوٹی ہما وڑات۔ آئی ءِ پچ سادءِ سرءَ درٛنجوک ات انت۔ کرسی ہورک ات،بالشت بو٘پ ءِ سرون ءَ ایر اَت۔ گس ویرندان ات،مات نہ ات۔آ تنیگتی چُکے ات۔
مات ءِ پت ءِ روگءَ پد آئی ءِ زرءُ مالی ماملہ یک مردمےءِ دست ءَ ات انت کہ بینکءَ لہتیں زَر پَشت کپتگ ات کہ آئی ءَ را پہ ہمک روچی حرچ ءُ درچءِ درگت ءَ کم کم ءَ دست ءَ دیگ بوت انت کہ پہ وڑءُ پیم حرچ بہ کنت۔آئی ءَ نوٹ بُکءِ تہ ءَ یک یک کلدارے ءِ حساب نبشتہ کت۔ آزندگ ات بلئے پرے حبر ءَ سدّک ات کہ مات چہ دنیا ءَ شت۔ یک روچے وتی دل ءِ بارءُ گم ءِ سبک کنگءَ آ قبرستان ءَ شت۔قبرحاکانی بارے ات۔ ایشی ءِ سر ءِ تالانیں پُل حُشک بو تگ ات انت۔ سر بِر ءَ یک وت رودیں کاہے ءَ شامب جتگ ات ءُ تالان ات۔ لہتیں سنگ بروبرءَ ایر ات انت۔ آئی ءِ قبرستانءِ اولی رند اَت۔ آ مات ءِ قبر ءِ سرونءَ نشت ءُ ہمے کاہ ءِ پُل ئِے دست جنان کت انت۔ آئی ءَ را حیال اتک کہ مات پہ ایمنی واب انت۔ آئی ءِ دوئیں دست دلبندءَ ایر انت۔ آئیءِ چم ایمنی بند انت۔ آئی ءِ درٛاجیں جامگ کونڈاں جہل انت۔ آ گوں حاکاں ہوار انت۔ آئیءِ کرٛچکیں دیم پُر ایمن انت ءُ چمانی دیم ءِ چشمک تِرٛپگ ءَ انت۔
آئیءَ کاہ ءِ بارگیں شامب دست جت انت، انچش مار اِت ئِے کہ حون ءِ رگ انت۔ یک پگرے ءَ آئیءَ را دلپدرد کت ءُ آ چہ قبر ءِ سرون ءَ پاد اتک۔ نگہ دارئے ! کہ اے درٛچک ءِ وراک منی مات ءِ حون انت۔ آ پد کنز اِت ءُ شت بلئے پد ءَ ہر وہد ءَ قبرستان ءَ اتک ءُ شت ءُ ہمے رنگ رنگیں پُلانی نیمگ ءَ چاراں بوت ءُ حیالاں گار اَت۔ انچش کہ اے تاک پُلاں وتی لنککانی شم ءَ ماریت۔
یک روچے آئیءَ چہ مات ءِ قبر ءِ سر ءِ رستگیں پُلاں (بوگین ویلا) چہ شامبے سست ءُ آورت، وتی لوگ ءَ بوتلے آپ ءِ تہ ءَ ایر کت۔ آئیءَ ایشی ءِ چارگ ءُپہازگ بندات کت بلئے لہتیں روچ ءَ پد ایشی ءِ شامب ءِ رنگ گیمرت ءُ پُل ءُ تاک رِتک انت۔ آئی ءِ دل ہم ہمیشی گوں گیمرت ءُ پدرد بوت۔
پد ءَ ہم ابیتکیں بیگاہ اتک انت ۔ آ وتی ڈکّ ءِ دپ ءَ تہاری ، استالانی روژنائی ءَ اوشتوک ات ۔ ٹُوہیں درٛچک گُڈّگ بوتگ ات۔ دگہ درٛچک پرٛوشگ ءُ گْوجگ بوتگ اِت انت۔ ترس ہمیش ات کہ ایشانی روتگ کِر ءُ گوٛر ءِ لوگانی بُن ہشتاں ور اَنت ءُ د َور دینت۔
