بلوچ اسٹوڈنٹس فرنٹ شال ھنکین ءِ بروری بُنزہ ءَ وانگی گردانکے چہ بُنزھی کماش چاکر چراگ بلوچ ءِ پاگواجھی ءَ برجم دارگ بوتگ ۔ دیوان ءِ مھمان ءِ ھاس بُنجاھی کمیٹی ءِ باسک گل ھسن بلوچ ءُ گچینی مھمان شال ھنکین ءِ شنگکار معراج لال بوتگ اَنت ۔
بی ایس ایف ءِ بُنجاھی کمیٹی ءِ باسک گل ھسن بلوچ ءَ “گل ءُ پارٹی ءِ پرک ءُ تپاوت ، گَل ءِ توک ءَ باسک ءِ کرد “ءِ سرھال ءِ سرا چہ بُنگیج ءَ تران کناں ءَ یک گَلے ءِ جوڑشت ءُ آئی ءِ قسم ءُ تھراں ءَ گیش اینت کہ گَل سرکاری ءُ گیر سرکاری بنت آوانی تھا سیاسی گیر سیاسی ھم بنت ۔ لھتیں انچیں تنظیم بنت کہ آوان ءَ گوں سیاست ءَ ھچ وڑیں جیڑہ نیست، بلئے ھر یک گَلے ءِ واستا اِے المّی بیت آئرا جوانیں مکسد ءُ لیکھے بہ بیت ، یک راھبندے بہ بیت ۔ آ گَل ءَ را یک جوانیں جوڑشتے بہ بیت ءُ کابینہ ءُ بُنجاہ ءَ ھوار زمہ واریں باسک ءِ بہ بیت ۔ پرچاکہ ابید چرایشاں چہ گلے جوڑ بوت نہ کن اَنت ۔ پہ یک جوانیں گَلے ءِ واستا دگہ بازیں چیزے ھم درکار بیت ۔ بلئے اِے یک سیاسی سوبمندیں ءُ پگری گَلے ءِ بُنکی لوٹ اَنت ۔
گل ھسن بلوچ ءَدیمتر ءَ تنظیم ءُ پارٹی ءِ تپاوت ءِ درگت ءَ تران کنان ءَ گُشت تنظیم ءِ تہ ءَ یک تبکے ءِ مردم بنت پارٹی ءِ تھا ھرچ تبکے ءِ مردم بوت کنت بلئے یک پگری مکسدے دوئینانی واست ءَ المّی اِنت ۔ بازیں تنظیم ھست اَنت کہ آ ھاسکر یک جیڑھے ءِ سرا کار کن اَنت بلئے پارٹی یک چاگَرد ءِ تھا ھرچ وڑیں جیڑھاں گوں گولائیش بیت پارٹی ءَ را چاگرد ءِ یک جیڑھے نہ بلکن ھرچ جیڑہ ءَ گوں کار ھست ۔
دیمتر ءَ سنگت ءَ تنظیم ءِ تھا باسک ءِ زمہ واری گُشت اَنت لھتیں چو اِے وڑ ءَ اِنت کہ رھبند ءِ پاسداری کنگ، تنقید برائے تعمیر، مزنیں سونچ دارگ، وھد ءِ پابند بوھگ، سیاسی شعور ءُ سیاسی پختگی، ھر روچ ھالتاک وانگ ءُ سیاسی جاورھالانی شری ءَ سرپد بوھگ، وتی زمہ واریانی پیلّو کنگ، دوھمی تنظیمانی سرا گیر زلوری نگد کنگ ءَ چہ وتارا دور دارگ، وتی کورس ءَ چہ ابید جنرل کتاب وانگ، ھرچ وڑیں جاور ھالاں گوں مقابلہ کنگ ءِ جْورّت دارگ ءُ دگہ ھمے وڑیں زمہ واری کہ ھر یک باسکے ءَ را درکار بنت ۔
گُڈسر ءَ دیوان ءِ گوں جُست ءُ پسّواں پد چہ بُنزھی کماش چاکر چراگ ءِ چیردستی ءَ دیوان ءِ ھلاسی ءِ جار جت ۔