یارجان بلوچ
تمہید
بیستءُ یکمی کَرنءَ بلوچی لبزانکءِ چَندیں نام چو شستءِ زمانگءِ بلوچ ماڈرنسٹانی وڑا ہمے آسرءَ سَر بُوتگاں کہ بلوچی لبزانک اگاں وتا کوہنءُ شُونز بَندگءَ چہ رَکّینگ لوٹیت گڑا پہ اِیشیءَاَژدری اِنت کہ آ یورپءِ لبزانکاں چِست بُوتگیں لبزانکی ماڈرنزمءِ جُنز یا مئیل ءَوتی تہاہوار بہ گیجیت۔ ہمے چندیں نام کہ آ بلوچی لبزانکءَ ماڈرنزمءِ واستہ راہ پچ کنگءِ جہدءَ اَنت ایشانی ماڈرنزمءُ ماڈرنزمءِ نگاہاں بلوچی لبزانکءَ چارگءِ عملءَ منا سِکین داتگ کہ من آہانی لبزانکی لیکہءُ چوشیں لیکہانی بلوچءُ بلوچی لبزانکءِ سرا کپتگیں اثراں شوہاز بکن آں۔ بیستءُ یکمی کرنءَ ماڈرنزمءِ منوگِر شست(1960)ءِ زمانگءِ بلوچ ماڈڑنسٹانی وڑءَ ماڈرنزمءَ لبزانکءِ راجدپترءَ چِست بُوتگیں لبزانکی تحریکءِ بدلءَایشیءَ یک مئیلءُ دابےءِسرپد باں کہ اے ہچبر ہلاس نہ بیت۔ ماڈرنزمءَ یک مئیلءُ دَرشاندابےءِسرپد بوہگءِسببءَآ ماڈرنزمءُ ماڈرنٹیءِنیامءَ فرق کُت نہ کن اَنت۔ ماڈرنزمءُ ماڈرنٹیءِ نیامءَ فرق نہ کنگ ءِیکیں وجہءَ اِنت کہ آ ماڈرنزمءُ پوسٹ ماڈرنزمءَ یکیں چیز سرپد بنت۔ بلوچی لبزانکءَ ماڈرنزمءِ چندیں مردمانی ماڈرنزمءُ ماڈرنٹیءَ یکیں چیز سرپد بوہگءِ بیانیہءَ چیلنج کنگءِ واستہا ماڈرنزمءُ ماڈرنٹیءِنیامءَ فرق گیشینگی اِنت۔ ماڈرنزمءُ ماڈرنٹیءِنیامءَ فرق ہما وہدءَ گیش اِت کَنت وہدے ماڈرنزم ماڈرنٹیءِہلاپءَیک جمالیاتی،فلسفیانہءُ سیاسی پد کردےءِفہمگ بہ بیت۔ ماڈرنزمءَ ماڈرنٹیءِہلاپءَ یک پد کردےءِحسابءَ چارگءَ چہ ما نہ ایوکءَ بلوچی لبزانکءِ تہا ماڈرنزمءِ بنزہءَ جوانیں رنگےءَشوہاز کُت کَنیں بلکیں چَرایشیءَ چہ ما ماڈرنزمءُ پوسٹ ماڈرنزمءِ نیامءَ فرقے گیشینت کنیں کہ اے دوئیں کاراں ماڈرنزمءَ یک مئیلءُ درشاندابےءِسرپد بوہوکیں گروپ داں روچ مَروچی کُت کنگءَ نہ اِنت۔بلوچی لبزانکءَماڈرنزمءَ یک مئیلءُ درشاندابے سرپد بوہوکیں مردمانی لڑءَ کسان کنگءِ ہاترا من اِدءَ تہنا اے آر دادؔ (کہ اے لیکہ ءِ منوگرانی تہا سرمستریں نام اِنت)ءِ نبشانکءُ ردانکی کتاباں چہ آئیءِماڈرنزمءِ لیکہءَ دیما آرگءِجہدءَ کن آں۔دادؔءِ ماڈرنزمءُ ماڈرنٹیءَ یکیں چیز سرپد بوہگءِ بیانیہءَ پروشگءِواستہ من عطاشادءُ منیر مومنءِ ماڈرنزمءِ بابتءَ بیانیہ یےجوڑ کنگءِجُہدے کن آں ۔
پجار:
دُنیاءُ جہانءِ لبزانکاں ماڈرنزمءَ پد پوسٹ ماڈرنزمءِ جُنز ہم وتی آسرءَ سر بُوہان اِنت بلئے بلوچی لبزانکءَ داں روچءِ مروچی ماڈرنزمءُ پوسٹ ماڈرنزم یکیں بَنجاہءَ بندگ بوہگءَانت۔بیستءُ یکمی کرنءَ بلوچی لبزانکءِ یک گروپے ماڈرنزمءُ پوسٹ ماڈرنزمءَ یکیں بَنجاہءَ پرچا بندگ لوٹیت ۔ پٹءُ پولءِ نیامءَ منا ں ہمے سما بوتگ کہ بلوچی لبزانکءَ ماڈرنزم یک مانگیشیتگیں بُنگپے۔ ماڈرنزمءِ مانگیشگ ءِبُنکی سبب ماڈرنزمءُ ماڈرنٹیءِ نیامءَ فرق نہ کنگ اِنت۔ ماڈرنزمءُ ماڈرنٹیءِ نیامءَ فرق کنگءِ بازیں رہبنداں چہ یک رہبندے ہمیش اِنت کہ ماڈرنزم ماڈرنٹیءِ فلسفیانیہ، جمالیاتیءُ سیاسی لیکہءِ ہلاپءَ چست بوتگیں یک فلسفیانیہ، جمالیاتیءُ سیاسی پد کردے(ری ایکشن) ءِحسابءَ چارگ بہ بیت۔ راجدپتری حسابءَماڈرنٹی یک راجدپتری دؤر، مئیل، اسٹایل یےءُ ایشیءِ بُنکی حاصیت وتی نُوک بوہگءُ دِگرانی کوہن بوہگءِ سرا یقین دارگ اِنت۔ یورپءِ راجدپترءَ ماڈرنٹیءِ دؤر کَدی اتکگ اے بابتءَ بازیں زانت کار بازیں حیال دیما کار اَنت۔ اولی حیال ایش اِنت کہ ماڈرن دُور فرانسیسی فلاسفر ڈیکارٹءِ فلسفہ، سائنسءُ ٹیکنالوجیءِ دیمروی، پروٹسٹنٹزمءِ دیما آیگءُ فیوڈلزمءِ زوال بوہگءَ پد دیما اتکگ۔ دُومی حیال اِیش اِنت کہ ماڈرنٹی امریکہءُ فرانسءِ آشوب، نُوک نُوکیں قومی ریاستانی جُوڑ بوہگ، کپٹلزمءِ شِنگءُ تالانی، ٹیکنالوجیءُ سائنسءِ اِنسانی زندگیءِ سرا اَثراںءَ پد دیما کئیت اِنت۔
Modernism and Fascism
