اکّی بلوچ
گرماگ ات، شپ ءِ نیم ات ءُ ماھو ڈّن ءَ لوگ ءِ پیژگ ءَ وتی تہت ءِ سرا وپتگ ات، اے وھدی سرجمیں مردم ھلک ءُ میتگ ھاموش ات، بیدے ہمے بازاری کُچکانی چنگگ ءَ، ءُ ماھو ءِ ارواہ ءِ چیہانٹانی توار ءَ دگہ ھر کس ءُ ھرچی وش واب اتاں۔۔۔۔
بلئے ماھو واب نہ ات چمے گوں آزمان ءَ ات ءُ آزمان ءِ ندارگاں سیئل کنگ ءَ ات… اناگہہ ءَ استالے چہ وتی جاہ ءَ سِست ءُ آئی دیما ءَ چہ گوست۔۔۔۔ ءُ ماھو ءَ را وتی گوما بریں کجا بُرتے گوں۔۔۔
دودا منا تئی ھمے عادت ھچ دوست نہ بیت، من تئی کش ءَ نشتگ آں ءُ تو ئے کہ تئی چم آزمان ءَ چہ دور نیاں، نزاناں آزمان ءِ سرا زاھر بہ باں اگاں تئی۔۔۔۔ بُگوش نا! چیا آزمان ءَ چو چارگ ءَ ئے…؟؟؟
دودا ءَ ماھو را چارت ءُ بچکند ءَ گوں پسہ دات: ” برے برے منا گمان بیت ھمے استال کہ گندئے سِد انت ءُ کپنت، اے منی ماھو ءِ دامن ءَ رجنت ءُ پدا آئی را ماہ ءِ چارگ ءَ بکش ءَ انت۔۔۔ ہما ماہ کہ چاردہ ءِ شپ ءَ سرجمیں جہان ءَ وتی رژن ءَ تالان کنت۔۔۔۔
چوناہا زِر ءِ توار ءُ تیاب دپ ءِ کوش ءِ کشگ ماھو ءِ دل تبیں چیز ات انت ءُ آئی ءَ مدام اے ندارگ دوست ات گوں شپ ءِ ماہکانی ءِ رژن ءَ کہ زِر ءِ جبین ءَ کپیت ءُ زِر چو نوکیں بانور ءَ ڈولدار ءُ زیبا بیت۔۔۔۔ ءُ مرچی کہ آ دودا ءِ پُر مہریں ھبراں گُشدارگ ءَ ات آئی ءَ اے درستیں ندارگ گیشتر وشی ءُ تاھیر دئیگ ءَ اتاں۔
ماھو ءَ دودا ءِ ھمراھی ءُ تیاب ءِ لمب ءِ نند ءُ نیاد ءُ چولانی سُبک سُبکیں توار ءُ چولانی دم پس ءَ آئیگ ءُ پادانی چُکگ۔۔۔ ماھو ءَ سک وش بوہگ ات۔۔۔ چوناہا زر ہما انت کہ چول جنئگ ءَ ات بلئے اے رندگیں چول ءَ ماھو ءِ پادانی ھمراھی ءَ آئی ءِ اراوہ ہم بوسہ دات ، گُشئے آئی ءِ باتن ءَ دگہ زندے ودی بوت ءُ دگہ مردمے ایر کپتگ ات۔۔۔
ماھو ءَ دودا ءِ دست گپیت ءُ چو چُکانی وڑا گُشگ ءَ لگیت ” دودو جان بیا وتی مہرانی بہشتے تیاب ءِ دپ ءَ جوڑ کناں.. آ دوئیں انچو گل ءَ بال اتاں گُشئے زر ءِ پُر زیمریں توار پہ ہما دوئیناں ساز جنئگ ءَ اِنت ءُ ماہ ءِ رُژن نازینک جنئگ ءَ اِنت۔۔۔۔ دودا ءَ ماھو ءَ را گُشت تو زانے مئے بہشت کجام اِنت؟
ہردے کہ ما ماہکانی ءَ دوچار کپیں تو گُشئے بہشت یے جوڑ کناں!!! بیا مرچی ترا مئے بہشت ءِ سئے بہر من ترا دگہ دابے ءَ پیشداراں۔۔۔۔ ماھو دست وتی گُلانی سرا ایر کُت انت ءُ دیم گوں دودا ءَ کُت ءُ گُشت ” بُگوش بُگوش باریں سئیں بہر کجام انت، پیشدارے۔۔۔؟