سرکارءَ آ درٛچکانی جاگہءَ وتی تب ءِ درٛچک بوہینہءُجیکارنڈا۔ ( افریکہی درٛچک ) کشت اَنت۔ اے انچیں درٛچک ات انت زوت رو٘د اِت اَنت۔
یک بیگاہے آ ہمیشانی کرءَ شت ۔ درٛچک ءِ بُنڈئِےدست جت بلئے آ حِس ءُ مارگ نیست ات کہ پیسریگیں درچک ءَ دات۔ اے نرم ات ، بے جان ات ءُ ایشی ءِ ساہگ تنَکّ ات ۔ بلئے آ انگتءَ ہمودءَ اوشتوک ات ۔ بے تواری ءَ وداریگ ات کہ کش ءُ کرءَ مردم گوٛست انت بلئے کس ءَ آئی ءَ را کِمار نہ کت کہ مردمے یا ہمے درٛچکاں چہ یکے۔
یک بیگاہے ءَ مردمی توارے آئیءِ گوشاں کپت۔’’ تو چے کن ئے ادءَ؟‘‘
اے توار آئی ءِپجاروکے ئیگ ات۔اے ہما جنک ءِ توار ا ت بلئے آ جنک ءَ آ دیری بے ہال کتگ ات ءُ شتگ ات ءُ نوں سورئِے کتگ ات ءُ چنت چک ءِ مات انت۔ نوں چوں پہ مہروانی آئی ءِ ترٛانگ ءَ کپیت ءُ کیت گوٛشیت کہ ’’ باریں توئے انگتءَ ہمدءَ کپتگ ئے؟‘‘۔
آئیءَ جنک ءَ را وتی ہم عمری ءُ قد ءُ بالاد ءِ درٛوشم ءَ پہ گندگی چم سک دات انت۔ گڑا زوت سرپد بوت کہ اے چہ دیم ءِ لوگءِنشتگیں مردماں یکے۔ بگندئے ہما پیسریگیں جنک ءِ دہ سال کستریں گوٛہار انت کہ تنیگتہ جنین چک انت۔ مات ءِ مرگ ءَ پد آ چٹ جتائیں مردمے بوتگ ات ، انچش کہ آئی ءِ دل سنگ ءِ وڑ ءَ ڈڈ انت۔ بلئے جنک ءِ دل ءَ پرآئی ءَ یک چیر اندریں مہرے ءَ جہہ جتگ ءُ مہلوک ءِ گوٛشگ ءَ ابید آئی ءِواہگدار اَت۔
آ پد ءَ گوں اے جنک ءَ ہمراہ بوت ۔ آئی ءِ ہواری ءَ فلم چارگ ءُ تر ءُ گردئِے بنا کت۔ آوانی مہر ءُ محبت گیش بوّہان بوت، تاں کہ دوستی ءُ مہر پہ واس ءُ امبازاں گرگ ءَ سر بوت ۔ آئیءَ جنک ءَ را ترٛندی ءَ گوں امبازاں زرت ءُ پہلو پرٛوشگی کت انت ءُ برے برے ہمے بوت کہ جنک ءَ آئی ءِ دوستی پرٛوشگ ءِ قول کت بلئے دومی بیگاہ ءَ پد ءَ اتک ءُ آ ئِے یل دات نہ کت۔
جنک آئی ءِ لوگ ءَ کدی نہ شت ۔ آئی ءِ دل ءِ تہ ءَ مرتگیں پیر زال ءِ ترس انگتہ ہست ات ۔ اے گپ ءَ بچک دل گرٛان نہ بوت ۔ جنک ءَ زانت کہ آئی ءِ گوما گس ءَ ڈن نند ءُ نیاد شرتر انت۔
