نبشتہ کار: ہرٹا مُلر
رجانک: شرف شاد
ریلوے اسٹیشن ءَ نزّیکیں سیاد ءُ وارث گوں ریل گاڑی ءِ روانی ءَ ہم قدم ءُ تچان ات انت۔ ہر گام ءَ آہاں دست چست کت پہ اجازت کنگ ءَ دست سُرینت اَنت۔
ریل ءِ ڈبّہ ءَ دریگے ءِ پُشت ءَ یک ورنائے اوشتاتگ ات۔ دریگ شیشگ داں آئی ءِ کوپگاں رستگ ات۔ آئی ءَ گیمرتگیں اسپیتیں پُلّانی یک گُلدانے دلبند ءَ داشتگ ات۔ آئی ءِ دیم مُنجیتگ ات۔ یک کُمپیں کساں سالیں جنینے یک زہگے ءَ چہ ریلوے اسٹیشن ءَ ڈنّ برَگ ءَ ات۔ اے ریل دیم پہ جنگ ءِ میدان ءَ رؤگءَ ات۔
من پاد اتک ءُ ٹی وی بند کت۔
منی کماش ءِ میت لوگ ءِ دل ءَ ایر ات۔ چپّ ءُ چاگرد ءَ دیوالانی سرءَ ہمنچو عکس جتگ ات کہ دیوال مشکل ءَ درا بوئگءَ ات۔
یک عکسے ءَ کماش ءَ چہ وتی قدّ ءَ دو ہمنچو بُرزیں کُرسی ئے گپتگ ءُ داشتگ ات۔ آئی ءَ یک فراکے گوٛرا ات۔ ءُ آئی ءِ سارنگی رنگیں پادانی سرءَ پیگ بز بزءَ چرپ کتگ ات۔ آئی ءِ ناشپاتی دروشمیں سرءَ دیم ئِے پدّر نہ ات۔
یک دگہ عکسے ءَ منی کماش سالونک ات۔ آئی ءِ دلبند ءِ نیم بس ظاہر ات۔ دلبند ءِ آ دگہ بہر منی مات ءِ دستاں گیمرتگیں اسپیتیں پُلّانی پُشتءَ چیر ترّیتگ ات۔ آہانی سر گوں یکے دومیءَ انچو نزیک اِت اَنت کہ آہانی گوشانی بِڈّ وت مں وت ڈُکّیتگ اِت اَنت۔
یک دگہ جاہے ءَ آ یک آسنےءِ جنگلہ ئے ءِ دیما اوشتاتگ اِت انت۔ آہانی پاد انی چیرءَ برف لچّیتگ اِت اَنت۔ برف انچو اسپیت ات انت کہ انچو سما بوت منی کماش ءِ چاریں نیمگا آزمان ظاہر ات۔ دست اِش پہ سلوٹ کنگ ءَ چست ات انت۔ ءُ آہانی کالراں پیت پِر ات۔
ایشی ءِ کش ءِ عکس ءَ منی کماش ءَ بردے ماں کوپگءَ ات۔ آئی ءِ پُشتءَ بٹانی رمے ءَ سربُرز کتگ ءُ آزمان ءِ نیمگا چاران اوشتاتگ اِت اَنت۔ آئی ءَ کُلاہے سرءَ ات۔ کُلاہ ءِ ساہگ آئی ءِ دیم ءِ سرا تالان ات۔
کش ءِ عکس ءَ کماش یک ٹرکے ءِ اسٹیئرنگ ءِ دیم ءَ نشتگ ات۔ ٹرک ءَ گوک لڈّیتگ اِت انت۔ کماشءَ ہمک ہپتگ اے گوک شہرءِ کساب جاہاں بُرت انت۔ آئی ءِ دیم ترٛند ءُ بارگ ات۔ چرے درٛستیں عکساں انچو سما بوت گُشئے کماش لہتےچیدگانی درمیان ءَ درٛتکگ ات۔ درٛستیں عکس ہمے شُبین دیگ ءَ ات انت، گشئے آ وتی کردار ءَ نزانتکار ات انت کہ آہانی چے کنگی اِنت، پمشکہ اے درٛستیں عکس درٛوگ ات انت۔ اے درٛوگیں عکس ءُ درٛوگیں درٛوشماں اوتاک ءِ سارتی گیش کتگ ات۔ من لوٹ اِت کہ چہ کرسی ءِ سرءَ پاد بیاہاں بلئے منی پوشاک کُرسی ءَ پِر لچّیتگ ات انت۔ من ءَ تنکیں سیاہیں گُد گوٛرا ات۔ من اے دیم ءُ آ دیم ءَ لیٹ اتاں گُڈا اِشاں کپُش کپُش کت۔ من ترٛانگ ءَ کپت ءُ وتی کماش ءِ دیم دست جت۔دیم چہ اوتاک ءَ موجودیں چیزاں گیشتر سرد ات۔ ڈنّ ءَ گرماگ ءِ موسم ات۔ مگسک بال کنان وتی ہئیکاں تالان کنگ ءَ ات انت۔ پرٛاہیں ریکشانیں سڑک ءِ کشءَ میتگ ءِ لوگ شنگ ءُ شانگ ات انت۔ دگ گرم ءَ چو تین ءَ تپتگ اتءُ آئی ءِ روژنائی ءَ چم تیری میری کنگ ءَ ات انت۔
قبرستان ڈل پادیں زمینے ات ،ءُ قبرانی سرینءَ گِرد ءُ دراج بُرّیں سنگ کلّ ات انت۔من چم جہل کت انتءُ زمین ءِ نیمگا چار اِت، گُڑا منی کوشانی چیرگ بُرزی نیمگا چست ات انت۔ سرجمیں وہد ءَ من وتی پیتانی سرا روان کتگ ات ، درٛاج ءُ مزنیں پیت منی پُشتءَ کپتگ ات انت ءُ آہانی کنڈ چست ات انت۔
دو لُڈّان لُلّرانیں پٹّکیں قدّءِ مردم میتءَ چہ گاڑیءَ ایرگیجگ ءَ ات انت۔ آہاں گوں ریسّیتگیں شیمازاں تابوت قبرءَ ایردات۔ میت سادانی سرءَ لونجان ات ۔ آہاں وتی باسک درٛاج کت ساد کمّیں انگتہ شُل کت۔ ڈکّال ات بلئے انگتہ قبر چہ آپ ءَ پُرّ ات۔
’’ بازیں مردمانی کوشءَ تئی پت ءِ دست مان انت‘‘ یک پٹّکیں نشہ ءَ گرکیں مردکےءَ گوٛشت۔
’’ آ یک جنگے ءَ گون ات‘‘ من گوٛشت۔ ’’ ہر رندءَ بیست ءُ پنچ جنَگءَ پد آئی ءَ یک میڈلے دیگ بوت، آئی ءِ بازیں میڈل لوگءَ آؤرتگ ات۔
’’ شلجم ءِ ڈگاراں آ یک جنینے ءِ چکّءَ کپتگ ات‘‘ پٹّکیں مردءَ گوٛشت۔ ’’ دگہ چار سپاہیگ ہم گوں آئی ءَ گون کپت ۔ تئی پتءَ جنین ءِ لِنگانی شمءَ شلجمے مان کتگ ات۔ ما کہ چہ اودا درکپتیں جنین حون ءُ حونریچ ات،ءُ آ یک روسی جنینے ات۔ چہ آئی ءَ پد داں بازیں ہپتگاں تئی پتءَ ہر سلاہ شلجم گوٛشت۔‘‘
’’ تاکچنڈ ءِ گُڈّی روچ ات انت‘‘ پٹکیں مرد ءَ گوٛشت،’’شلجم ءِ سیاہ رنگیں تاک ، چہ نمبانی ترٛمپاں جہلی نیمگا لونجان ات انت۔‘‘پٹّکیں مردءَ گوں ہمے گپّ ءَ یک بلاہیں سنگے چست کت ءُ تابوت ءِ سرا ایر کت۔
نشہ ءَ تترّان کوتاہ قدیں دومی مردم ءَ درّائینت۔ ’’ نوکیں سال ءِ درگتءَ ما جرمن میتگے ءَ اوپراءِ چارگءَ شُتیں۔ ہمے گشندہ ءِ توار ہم مئے گوشاں انچو مین بوئگ ءَ ات چو کہ ہما جنین ءِ چیہال ۔ یک یک ءَ ما چہ تھیٹرءَ ڈنّ دراتکیں بس تئی پت داں گُڈّ سرا نشت۔ چہ ہما روچءَ پد آئی ءَ ہر سوت ، ءُ ہر جنین شلجم گوٛشت‘‘۔
اے پٹّکیں مرد ’’ اشنپل ‘‘ نامیں شرابے ورگءَ ات۔ آئی لاپ انچو گُڑومب گُڑامب کنگ ءَ ات گُشئے گُلگُل جنگ ءَ بہ بیت۔
’’ منی لاپ ءَ ہمنچو شراب مان چو کہ اے قبرآپ ءَ پُرّ اِنت‘‘ پٹکّیں مردءَ درّائینت۔پدا آئی ءَ بلاہیں سنگے چست کت ءُ تابوت ءِ سرا ایر کت۔