ءِ نویسکارءِ حیالءَماڈرنٹی ہژدہمی کَرنءِ گُڈ سرءُ نوزدہمی کرنءِ بنداتءَ یک انقلابی دؤرءِ تہا زندگ بوتگءُ نوزدہمی کرنءِ گڈ سرءُ بیستءُ یکمی کرنءِ بنداتی سالانی تہا بے معنویتءِ تہا کپتگ۔ سیمی نیمگءَ ماڈرنزمءِ بابتءَ اے گُشگ بیت کہ ماڈرنزم یک جمالیاتیءُ لبزانکی جُنزے کہ اے نُوزدہمی کَرنءِ گُڈ سرءُ بیستءُ یکمی کرنءِ بنداتی بیستیں سالانی تہا یورپءُ امریکہءِ بازیں لبزانکانی تہا چست بیت۔ ماڈرنزمءَ راجدپتری حسابءَ نوزدہمی کرنءِ گڈ سرءُ بیستمی کرنءِ بنداتءَ بنا کنگءُچارگءِ ہمراہیءَ ماڈرنزمءِ بازیں کواس ایشیءَ یک اسٹائلےءُ مئیلےءِ نامءَ یات کن اَنت۔ ہما کہ ماڈرنزمءَ راجدپترءِ ماہءُ سالانی تہا بند کنگءِ بدلءَ ایشیءَ یک مئیلءُ اسٹایل یے سرپد بنت پہ ایشاں ماڈرنزم یک ابدمانیں مئیلے کہ اے ہچبر ہلاس نہ بیت۔ ماڈرنزم یک لبزانکی دؤر، جُنز، مئیلءُ درشاندابےءِ ہمراہیءَ دگہ بازیں حسابےءَ چارگءُ تپاسگ بوت کنت۔ بازءِ گورا ماڈرنزم یک انٹرنیشنل مومنٹے، کسے گشیت، کہ یورپءِ مردم اچ وتی جندءِ کلچرءُ دودمانءَ تنگ بوتگاںءُ ایشاں افریقن، امریکن افریقن، ایشینءُ چینءِ کلچرءِ چیز زرتگ اَنتءُ ایشاں نوکیتءِ نام داتگ، دگہ لہتیں زانتکارانی حیالءَ ماڈرنزم ویکٹورین دؤرءِ ہلاپ اِنت یا چہ ایشیءَ سِدگءُ دُور بوہگءِ جارءَ جنت۔ ماڈرنزمءِ سرا بازیں ایراداں چہ چندیں ایراد ایش اَنت کہ اے انٹرنیشنل ازم، اشرافیہ، اسپت پوش، جنڈرءِ نیامءَ فرق کنگءُ یورپین امریکن سوچءِ پلہ مرز اِنت۔ بازیں مارکسسٹ، ماڈرنزمءَ یک آئیڈیالوجیءِ نامءَ دَینت پرچا کہ ماڈرنزمءِ منوگر زندءِ تہلءُ تُرپشیانی دیما مک بوہگءِ بدلءَ تچیتءُ وتی رکّینگءَ وتا وتی باتنی دنیاءِ میار کنت۔ پوسٹ کالونیل ملکاں ماڈرنزمءِ سرا ایراد پرے ہاترا گرگ بیت کہ اے جنزءِ منوگر لبزانکءَ چہ سیاست، زندمانءُ چاگردءَ چہ در کنگءِ پلہ مرز اَنت۔ ماڈرنزمءِ سرا اے درستیں ایراداں ابید، ماڈرنزمءِ بازیں کواس، ماڈرنزمءَ یک مئیلءُ جنزےءِ رنگءَ چارگءِ ہمراہیءَ ماڈرنزمءَ ماڈرنٹیءِ ہلاپءَ یک سیاسی، فلسفیانہءُ جمالیاتی پد کردے سرپد بنت۔
بیستءُ یکمی کرنءَ ماڈرنٹیءِ بانزلاں بلوچءِ زندمان چاریں نیمگءَ مانپتاتگ۔ ماڈرنٹیءِ بانزلانی تہا بلوچءَ بوہگی اِنت یا در کپگی اِنت؟ اے ہما جست اِنت کہ بیستءُ یکمی کرنءِ بلوچی لبزانک ایشیءَ گوں مَان اڑتگ۔ یک نیمگےءَ بلوچی لبزانکءِ یک گروپے ماڈرنٹیءَ وش اَتک کنگءَ د زگٹ اِنت۔ اے گروپ ءِ گلگ ہمیش اِنت کہ ماڈرنٹیءِ آہگءَ پد بلوچءِ زند چٹءَ بدل بوتگءُ ہمے بدلیءُ سدلیءَ ازمیءُ لبزانکی رنگءَ درشان کنگءِ واستہ مارا نوک نوکیں تجربہ کنگی اِنتءُ لبزانک ڈنی سپرءِ بدلءَ اندرءِ سپرءِ مسافر جوڑ کنگی اِنت۔ دومی نیمگءَ یک گروپےماڈرنٹیءِ بانزلاں چہ درکپگ لوٹیتءُ چریشیءَ چہ در کپگءِ واستہ ماڈرنزمءَ یک سلاہ یےءِ حسابءَ کارمرز کنگءِ حقءَ اِنت ۔ ہما کہ ماڈرنٹیءَ وش اتک کنگءِ حقءَ اَنت آ کئے اَنتءُ ہما کہ ہلاپ اَنت آ چے لوٹ اَنت؟ اے ہما سوال اَنت کہ من ایشانی پسوانی دیگءِ جہدءَ کن آں۔
بیستءُیکمی کرنءَ بلوچی لبزانکءَ ماڈرنزمءُ ماڈرنٹی:
مروچاں، بلوچی لبزانک یک ہنچیں چار راہ یےءِ سرا اوشتاتگ کہ اودءَ پہ ایشیءَ اے فیصلہ کنگ مشکل بوہگءَ اِنت کہ آ کجام نیمگءَ وتی دیما بدنت۔ ہمے چار راہ ءِ سرا یک نیمگےءَ ہما مزاحمتی، حقیقت پسندیءُ راج دوستیءِ لبزانک اِنت کہ آ وتی مزاحمتی تبءَ بالاچ گورگیج، رحم علی مری، گل خان نصیرءِ شاعریءِ تہا شوہاز کنتءُ ہستیں عہدءِ بدواہانی ہلاپءَ لبزانکءَ یک سلاہ یےءِ بستارءَ کار بندگ لوٹیت، دومی راہءِ سرا نشتگیں شاعرءُ ازمکار وتی کلاسیکءِ دیوانگ اَنت کہ ایشیءِ تہا ازم کار چہرءُ شبینءِکارمرزیءَ ہمینچو ارزشت دَینت داں دو ہمینچو وتی چاگردءُ زندمانءَ ہمگرنچ بوہگءُ ہمیشیءِ تہا وتا درانگاز کنگءَ ۔ سیمی راہءِ سرا نشتگیں مردمانی لبزانکی لیکہ وتا چہ وتی لبزانکی ربیتءَ چہ یاگی کنگ، لبزانکءَ یک آزادیں ادارہءِ جوڑ کنگءُ لبزانکءَ چہ سیاستءُ سیاسی پارٹیءِ نظریہءُ بیرکءَ چہ دور دارگءَ لانک بند اَنت۔ چارمی راہ، پوسٹ ماڈرنزم ئیگ اِنت بلئے ایشیءِ سرا بازیں چیز انگت نبشتہ بوہگی اِنت۔