بلئے روچ پہ روچ آئی ءَ دیست کہ وہدے آئی ءَ را امباز کنت گڑا آئی ءِ دپ ءَ لہتیں حبر در کپ انت گڑا نزانت کہ چے کنگ ءَ انت ءُ انچش پہ زور آئی ءِ دست ءُ بدن ءَ کبُند کنت کہ پورا آئی ءِ جان ءِ ہڈّاں پروشان انت ’’تئی مود، تئی مود، تئی دنتان ، تئی ہڈّ‘‘۔ ہمے حبراں کنان بیت ۔ آ پہ گنوکی انچش آئی ءِ جان ءَ پرٛنچان ءُ زور دیان کنت کہ سُہب ءَ آئی ءِ جان ءُ دست ءُ کوپگاں سبز سبزیں ٹپّ پدّر بوت انت۔آئی ءَ اے ٹپ ءُ نشان چہ وتی کہول ءِ مردماں چیر دیان کت انت۔ جنک ءِ دل ءَ آ سکّ توان دار انت۔ ہما وڑ ءَ کہ آئی ءِ زوراں درٛچک ءِ بُنڈ ءِ وڑ ءَ آئی ءِ ہڈّ برداشت کنان ءُ سگّان انت۔ بلئے وہدے آئی ءَ وتی دستاں گوں آ زور ءَ پْرنچان کت انچش گمان بوت کہ آئی ءِ جان ءِ تیوگیں حون یکجاہ بوت ءُ ساہ بند انت بلئے انگتہ گوٛشت ئِے کہ ’’ تو ہچ کت نہ کنئے، تو ہچے نہ ئے، من چہ تو زو٘راں‘‘۔
اے ہرروچی کار ات کہ اے درٛچکانی کرّ ءُ گوٛر ءِ باگ ءَ برجاہ ات ، مردماں ہم آ دیست انت کہ بند مِڑ اِنت ءُ کپتگ اَنت۔ انچشکہ یکے دومی ءِ ساہ ءِ کشّگ ءِ لیب بوگ ءَ اِنت۔
یک شپے آئیءَ جنک انچش بے وار کت ءُ زوراں گوں کجّ اِت کہ آئی ءِ ساہ دراہگی بوت ءُ اد ءَ چہ آئیءَ سوگند وارت کہ نوں نئیت۔
آ جِست ءُ شت وتی لوگ ءَ بند بوت۔ یک ترسے آئی ءِ جان ءَ پترتگ ات ۔ پد ءَ وہدیکہ جہل ءَ آئِے چار اِت گڑا پہ بے وار ءُ بے کراری سرگردان ات گڑا جنک ءَ دل ءَ بزگ کت کہ باید انت کہ آئی ءَ را چش یل مہ کنت گڑا دومی بیگاہ ءَ آئی ءِ کرءَ شت ۔ تاں آ پہ گشاد اتک ءُ آئِے گپت ءُ گوں زوراں گرٛان کنان ہما درچک ءِ جاگہ ءَ شت ۔ جنک ءَ دیست کہ ماہیکان ءِ روژنائی ئِے دیم ءَ تالان انت ۔ آئی ءِ چم روژنائی ءَ در گُڑیتگ انت ءُ آئیءِ دستانی زور ءُ پہلوانی گڑاپکگ ءِ توار بُتک۔پد ءَ آئی ءَ ہمے اشکت کہ ’’ تئی مود ، رتکگیں مود۔۔ہڈّ۔ ہڈّ ۔ ہڈّ‘‘۔
آ ئی ءِتُوسکیں نیش گردن ءَ سکّ بوت انت ۔ پد ءَ ہر نیمگ ءَ تہاری مانشانان بوت۔
بام ءِ رژنائی ءَ پد وہدے مردماں پَلّ ءَ سر کشّ ات گڑا آہاں دیست کہ آ جنک ءِ سرءَ نیم کپوک انت حون ءُ حاک جنک ءِ بدن ءَ لِچّوک اَنت۔ فریڈرک لبجان انت’’ تئی مود __ تئی تاکاں __ تئی شامبان __ تئی دریاہان۔