ہما مردک کہ جنازہ ءِ گُشتانک ءَ دیگ ءَ ات۔ آ سنگ مرمرءِ اسپیتیں صلیب ءِ کشءَ اوشتاتگ ات۔ آ گام جنان منی کرا اتک۔ وتی دوئیں دست ئِے کوٹ ءِ کیسگاں چیر داتگ ات انت۔
ہمے مرد بس کل ءُ کسارت کنگ ءِ وہدءَ گُشتانک دیگءَ ات۔ آ ئی ءِ کاج ءَ دستءِ دل ءِ قدّیں یک گُلابءِ پُلّے جتگ ات کہ گندگءَ مخمل ءِ گُدئیگے ات۔ وہدے آاتک ءُ منی کشءَ اوشتات گُڈاآئی ءَ چہ کوٹءِ کیسگ ءَ یک دستے درکت۔ آئی ءِ دست ءِ مُچ نزّ ات۔ آئی ءَ سک زور جت بلئے وتی دست ءِ لنکک ئِے تچک کت نہ کت انت۔ چہ درد ءَ آئیءِ ٹیلگ ڈنّءَ دراہگی بوت انت۔ بے آوازءَ گرئیت ءُ زاری ئِے جت۔
جنگ ءِ روچاں مارا چہ وتی ہم وطناں ہم شیوار بوئگی اِنت۔ تو آہاں حُکم دات نہ کنئے۔
پدا ہما مرد کہ میت ءِ کلّءُ کسارت کنگ ءِ دعا ءَ وانگءَ ات۔ آئی ءَ تابوت ءِ سرا یک ٹوہیں سنگے ایر کت۔
یک زنڈیں مردکے اتک ہم اتک ءُ منی گوٛرا اوشتات۔ آئی ءِ سر ابید دیم ءَ چو ہَیکے ءِ رنگءَ ات۔ ’’ تئی پت ءَ داں مزنیں مُدتے گوں منی جن ءَ وپت ءُ واب کتگ‘‘ آئی ءَ گوٛشت’’ من کہ نشہ ءَ بے ہوش بوتگاں ، گُڈا من ءَ بلیک میل ئِے ہم کتگ، ءُ آئی ءَ منی زرّ ہم دُزّیتگ اَنت۔ ‘‘ آ یک مزنیں وانگے ءِ سرا نشت۔
پدا یک لاگریں کرٛچک ءُ کونسیں جنینے منی نزّیک ءَ اتک۔ آئی ءَ منءَ پیٹ ءُ ملامت کت ءُ منی دیم تُک جت۔ جنازہ ءَ ہواریں مردم درٛچک ءِپُشتءَ اوشتاتگ اِت اَنت۔ من سر جہل کت ءُ وتی سرءَ چمشانکے دات گُڑا اجّکہ بوتاں۔ آ دُرٛستانی چم منی دلبندءَ سکّ اِت انت۔منی بالاد ءِ رگ ءُ بنداں یک سارتی ئے شنگ بوت۔ درٛستانی ہورک ءُ حالیگیں چم من ءَ سکّ اِت انت۔ آہاں چم جہل ءَ جتگ ات انت ءُ آہانی ٹیلگ من ءَ چو تیر ءَ پیوست ات انت۔ مردینانی کوپگاں آہانی تُپنگ لونجان ات انت ءُ جنین تزبی ٹِکّینگءَ اِت اَنت۔
ہما مردک کہ میت ءِ گشتانک ءَ دیگ ءَ ات، آئی ءَ گلاب ءِ تاک ءُ پن پرٛوشان کت انت۔ آئی ءَ یک حون رنگیں تاکے پرٛوشت ءُ وتی دپ ءَ ایر کت۔ من ءَ گوں دست ءَ اشارہ ئِے کت، من زانت کہ نوں من ءَ یک ءُ دو گپ جنگی اِنت۔ درٛست منی نیمگا چارگ ءَ ات اِنت۔ من دست دپ ءِ سرا ایر کت ءُ جات ۔ دست ءِ پُشتءَ دنتانانی نشان ظاہر ات انت۔منی دنتان گرم بوت انت۔ حون چہ دنتانءَ دراتکگ ءُ کوپگ ءِ نیمگا رچان ات انت۔