بیستءُ یکمی کرنءَ ہما چار راہءِ سرا بلوچی لبزانک اوشتاتگ اے راہءِ پشتءُ دیما ماڈرنزمءُ مادڑنٹیءِ حیال ساھیل اَنت۔ پہ چندءَ ماڈرنزمءَ کانٹ پِرءُ اے پہ بلوچی لبزانکءَ تاوان یے۔ اے وڑیں مردمانی دلءَ بلوچ دنیگہ قبائلی ءُ باز جاہاں نیم قبائلی زند گوازینگءَ اِنت پمشکا نوکیءُ پد نوکی مئے گورا پہ زور جاہ گپت نکن اَنت (فہیم, 2019, صفحہ 17)۔ دومی نیمگءَ ہمے دورءَ چندیں ہنچیں زانت کار ہست اَنت کہ آ قبائلیءُ نیم قبائلیءِ جیڑہءَ کپگءِ بدلءَ ہمے گپءِ سرا دل گران اَنت کہ مۓ دؤرءَ ماڈرنزمءِ معنا ہنچو گونڈ کنگ بوتگ کہ بلوچی لبزانکءَ ماڈرنزمءِ بزانت چندے ءِگورا” ڈائری، وال کلاک، پینٹگءُ ٹیبلءِ نامءِ (مجاہد, 2010, صفحہ 12)آرگ اِنتءُ چندےءِ گورا” منی ساہ ما کُڈکءِ آخری کرزءَ درنج اِنت”ءَ سَر بوتگ۔ (مجاہد, صفحہ 12)۔اے درستیں ایراداں اَبید بلوچی لبزانکءَ مارا چندیں ہنچیں زانتکار ہم دست کپیت کہ آیانی دلءَ” مروچی وَ زمانگ مٹ اتگ، پگرءُ حیال مٹّ اِتگ اَنت، مردم آ نہ اَنت کہ زی بیتگ اَنت، اے زمانگءِ انسان نوکیں چستءُ ایرءُ جیڑہانی دیما اوشتاتگ ایشیءَ پہ وتءَ درشانءُ درنگازیءِ ردءَ نوکیں گپءُ گال، نوکیں چہرءُ شبین لوٹیت، داں اے وتی زمانگءَ جوان درشان بہ کنت” (داد, ”تنہا برو،تنہا نہ بے”)
بلوچی لبزانک ءِ تہاءَ ماڈرنزمءِ وش اَتک کنوکیں مردمانی توار درستاں چہ توانا اِنت۔ اے وڑیں مردمانی گلگ ہمیش اِنت کہ ” لبزانک اوشتوکیںءُ سیاہءُ سنگیں چیزے نہ اِنت کہ ایشیءِ تہا گوناپی مٹیءُ سٹیءُ تخلیقی تجربگ مہ بیت” (بُزدار, 2015)۔ پمشکا بلوچی لبزانکءَ یک رنگیں لچہ کاریءِ وانگ مردمءَ دم بُرتگ، ہما ” کمار چم”، “ہما” شپار مھپر”، ” کھیبءُ کرام” اَنت کہ دنیگہ اے زندءَ ہم گون اَنت۔ (داد, ”تنہا برو،تنہا نہ بے”) پہ ایشاں، بلوچی لبزانک اگاں دیمروی کنگ لوٹیت گڑا آ چہ گشگءِ بدلءَ چوں گشتگ ئےِءِ شوہازءَ در بہ کپ اَنت کہ اُودءَ آہانی بُنکی لوٹ لبزانکءَ چہ سیاستءُ زندمانءَ آجو کنگءِ ہمراہیءَ اے گپ ءِہم سدکی جوڑ کنگی اِنت کہ ازمکار کجام حدّءَ داں وتی درنگازیءَ آجو اِنت۔ ماڈرنزمءِ اے دابیں حیالءِ مستریں نام اے آر دادؔ اِنت۔ بلوچی لبزانکءَ اے آر دادؔ ہما نبشتہ کار اِنت کہ آئیءَ “بلوچی لبزانکءَ شعوری صورتءَ جدیدیت(ماڈرنزم)ءُ چیدگ نویسیءِ مئیل دیما آرگءِ جہد کتگ۔ (حسین, صفحہ 25)
دادؔ، ماڈرنٹی، ماڈرنزمءُ پوسٹ ماڈرنزم:
دادؔءِ گورا ماڈرنزم لبزانکءِ راجدپترءَ چست بوتگیں یک جنزے نہ اِنت بلکیں اے یک مئیلءُ درشاندابے۔ ماڈرنزمءَ یک جنزےءِ بدلءَ یک مئیلےءِ سرپد بوہگ آئیءِ ماڈرنزمءَ بودلیرءِ ماڈرنٹیءِ لیکہءَ گوں ہمدپ کنت۔ بودلیرءِ ماڈرنٹیءِ لیکہءِ نزیکءَ ازم کارءُ لبزانک کارءِ کار ہمیش اِنت کہ آ نوکیں چیزانی ہما نوک بوہگءِ سِنچ اِنت ہمیشیءِ شوہاز کار جوڑ بہ بیت؛ داں وہدے آ نوک نوکیں چیزانی تہا نوکیتءِ شوہازءَ دست گٹ بیت آئیءِ ازمءُ لبزانک داں زندگ اِنت کوہن نہ بیت۔ بودلیرءِ ماڈرنٹیءِ ہمدپ بوہگءَ گوں آ ازمی ساچستءِ ہمراہیءَ بلوچی لبزانکءِ راجدپترءَ ہم ہمے دابءَ چاریت۔ وہدے آ ماڈرنزمءَ یک مئیلءُ درشاندابے سرپد بیت کہ ایشیءِ اولی کار بدل بوہوکیں زندءِ نوکیتءِ شوہازءُ ہمیشیءَ بیدء ایرادءَ درشانیءِ پلہ مرز بیت گڑا آ ماڈرنزمءِ بابتءَ ہما حیالءُ لیکہءَ رد کنت کہ آ ماڈرنزمءَ ماڈرنٹیءِ ہلاپءَ چست بوتگیں یک جمالیاتی، سیاسیءُ فلسفیانہ پد کردےسرپد بنت۔ آئیءِ ماڈرنزمءِ بابتءَ اے وڑیں حیالءِ دارگءِ سبب آئیءِ ماڈرنزمءُ ماڈرنٹیءِ نیامءَ مانگیشگ اِنت۔ آ ماڈرنزمءُ ماڈرنٹیءِ نیامءَ ہنچو مانگیشیتگ کہ آ یک نیمگےءَ اے نبشتہ کنت کہ ماڈرنزم یا نوک رنگیءِ بابتءَ اےگپ راست نہ اِنت کہ نوک رنگی وتی کلاسیک یا کوہنیں لبزانکءَ نہ منّ اِیت۔ (حسرت, 2018, صفحہ 13) بلئے دومی نیمگءَ آئیءِ نزیکءَ ہرہما نبشتہ کارءُ شاعرءَ ما نوکیءِ نبشتہ کار گُشیں کہ وتی گوستگیناں چہ جتاءُ یکتا نبیسگءِ جہدءَ کنت (داد, ںوکی(جدیدیت) چی یے؟, صفحہ 22) ۔ آئیءِ ماڈرنزمءُ ماڈرنٹیءِ نیامءَ مانگیشگءِ سببءَ آ ماڈرنزمءُ پوسٹ ماڈرنزمءِ نیامءَ فرقءَ گیشینت نہ کنت۔ آ وتی نبشتانک، “پد نوکی(پوسٹ ماڈرنزم)ءُ بلوچی لبزانک”ءِ تہا اے گپءَ گیشینیت کہ بلوچی لبزانکءَ داں روچ مروچی ہچ وڑیں جُنزءُ مئیل چست نہ بوتگ۔ 1935ءِ دیمروی پسندیں جنزءِ اثر بلوچی لبزانکءِ سرا کپتگ بلئے، بلوچی لبزانکءِ دیمروی پسندانی گورا مارا ” یک رہبندے، گلے،ءُ یک پگرے دست نہ کپیت۔ بلوچی لبزانکءِ تہا ماڈرنزمءِ جنز چارگ بہ بیت گڑا مارا ایش چہ عطاشادءَ چہ بندات کنگ کپیت۔ عطاشادءَ چہ بندات کنگءَ ہم بلوچی لبزانکءَ ماڈرنزم یک جنزےءِ دروشمءَ دیما نئیت۔ آ پہ مثال ماڈرنزمءِ بندات بوہگءِ واستہ ڈی ایچ لارنسءُ ورجینا وولفءِ مثالءَ دنت۔ ڈی ایچ لارنسءِ نزیکءَ” اے 1915ءِ زمانگ اَت وہدے کوہنیں دنیا آسر بوت” ورجینیا وولفءِ نزیکءَ اے 1910 اَت کہ انسانءِ تب بدل بوت، ءُ ہما نزیکیءُ سیالی کہ پیشءَ چُکءُ مات، جنءُ مردءِ نیامءَ ہست اِت اَنت آسر بوت اَنت” (داد, پد نوکیءُ بلوچی ادب, صفحہ 38)۔آئیءِ نزیکءَ1910 یا1915ءَ یورپءِ تہا ماڈرنزم کئیت بلئے” بلوچی ادبءَ نوکیءِ تبءَ گوں روایرنندءِ اے لیکہءُ پگراں ہچ رنگیں نزیکیءُ بندوکی نیست”۔ (داد, پد نوکیءُ بلوچی ادب, 2009, صفحہ 37) ۔
آئیءِ نزیکءَ پوسٹ ماڈرنزمءُ ماڈرنزم کمءُ باز یکیں چیز اَنت، پہ آئیءَ ماڈرنزم، ” یک آزادی یے پہ نبشتہ کارءَ کہ آ وتی پگرءُ تبءَ گوں نبشتہ بکنت دگہ سیاسی پگرءُ لیکہءِ وازمندگ مہ بیت نہ کہ دگہ نیکراہی، شہزانتی پگرءُ لیکہ یے” (داد, نوک رنگی چے یے؟, صفحہ 10)۔ پوسٹ ماڈرنزم چو ماڈرنزمءِ وڑا” ادبءَ چہ درآئیں لیکہاں اذات کنگ لوٹیت” (داد, پد نوکیءُ بلوچی ادب, 2009, صفحہ 39) آئیءِ نزیکءَ پوسٹ ماڈرنزم بُندرءَ نوکیں زمانگ، نوکیں وہدءِ توار اِنتءُ اے توار ہچ رنگیں لیکہءِ منتوار نہ اِنت”۔ ماڈرنزمءُ پوسٹ ماڈرنزمءَ وتی وہدءِ توار سرپد بوہگءُ ہچ لیکہءِ نہ منگ آئیءِ ماڈرنٹیءِ ہستیں دورءِ درشانیءِ سرا بیسہ دارگ اِنت۔ آ وتی” نوک رنگی چے یے ؟”نوشتانکءِ تہا ماڈرنزمءَ نبشتہ کارءِ آزاتی، گوں وتا دیم پہ دیمیءُ سیاسی لیکہاں چہ آزاتیءِ نامءَ بیان کنت۔ پوسٹ ماڈرنزمءِ بابتءَ آ ہمے گشیت کہ پوسٹ ماڈرنزم انسانءَ نوک سرا چہ آذاتیں رنگےءَ چارگءُ تپاسگ، گوستگیں ہرچ کوہنیں رہبنداں پوچ سرپد بوہگ، نوکیں راہ، منزلےءِ مساپر بوہگءُ ” ہرچی کہ پیسرا ہست آ انسانءِ چاگرد بہ بیت کہ ازم، آ نوک چارگیءُ درانگازگی”ءِنامءَ یات کنت۔۔ (داد, پد نوکیءُ بلوچی ادب, صفحہ 41)۔
بلئے، آ وتی نبشتانک “پد نوکی( پوسٹ ماڈرنزم)ءُ بلوچی ادب”ءِتہا یورپی ملکاں چست بوتگیں ماڈرنزمءُ پوسٹ ماڈرنزمءَ دو ” گستائیں چیز” سرپد بیت۔ آئیءِ نزیکءَ یورپءِ تہا ماڈرنزم ہما دورءَ اتکگ وہدےءِ یورپءِ لبزانکاں وتا وجودی فلسفہءِ حسابءَ درشان کتگ۔ پوسٹ ماڈرنزم ہما وہدءَ کئیت وہدے یورپءِ تہا اے حیال چست بیت کہ انسانءِ ناامیتی، گم جتی، ایوکیءُ تہنایءِ درانگاز” نوں اودءَ کوہن بیتگ” اِنتءُ لبزانک وتا نوں” انسانءَ آذات سئیل کنگ لوٹیت” )ہمیش،تاکدیم،39)۔ آئیءِ نزیکءَ پوسٹ ماڈرنزم ” نوکیں تبے کہ آ اے گپءَ منیت کہ ” ہر راجءُ ملکےءِ ادبءَ آئیءِجندءِ رہبندانی پدءَ شرءُ ہراب گوشگ بہ بیت۔ پہ آئیءَ میاں استمانی رہبندے مہ بیت۔ پمشکا آءِ گورا مارا دائم اے حیال دست کپیت کہ بلوچیءِ شرگداری بلوچی کوہنیں شعرءِ تہا اِنت، بلوچءَ ” بلوچیءِ کوہنیں لچہ کاریءِ ہما رہبند شوہازگی اِنت کہ ما بزانیں بلوچانی گورا شریں ءُ ہرابیں شعر چونیں گپانی سرا اِنت”۔ ماڈرنزمءُ پوسٹ ماڈرنزمءِ بابتءَآئیءِ گشتگیں گپانی تہا نوٹ کنگءِ گپ ہمیش اِنت کہ ہما گیشتریں حاصیت کہ ماڈرنزم ئیگ اَنت گڑا ہما پوسٹ ماڈرنزم ئیگ اَنت۔ پوسٹ ماڈرنزمءُ ماڈرنزمءِ نیامءَ فرق نہ کنگءِ بنکی سبب آئیءِ ماڈرنزمءُ ماڈرنٹیءِ نیامءَ فرق نہ کنگ اِنت۔