دور تیاب ءِ نزیک ءَ یک وھدیگیں کُل یے بہ بیت، ءُ آئی ءِ دپ رو برکت ءَ پچ بہ بیت، ءُ دومی آئی دریگ مں تیاب ءِ نیمگا ءَ بہ بیت ، ھردے کہ تو پاد کائے تئی چم گوں زِر ءَ بہ کپنت ءُ زِر گوات تئی نرمیں لُنٹاں بُہ چُکیت۔۔۔ ماھو! برے برے زِر ءِ گوات گُشادی ءَ کہ شیکگ ءَ بیت گڑا تئی ابریشمیں ماھپراں بہ سماریت ءُ بہ شینگیںت۔۔۔۔ اے بہشتے ءِ سیمی بہر تو بہ بئے
من ءُ تو سُہب ءِ سیاہ چاہ ءِ گوما سارتیں سمین ءَ دیم پہ دیم بہ باں ءُ تئی پر پُکیں لُنٹانی سرا بچکندے ءُ منی دپ پُر ءِ کندگ ءَ بہ بیت۔۔۔
ماھو ءَ دودا ءِ نیمگا خمار چمی ءَ گوں چاریت ءُ میزان میزان ءَ وتی چم نزّ کت انت ءُ سُبک سُبکیں توار ءَ گوں جست کت : ” دگہ چے چے بیت؟ ” دودا ءَ پدا وتی گپ دیما بُرت ءُ گُشت: ” ماھو اگاں مئے بہشت ءَ کسانیں حورے ہم بہ بیت گوں گڑا مئے بہشت ءِ زیبائی گیش بیت۔۔۔ ماھو ءَ وتی چم گُشادی ءَ پچ کُت انت ءُ ھیران بوت ءُ جست کُت: ” بزانکہ چوں”؟ چونیں حور؟
دودا ءَ گُشت بزانکہ: ” کسانیں ہتلی لالے بہ بیت اجگیں دستوک، گونڈکیں شیلیں میچاچ چم ،کُنڈیں بِروان ءُ گرد دیمیں، ماہ دیمیں جنکوکے تئی گواران بہ بیت۔۔۔ ھردے کہ تو آئی ءَ چہ کمو بے دلگوش بہ بئےگڑا آ بہ تچیت ءُ دیم پہ زِر ءَ پہ ھاک ءُ گیلی ءُ لیب ءُ گوازی ءَ، گڑا تو دلترک بہ ءُ آئی ءَ پُشت ءَ تچے پہ آئی ءِ گِر ءُ در ءَ بلئے آ کندان ءَ دیم پہ زِر ءَ روان بہ بیت، ءُ من زاناں کہ ترا تُرسگ ءَ انت کہ مئے حور ءَ زِر مہ بارت بلئے من کُل ءِ دپ اوشتاتگ ءُ کندگ ءَ بہ چیا کہ من زاناں تو آئی ءَ پیسر ءَ گِرے۔۔۔
ھمے دمان ءَ بلاھیں چول یے اتک ءُ ماھو ءُ دودا ءِ سرا کپت۔۔۔ ماھو ءِ سرا گُشئیے آس کپتگ ات آ انچو پچ لزریت ءُ بے کساس ءَ گُڈیت۔۔۔۔ انچو گُشئے کہ آئی دست لگُشت ءُ آ زر ءَ کپت۔
ماھو برے زِر ءَ ءُ برے دودا ءِ نیمگا ءَ چارگ ءَ لگیت۔۔۔۔ دودا ءَ آئی ءِ دست ءِ سرا دست ایر کُت ءُ جست کُت ماھو چے بوت ترا ساہ ءِ بدل؟ چو گُڈیتے پرچا تو؟ ماھو ءَ چو گونڈوانی وڑا لُنٹ ایر دات اَنت ءُ پسہ دات : ” مئے بہشت کہ من تو پہ واھگے جوڑ کتگ ات، زِر ءِ چولاں بُرت۔۔۔
دودا ءَ آئی ءِ پیشانی را کسانیں شہماتے جت ءُ آئی ءِ گُل ءَ را پکے گیپت، ءُ پدا آئی ءِ سر وتی کوپگ ءِ سرا ایر کُت ءُ گُشت منی ارواہ اے وابے ات، اے تئی ھیالانی بہشت ات۔۔۔!
ماھو ءَ آزمان ءِ ندارگ یلہ دات ءُ کش وپت ءُ آئی ءِ چمانی زِر ءَ چہ زنڈیں مُرواردانی شلگ بِنا بوت ءُ آئی ءَ وتی چمان ءَ نزّ کُت۔۔۔
Discover more from Balochistan Affairs
Subscribe to get the latest posts to your email.