حسن ہمدم
چراگ روک ات-گوات تیز کشّگءَ ات- پمیشکہ چراگ ءِ آس چہ چمنیءِ بُرزی دپ ءَ زمانک دیگ ءَ ات-مات لوگ ءِ تہا یک کُوہن ءُ سستگ روتیں تحتےءِسر ءَ وپتگ بلے چمّ ئےِ گوں وتی بچّ ءَ سَک ات انت-اے ہما مات ات کہ چُک ءِ وپسگءَ ءُ رند گوں بے غمی وپتگ ات- چوگراں وابیں ماتے ءَ-بلئے مروچی واب ئےِ چہ دیدگاں پس سستگ ات چیاکہ مرچی آ جیڑگان ات کہ آئی ءِ بچّ،کہ ہمے مِرمریں چراگ ءِ گور ءَ نشتگ ءُ پریشان گندگ آہگا ات،چون انت ئےِ؟تاں شرّیں دمانے ءَ گوں ہمے پگر ءَ سر ءُ چیر بوئگءَ پدوہدے مات ءِ دل دارگ نہ بوت تہ بچّ ءَ توار ئےِ جت:
“منی چُک!چراگ ءَ کُش نوں،برو وتی تحت ءِ سرا بْوسپ،باندا ترا اسکول ءَ ہوں روگی انت،،
مات ءِ توارءِ اشکنگ ءَ گوں بچ میزان میزان ءَ پاداتک ءُ گوں نادلکشی شت وتی تحت ءِ سرا تچک بوت-مات ءَ آئی ءِ بے چاڑی مارِ ات ءُ ہمے جاور ءَ آئی ءَ گیشتر نگیگ ءُ پریشان کت-پمیشکہ آئی ءَ چہ وتی چُکءَ جست کت:
“منی چک!پرچا تو نہ وسپ ئے؟،،
“اماّں! من ءَ واب نئیت،،
“پرچا ترا واب نئیت؟ترا چون انت آخر-بلکن تئی مات وش وش نہ انت؟“
اناّں اماّں!چشیں یچ وڑیں ہبرے نیست،تو پگر مکن تو بوسپ من ءَ ہچ نہ انت،بس کُمکے-چہ بس کُمکے- چہ بس کمکے؟“
”منی چک!تئی دشمناں چون انت؟“
”اماّں ترا چون انت..تو آرام کن ترا منی وسپگ ءُ نہ وپسگ ءَ گوں چہ کار انت؟“
”ہو!با ترا میار نیست-تو نہ زان ئے کہ چک ءِ پاہار چی یے…باندا اگاں ترا حُدایا چکے دات گڑا من ترا جست کناں-“
”شرّ باندا جست بکن بلے انّوں تو آرام کن“
”شرانت بلے تو ھوں بوسپ-“
چو گُشان ءَ مات ءَ وپسگ ءِ واستا سستگ روتیں تحت ءِ سرا سر ایرکت بلئے واب آئی ءِ چماّنی ہپت پارسنگ ءَ ہم نہ ات- پرچا کہ دم پہ ساہت آئی ءَ اے ہبر بیوار کنگءَ ات کہ چک ءَ چون انت-اے وَ باز شر ءُ سلامتیں چُکے بیتگ نام حُدا-ایشی ءَ چہ واب ءَ ہچبر سیر نہ کتگ-وڑ وڑیں انچیں سوال مات ءَ مانتریناں ات انت-بلے مات ءَ نوں چک ءَ ہچ نہ گوشت-
مات ءِ چم چو گتراگ ءَ روک ات انت… وتی یکیں ءُ دوستناکیں چک ءَ نیم چمکانی چارگءَ ات-داں بے وہدے چک چہ گندلاں جہہ سرّ ات ءُ تحت ءِ چیرا شت پہ کپگ ءَءُ انچوکہ کپت لگّت گوں درہگءَ…مات گشئے چار ءَ چست کت ءُ چُست ءَ وتی چک ئےِ بگل ءَ کت ءُ لگّت گریوگ ءُ زاری ءَ …
”منی چک ءَ چون بیت؟کئے ءَ وتی ہرجان کت…بیا ات کہ من ءَ مار وارت-“
چہ مات ءِ پریات ءُ چیہلاں ہمساہگ آگہ بوت ءُ رمب ات انت-
”مہگلیں چی بوتگ؟“یکے جست کت:
“من نزاناں بیا ات کہ من ءَ سیاہ ءَ وارت…منی یکیں تاسکیں بچ دشمنانی ہرجان بوت “مات ءَ پنچ وتی سر ءَ جت ءُ گشت۔
”بلے تئی چُک ءَ چے بوتگ مہگلیں؟“
دومی ءَ جست کت-“من نزاناں دوسئے روچ انت بے چاڑ بے چاڑ بیتگ-“
شاری ہیّا کن ات مُلّا شہسوار ءَ توار بکن ات …کمیں دم ئےِ کنت-“
دمانے ءَ رند مُلّا شہکاران ءَ اتک ءُ آہگ ءِ شرط ءَ جست ئےِ کت:”ہاں! بچک ءَ چے بیتگ؟“
”حُدا بزانت“مات ءَ پسّو دات-
ملا ءَ اے دیم ءُ آدیم چاراِت۔ گیگ گور ئےِ درست کت ءُ نشت- آئی ءَ بچک ءِ دست ماں وتی دست ءَ زُرت-آئی ءِ رگ ئےِ ٹپاس ات ءُ پدا سر ءَ چنڈینان ءَ لگّ ات-دم کنگءَ کمیں دیر دم کنگ ءَ رند ملا ءَ پرمات کہ چُک ءَ دل پہ بالاد بہ کن ات-مات ءَ گوں شاری ءِ دست کُمک ءَ وتی بچ دل پہ بالاد واپینت- اناگہ مُلّا ءَ دیست کہ بچک ءَ دست ماں کیسگ ءِ دپ ءَ داشتگ-ملا شکی بوت،ءُ آئی ءَ بچک ءِ کیسگ ءِ دست چہ کیسگ ءَ گستا کت ءُ کیسگ ئےِ چنڈ ات….چہ کیسگ ءَ چہ لہتے باکسی ڈیلّ ءُ دو سگریٹی زری در اتک-