اے آر دادؔءِ ماڈرنزمءُ ماڈرنٹی، ماڈرنزمءُ پوسٹ ماڈرنزمءِ نیامءَ مانگیشگءِ اثر بلوچی لبزانکءِ سرا ہم کپتگاں۔ آئیءِ ماڈرنزمءُ ماڈرنٹیءِ نیامءَ فرق نہ کنگءِ سببءَ بلوچی لبزانکءَ ماڈرنزمءِ بازیں منوگر یک ہنچیں ماڈرنزمءِ گپءَ جن اَنت کہ اے وڑیں ماڈرنزم ماڈرنٹیءِ رنگءُ دروشمءَ جن اَنت بلئے ہما ماڈرنزمءِ نہ کہ آئیءِ منوگر عطاشادءُ منیر مومن اَنت۔ ہما کہ اے آر دادؔءِ ماڈرنزمءِ پگرءِ منوگر اَنت پہ ایشاں نوکیت(ماڈرنزم)، ” وتی گوستگیں عہدءِ ربیتءَ پروشگ ہمک چیزاں رد کنگءُ ہمک چیزءِ تہا نوکی آرگ”ءِ نام اِنت۔ ماڈرنزم ءِ وتی گوستگیں عہدءِ ربیتءَ پروشگ، ہمک چیزاں رد کنگءِ بابتءَ اے وڑیں بازیں درور، بلوچستان اکیڈمیءِ جدیدیت تاکءَ جدیدیتءِ سرا نبشتہ کتگیں بلوچانی بازیں نوشتہ کارانی گورا دست کپیت۔ پہ مثال، جدیدیت تاکءَ، نوکی” جدیدیت” کجام اِنت،ءِ سرحالءَ نبشتہ کتگیں نبشتانکءِ تہا ن م دشتیءِ نزیکءَ یک “گدار نویس یا شاعرے ” ہما وہدءَ نوک بیت وہدے کہ آچہ گوستگیں دراہیں راہءُ رہبنداں جتا، نوکیں ساچست دیما بیاریت کہ پیسرگیں یا گوستگیں ساچستانی تہا نہ گواہیت گڑا آ نوکی جدیدیتءِ نبشتہ کار گشتگ بیت (دشتی, 2018, صفحہ 17)ن م دشتی ہمے نوشتانکءِ تہا اے آر دادؔءِ کتاب لبزانکی گالبندءِ حوالہءَ دنت کہ ایشیءِ تہا دادؔ ہمے گپءَ جنت کہ بیستمی کرنءَ اولی جہانی جنگءِ زمانگءَ ماڈرنزمءِ نامءُ توار آزمانءَ سر بیت، بلئے وہدے اتک کہ مردماں سما بوت نوکی نوں آسرءَ رسگی اِنت” بلئے چو نہ بوت بلکیں نیامی جنگءِ موسمءَ ہم نوکی وتی دِرکءُ دوران اَت۔ نوکی نوں یک جنزے (تحریکے) نہ اِنت، تبءُ مئیلے۔ اے آسر نہ بیت”)ہمیش،تاکدیم 17 )۔وہدءِ ماڈرنزم یک جنزے نہ اِنت تبءُ مئیلےءُ اے ہچبر آسر نہ بیت گڑا پوسٹ ماڈرنزمءَ چوں کن ئے؟ اے ہما جست اِنت کہ مارا لاچار کنت کہ ما بلوچی سیمی دؤرءِ لبزانکءَ ماڈرنزمءُ پوسٹ ماڈرنزمءِ شوہازءَ اے آر دادؔءِ ماڈرنزمءِ لیکہءِ بدلءَ دگہ یکےءِ نیمگءَ سر بہ کشیں۔ آئیءِ ماڈرنزمءِ لیکہءَ چہ سر کشگءَ پیش مارا یک برے اوشتگءُ چارگی اِنت کہ آئیءِ ماڈرنزمءِ لیکہءِ بنزہ کجام اِنت۔ آئیءِ ماڈرنزمءِ بنزہءِ زانگءَ چہ ما آئیءِ ماڈرنزمءِ نزوریءُ شریاں شر تر سرپد بوت کنیںءُ جوان تر زانت کنیں کہ آ بلوچی لبزانکءَ چہ چیءِ امیت وار اِنت۔
دادؔءِ ماڈرنزمءُ پوسٹ ماڈرنزمءِ بابتءَ لیکہانی پُشت در کجام اِنت؟
اے آر دادؔءِ بلوچی لبزانکءَ ماڈرنزمءُ پوسٹ ماڈرنزمءِ شوہازگءُ پدا اے بیان کنگ کہ ڈی ایچ لارنس، ورجینا وولفءِ حیالءَ 1910ءُ 1915ءَ یورپءَ چست بوتگیں ماڈرنزم ءِ بلوچی لبزانکءَ ساڑی نہ بوہگ ماڈرنزمءِ جنزءَ کسانیں رنگےءَ زُورگ اِنت۔ آئیءِ ماڈرنزمءِ یک دروشمےءِ پلہ مرز بوہگ آئیءِبلوچی شرگداریءُ شعریاتءِ شوہازگءِ ہما حیالءِ ہلاپ اِنت کہ اودءَ آ ہمے دلیلءَ دنت کہ بلوچی شرءُ ہرابیں شعرءُ ازمءِ شوہازءَ مارا یورپءِ نگدی ربیتءِ بدلءَ وتی کوہنیں شاعری وانگءُ دربرگی اِنت کہ ہمیشیءِ تہا مارا وتی شرءُ ہرابیں شعرءُ ازمءِ دروشم رست کن اَنت۔ آ وہدے نگدءُ شعریاتءِ شوہازگءَ وتی کوہنیں شاعریءِ رہبندانی زورگءِ پلہ مرز اِنت گڑا آ پرچا بلوچی لبزانکءَ ماڈرنزمءُ پوسٹ ماڈرنزمءِ شوہازگءَ بلوچی لبزانکءَ گوں بلوچءِ چماں نہ چاریتءُ ہمیشیءِ تہا بلوچی ماڈرنزمءِ شوہازءَ نہ کنت کہ اے وڑیں ماڈرنزم واقعی چو یورپءِ ماڈرنزمءِ وڑا نہ اِنت بلئے ایشانی گورا ہم مارا ماڈرنزمءِ ہما دروشمءُ رنگ رساں کہ چریشیءَ چہ ما گُشت کنیں کہ بلوچی لبزانکءَ بلوچاں ماڈرنزم چوں زرتگ۔