گوات ءَ منی پوشاک ءِ آستونکے دِرتگ ات کہ نوں ماں گوات ءِ تہا چلنڈگ ءَ ات۔یک مردمے ءَ وتی دزلٹ سنگےءَ اڑینتگ ءُ اوشتاتگ ات۔ آئی ءَ گوں وتی تپنگ ءَ نشانگ بستءُ منی آستونک چہ پشک ءَ سِست۔ حون ءَ لیگاریں آستونک سِست ءُ منی دیم ءَ کپت۔ جنازہ ءَ ہواریں مردماں چاپ جت۔
’’ ما وتی مہلوک ءِ سرءَ پہر بندیں، مئے سوبمندی مارا زوال ءِ نیمگا رؤگ ءَ داراَنت۔ ما وتی مڑاداری ءُ شرف داری ءَ پہریزیں۔ ما وتی سرءَ درٛوگیں بہتام سگّ اِت نہ کنیں۔ مئے جرمن مہلوک ءِ نام ءَ سربُلند کنگ ءَ ترا مرگ ءِ سزا دیگ بیت۔ ‘‘
آ دُرٛستاں وتی تپنگ منی نیمگا تچک کت انت۔ منی سرءَ یک گوشاں ترٛاکینگی ترٛاکے ءِ توار بوت۔ من دیمی نیمگا کپگی بوتاں بلئے زمین ءِ سرا نہ کپتاں۔ من آہانی سرءَ گواتءَ بال بوتاں۔
من سُبک سُبک ءَ درستیں درواز پچ کت انت۔
منی مات ءَ درٛستیں لوگ رُپتگ ات انت۔
ہما جاہ ءَ کہ اول ءَ تابوت ایر ات۔اودا نوں درٛاجیں ٹیبلے ات۔ ہما کسابانی وڑیں ٹیبل ۔ آئی ءِ سرا اسپیتیں ہورکیں پلیٹ ءُ گیمرتگیں پُلّانی گُل دانے ایر ات۔
مات ءَ تنّکیں سیاہیں پوشاکے پوشیتگ ات۔ درٛاجیں دزلٹّے دست ءَ اِت ئِے۔ آدینکے ءِ دیم ءَ اوشتات۔ گوں کارچے ءَ وتی بور رنگیں زنڈیں پنگ بُرّ اِت۔ ہمے دوئیں دستانی دل ءَ داشت، دیم پہ ٹیبل ءَ اتک۔ ٹیبل ءِ سرا ایریں پلیٹ ءِ تہا ایر کت۔
’’ نوں من منتگیں عمرءَ سیاہیں پوشاک گوٛرا کناں‘‘ آئی ءَ گوٛشت۔
آئی ءَ پنگ ءِ یک سرے مان داشت۔ آس ٹیبل ءِ یک کُنڈےءَ داں دومی کُنڈءَ شنگ بوت۔ پنگ چو پلیتگے ءَ بُن گپتگ ات۔ آس لِلّک دیان ، چٹّان ءُ پلکّان ات۔
’’روسءَ آہاں منی مُود سات اَنت، اے چہ درٛستاں کستریں سزا ات‘‘ آئی ءَ گوٛشت۔ آ شُد ءَ چنگ ات۔ شپ ءَ یک شلجم ءِ ڈگارےءَ ایر کپت۔’’ ڈگارءِ پاسپان ءَ تُپنگے گون ات ۔ اگاں آئی ءَ من ءَ بہ دیستیں تیرے آس داتگ ات۔ ڈگارءَ ہچ وڑیں کپش کپش نہ بوت۔ اے تاکچنڈ ءِ گڈّی روچ ات انت۔ شلجم ءِ سیاہیں تاک نمب ءِ ترٛمپاں جہل اتکگ ات انت۔
من مات چہ آئی ءَ پد نہ دیست ، پلنگ بُن ات۔ اوتاک دُوت ءُ آڈہور ات۔ من آئی ءِ پاد برٛمش اش کت گُڈا دست شہار دات ءُ لوٹ اِت کہ آئی ءَ بہ گِراں۔ آئی ءَ ناگہاں وتی ہڈّیں دست منی مُوداں مین دات۔ آ منی سرءَ ژامبلینگءَ ات۔ من چیہال کُت۔
من وتی چم یکپارگی پچ کت اَنت۔ کمرہ گردشے ءِ تہا پِر چکّروکی وران اَت۔ من گیمُرتگیں اسپیتیں پُلّانی درمیانءَ کپتگ ءُ بندیگ اِتاں۔
پدا من ءَ انچو سما بوت گُشئے بلڈنگ ءِ اپارٹمنٹ دیمی نیمگا لُمبگ ءَ اِنت۔ ءُ زمین ءِ سرا وتی باطن ءَ ایر ریچیت۔
گھڑیال ءِ الارم توارءَ ات۔ شمبہ ءِ روچ ءِ سُہب ءِ پنچ ءُ نیم بوتگ ات۔