ماڈرنزمءُ پوسٹ ماڈرنزمءِ شوہازگءَ دادؔءِ چو نہ کنگءِ سبب دنیاءُ جہانءِ لبزانکی، سیاسیءُ دودمانی چستءُ ایرانی اثر اَنت۔ آئیءِ لبزانکی لیکہانی جوڑ کنگءِ مستریں دست بودلیرءِ چیدگ نویسیءُ ماڈرنٹیءِ لیکہ، ارسطوءِ بوطیقا، نیو امریکن کریٹی سیزم، اردو لبزانکءَ ترقی پسند جنزءِ ہلاپءَ چست بوتگیں اردو ماڈرنزمءُ اردو لبزانکءَ ساختیاتءُ پد ساختیاتءِ جنزانی دست مان اَنت۔ ارسطوءِ بوطیقاءِ لیکہءِ سببءَ دادؔ بلوچی لبزانکءَ “شاعریءُ ازمءَ جتاءُ آزاتیں بستارے دیگءِ جہد”ءَ دست گٹ اِنت۔ (داد, من چوں جیڑاِتگ, صفحہ 74) شاعریءُ ازمءَ جتاءُ آزاتیں بستار ہما وہدءَ رسیت وہدے راجمانےءِ تہا ہرچ علمءُ زانتءِ ادارگانی کارءُ کسب گیشینگ بہ بنت۔ آ چو ارسطوءِ وڑا اے گپءِمنوگر اِنت کہ شاعریءُ راجدپتر زانتیءِ تہا زمین ءُ آزمانءِ فرق اِنت ۔ ارسطو شاعرءَ دپتر زانتے( راجدپتر زانتے) سرپد نہ بیت کہ بس ہما چیزءَ بگوشیت کہ ہما وڑءُ ڈولءَ آئیءِ دیما سہرا اِنت (داد, من چوں جیڑاِتگ, صفحہ 77)ارسطوءِ نزیکءَ ابرمءُ قدرت باز جاہءَ نا سرجم اَنت، شاعرءِ کار ایش اِنت کہ آ وتی ازمءُ ہنرءَ گوں ایشیءَ زیباءُ سرجم کنگءِ جہدءَ کنت, (داد, من چوں جیڑاِتگ, 2017, صفحہ 77)دومی ھبرءَ، راجدپتر زانتءِ کار ہمیش اِنت کہ ہمائیءَ بگوشیت کہ گوستگ، شاعرءِ شعر” معنا داریں ساچستے بیت، یکے دورے ءِ نہ بیت، ہر دورءُ زمانگءِدرانگازی بیت (داد, من چوں جیڑاِتگ, صفحہ 87)
نیو امریکن کریٹی سیزمءِ دبستانءَ چہ اثر مند بوہگءِ سببءَ بلوچی لبزانکءِ تہا اے آر دادؔءُ رحمن مرادؔءِ گورا اولی رندءَ شاعریءَ راجدپتری پژردءِ بدلءَ شعرءُ ازمءِ ردءَ چارگءِ جہد بیتگ۔ اے دبستانءِ تہا آ شاعرءِ چاگردءُ زندءِ زانگءِ بدلءَ شعرءَ چارگءِ جہدءَ کن اَنت کہ اے راستیءَ شعرے یا شعرے نہ اِنت (داد, من چوں جیڑاِتگ, 2017, صفحہ 214)۔ نوکیں شرگداری یا نیو امریکن کریٹی سیزمءَ چہ پیش ساچشت چاگردی شرگداریءِ پدءَ چارگ بوتگ۔ چاگردی شرگداریءِ تہا ساچشتءِ اندرءُ ازمی پہناتءِ بدلءَ ساچشتکارءِ زندمان، چاگردی جاور چارگ بوتگنت۔ بلئے ،نوکیں شرگداری، چاگردی شرگداریءِ بدلءَ” اولسرءَ ہمیشیءَ چاریت کہ لچہ لچہے، لچہی لوٹءُ شعری لوٹ اِش پورا کرتگ اَنت کہ ناں۔ اگاں رندءَ آئیءِ زندءِ ایندگہ لوٹ چارگ بنت، دگہ گپے، بلئے شعرءِ اولی شرت ہمیش اِنت کہ چہر، شبین، گوناپ سازی، اے رنگیں ہنر اُودءَ چینچوہست۔ (داد, صفحہ 124)
ساختیات ءُ پد ساختیاتءِجنزانی اثر دادؔءِ سرا اے کپتگ کہ آ نبشتہ کارءِ مرگءِ جارءَ جنتءُ ٹیکسٹءِ تہا یک معناءُ مطلبےءِ بدلءَ دنیاءُ جہانءِ معناءِ شوہازگءِ پلہ مرز اِنت۔ اردو لبزانکءَ ماڈرنزمءِ ہلاپءَ چست بوتگیں ماڈرنزمءِ اثرانی سببءَ آ لبزانکءَ چہ سیاست، سیاسی پارٹیانی لیکہانی ہلاپ اِنتءُ ہر ہما شاعرءُ ازم کارءِ ازمءَ ایر جنگءَ ہچ چکءُ پد نہ بیت کہ آ سرظاہری یا چیروکائی لبزانکءَ سیاست، سیاسی پارٹیانی باجگزار جوڑ کنت۔
اے درستیں سبباں چہ مستریں سبب بودلیرءِ ماڈرنٹیءِ سرا بیسہ دارگ اِنت کہ ہمیشیءِ وسیلہءَ دادؔ جیڑیت، ساچشت ساچیت، نگد ءُ گپ کنت۔ بودلیرءِ ماڈرنٹیءِ لیکہءِ منوگر بوہگءِ سببءَ آ بلوچی لبزانکءَ ہما نوکیتءِ شوہازءَ اِنت کہ آ گوستگیں دؤرءَ چہ جِتا بہ بیتءُ نوکیءِ نامءَ ہرچ کوہنیں چیزانی ہلاپءَ لانک بہ بندیت۔آئیءِ بودلیرءِ ماڈرنٹیءِ سرا بیسہ دارگءِ سبب اِنت کہ آ ماڈرنزمءَ یک راجدپتری جنزےءِ بدلءَ یک مئیلےسرپد بیت۔ آئیءِ بودلیرءِ ماڈرنٹیءِ منگءِ سبب اِنت کہ آ ماڈرنزمءَ ماڈرنٹیءِ ہلاپءَ چست بوتگیں یک پد کردےءِ بدلءَ ہمیشیءِ درشانی سرپد بیت اِنت۔ بودلیرءِ ماڈرنٹیءَ وہدے آ بلوچی لبزانکءِ سرا فٹ کنت گڑا اودءَ آءَ ہچ وڑیں ماڈرنزم نہ رسیت گڑا آ اے گپءِ جنگءَ ہچ چکءُ پد نہ بیت کہ بلوچی لبزانکءَ ماڈرنزم نیست؛ وہدے ماڈرنزم نیست گڑا پوسٹ ماڈرنزم کجا شوہازگ بہ بیت۔
دادؔءِ ماڈرنزمءِ بیانیہءَ پروشگءِ جہد:
ماڈرنزمءَ چو دادؔءِ وڑا یک لبزانکی مئیلےسرپد بوہگءِ بدلءَ ایشیءَ ماڈرنٹیءِ ہلاپءَ یک جمالیاتی، فلسفیانہءُ سیاسی پد کردے سرپد بوہگءِ ماڈل اگاں بلوچی لبزانکءَ ماڈرنزمءُ پوسٹ ماڈرنزمءِ شوہازگءَ کارمرز بہ بیت گڑا مارا بلوچی لبزانکءَ ماڈرنزمءِ شوہازگءَ بازیں سر سر جنگ نہ کپیت۔ ماڈرنزمءَ ماڈرنٹیءِ ہلاپءَ یک پد کردے سرپد بوہگءِ پگر نہ تہنا مارا یورپءِ لبزانکءُ فلسفہءِ تہا دست کپت کنت ،بلکیں اے اردوءُ بلوچی لبزانکءِ تہا ہم مارا رسیت۔
اردو لبزانکءِ ماڈرنزمءِ تہا ماڈرنزمءِ ماڈرنٹیءِ ہلاپ بوہگءِ نشان مارا انتظار حسینءِ گورا دست کپت کن اَنت ۔
“The “modernist movement in Urdu fiction in India and Pakistan
ءِنبشتہ کارءِ نزیکءَ اردو فکشنءِ تہا ماڈرنزمءِ مستریں نام انتظار حسین اِنت۔ ہمے نبشتہ کار راجدپتری حسابءَاے گپءَ گیشینیت کہ اردو فکشنءِ تہا ماڈرنزم ۵۰ءِ دھکءَ پد کئیت اِنت۔ اردو لبزانکءَ ماڈرنزمءِ نشانیءَ آ” انورڈ ٹرن”ءِ نامءَ دنت (مطلب وتی اندرءِ پترگ، ڈنءِ بدلءَ تہءِ سپرءِ مسافر بوہگ)۔ ہمے نبشتہ کارءِنزیکءَ انتظار حسینءِ نبشانک، ناولءُ آزمانکانی تہا ہندوستانءِ بہرءُ بانگیءُ ہمے بہرءُ بانگیءِ سببءَ ہندوستانءَ چہ پاکستانءَ آہگءِ لڈءُ بار مستریں بُن گپ اَنت۔ انتظار حسینءِ نزیکءَ 1857ءَ انگریزانی گلامیءُ ہمے گلامیءِ نیامءَ صنعتی، ماڈرنائزیشنءَ پیش متحدہ ہندوستانءِ چاگرد گوں نیچرءَ ہم سنگ بوتگ؛ہندوءُ مسلمان یک پُرامنیں، برات دوستیں چاگردےءَ زند گوازینگءَ بوتگ اَنت۔ بلئے انگریزانی گلامیءَ پد، چاگردءِ گوں نیچرءَ ہمسنگی پروشیت؛ہندو مسلمانانی کُٹی کُٹی بنا بیتءُ ہما پیسرگیں ہم پتیءُ براتیءِ جاہءَ برات کُشی؛ پرشتءُ پروشیءُ بہرءُ بانگیءِ یک نہ کٹوکیں درچے بنا بیت۔ انتطار حسینءِ انگریزانی گلامیءُ مشینی دؤرءَ پیش ہندوستانءِ راجدپترءَ ہمسنگی، برابریءِ بنیادءَ چارگءُ پدءَ ایشانی آہگءَ رند پُرشتءُ پروش، جنگءُ چوپ، نظامءِ زندگیءِ ہلاسیءَ ویسٹرنائزیشن، جمہوریت، سیکولر ازمءُ مادیتءِ ذمہ وار سرپد بوہگ دو گپ پدر کنت: (الف) انتظار حسینءِ گورا ماڈرنزمءُ ماڈرنٹی دو جتایں ٹرم، دؤرءُ لیکہ اَنت۔( ب) انتظار حسینءِ نزیکءَ ماڈرنزم ماڈرنٹیءِ ہلاپءَ یک پد کردے۔۔ چوشیں ماڈرنٹیءِ ہلاپءَ اوشتگءِ ساعتءَ آ وتی نگاہاں ڈی ایچ لارنس، جیم جواسءُ کافکاءِ نیمگءَ کنت کہ آ ماڈرنٹیءِ مذہب دژمنی، گوست دژمنیءُ شہری زندگیءِ دم پہ ساعت بدل بوہوکیں وئیلءُ واقعانی ہلاپ اِت اَنت۔ چو ڈی ایچ لارنسءِ وڑا انتظار حسین ماڈرنٹی ءِ تیزیں رفتار، چیزانی دم پہ ساعت بدلی، دیمرویءِ بدلءَ وتا وتی گوستگیں دؤرءِ تہا گار کنتءُ ہمودءَ آرامیں، بدل نہ بوہوکیں زندءَ دم کشگءِ موہ رسیت۔ انتظار حسین مشینی دؤرءِ بے حسیں، بے معنایں زندگیءَ چہ در کپگءِ راہءَ وتی گوستءِ تہا شوہاز کنتءُ ہمے گوستءَ اساطیرانی وسیلہءَ مروچیگیں زندءَ معنا کنگءِ جہدءَ کنتءُ آ ماڈرنٹیءِ اے چیزاں چہ سر گوزگءِ علمی، ساچشتی عملءَ ماڈرنزمءِ نام دنت۔
بلوچی لبزانکءَ سیمی دؤرءِ اولی پدریچءِ شاعر عنقا، گل خان نصیر، عطاشاد، بشیر بیدار، مبارک قاضیءُ منیر مومنءِ شاعریءِ تہا مارا ماڈرنٹیءِ کالونیلزم، کالونیلزمءِ دستءَ جوڑ بوتگیں سرداری نظام، مشینی دورءَ مانگیشتگیں بلوچءُ بلوچءِ زندمانءَ آسءُ جساں دؤر دیوکیں ماڈرنٹیءِ دریءُ تہی طاقتانی ہلاپءَ یک مزاحمتے گندگءَ کئیت۔ بلوچءِ بازیں زانتکار(عنایت اللہ بلوچ، شاہ محمد مری،واحد بازردار) اے گپءِ سرا تپاک کن اَنت کہ کالونیلزم دؤرءَ بلوچءِ شاعراں وتی شعرانی تہا کالونیلزم، ویسٹرنائزیشن، کالونیل طاقتءِ کمکءَ حاکم جوڑ بوتگیں سردار ،میرءُ نوابانی ہلاپ وتی توار چست کتگ۔ سیمی دورءِ بلوچی لبزانکءِ ماڈرن شاعر، عطا شاد وتی نوشتانک، ” بلوچی شاعریءِ نوکیں مئیل”( دلءَبلین،تاکدیم35)ءِ تہا ہمے حیالءَ دیما کاریت کہ بلوچی لبزانکءَ بلوچ شاعرانی گورا سیاسی زانت کالونیل دؤرءُ زمانگءَ چست بوتگ۔ عطاشادءِ نزیکءَ دومی دؤرءَ پیش اولی دؤرءِ مستریں نام شے مرید اِ نت بلئے شے مرید وتی عہدءِ حاکم ءِ ہاکمیءِ ہلاپءَ سیاسی پد کرد پیش نہ داریت۔ دومی دورءِ تہا ملافاضلءُ رحم علی مری ہما شاعر بنت کہ آہانی گورا سیاسی زانت مارا دو رنگءَ دست کپیت: (الف) رحم علی مریءِ گورا کالونیلزمءُ کالونیل طاقتءِ ہلاپ بوہگءُ ایشیءَ تچک ءَتچکءَ بیان کنگءِ تب دیما کئیت(ب) ملا فاضل ، رحم علی مریءِ برہلاپ فارسیءُ تازی زبانانی ہلاپءَ چہرءُ شبینءِ زبانءَ وتی سیاسی مزاحمتءَ پیش داریت۔ بلوچی سیمی دورءِ لبزانک رحم علی مریءُ ملافاضلءِ سیاسی زانتءَ گامے دیما بارت۔ یک نیمگےءَ گل خان نصیر، آزات جمالدینیءُ اکبر بارکزیءِ وڑیں شاعر بنت کہ آ ماڈرنٹیءِ بلوچءُ بلوچستانءِ سرا کپتگیں اثرانی ہلاپءَ چو رحم علی مریءِ زبانءَ دیما کایاں بلئے آہانی شاعریءِ تہا تہی مارگ، زانتءُ مارشت کم اَت، پرے ہاترا آ ماڈرنٹیءِ ہلاپ بوہگءَ ابید ہم شریں وڑےءَ ماڈرنزمءِ تہا اتک کت نہ کن اَنت۔ دومی نیمگءَ عنقا، سید ھاشمی، عطاشادءُ کریم دشتیءِ وڑیں شاعر بنت کہ آ چو ملا فاضلءِ وڑا لبزانکءَ ڈنی چیزانی درشانیءِ بدلءَ تہی راہءِ مسافر کناںءُ کالونیل ازم، کالونیل ازمءِ جوڑ کتگیں نوک نوکیں ادارگ، ایف سی آر، جرگہ سسٹمءُسرداری نظامءِ ہلاپءَ چہرءُ شبینی رنگءَ وتی سیاسی زانتءَ پیش دار اَنت۔
ہشتادءِ دھکءَ پد بلوچی لبزانکءِ دو مستریں نام منیر مومنءُ اللہ بخش بزدار چو عطا، عنقا،سیدءُ کریم دشتیءِ وڑا دو کارءَ گٹ بنت۔ یک نیمگےءَ منیر مومن چو اردو ماڈرنزمءِ لبزانکءَ” انورڈ ٹرن”ءِ وڑا عطاشادءِسروکیءَ بلوچی لبزانکءَ وتی اندرءِسپرءَ دور دیگءِجہدءَ کنت کہ اودءَ ” ہر شعر یا لچہ کہ چرے آپسرءَ وتی کلیءَ آپ کنت تنی نہ بیت۔ (مومن، منیر، ماہکاں دوچے نودےءِشنزاں گوپتگیں) ،دومی نیمگءَ اللہ بخش بزدار چو بلوچی شعری ربیتءِ وڑا ماڈرنٹیءِ ہلاپءَ ہنچو پاد کئیت کہ اودءَ آئیءِ شاعری” ترقی پسندیں قوم پرستیءَ را وشیںءُ نازرکیں گوناپے و دروشمے دیگءِ جہدءَ دست گٹ بیت۔ (شاد, جنوری 2014, صفحہ 128)
دادؔءِ ماڈرنزمءِ بیانیہءِ پروشگءِ واستہ مارا منیر مومن کمک کت کنت۔ منیرمومنءِ گورا مارا ماڈرنزمءِ( ٹرن انورڈ) باتنءِتہا سر کشگءُ چر یشیءَ چہ وتی کلیءَ آپ کنگءَ چہ رسیت۔ وتی کلیءَ چہ باتنءَ آپ کنگءِ ساعتءَ آ اے گپءَ بے حال نہ بیت کہ باتنءِ سبزءُآبادی داں ہما روچءَ مانیت داں وہدے چاگردءُ زندمانءِ سیالی گوں باتنءَ ہلاس مہ بیت۔ پمشکا، منیر مومنءِ گورا مارا لبزانکءَ تہی زانتءِ چمگءَ دور دیگءِ ہمراہیءَ ماڈرنٹیءِ مشینی دورءِ ہلاپءَ پاد آہگءِ سیکن ہم رسیت۔ ہمے ہاترا منیر مومنءِ گورا مارا یکیں ساعتءَ دو چیز رست کنت۔ یک نیمگےءَ آ چو انتظار حسینءِ وڑا ماڈرنزمءُ ماڈرنٹیءِ نیامءَ فرقءِ گیشینگءِ جہدءَ کنت، دومی نیمگءَ آ ماڈرنزمءَ ماڈرنٹیءِ ہلاپءَ چست بوتگیں یک جنزےءِ رنگءَ چارگ لوٹیت کہ اے وڑیں گام بیستءُ یکمی کرنءَ بلوچی لبزانکءَ ماڈرنزمءِ بازیں منوگراں پہ زانت یا نا زانتی چست بوہگءَ پیش گٹ گیر کتگ ۔ منیر مومنءِ چو ازرہ پاونڈءِ “میک ایٹ نیو”ءُ ٹی ایس ایلیٹءِ کلاسیکءُ راجدپتری سنچ ءِ لیکہءِ پلہ مرز بوہگ اے گپءِ شاہدیءَ دنت کہ بلوچی لبزانکءَ کسے اگاں چیزے نوک گشگ بلوٹیت گڑا پہ آئیءَ میان استمانی لبزانک، مشینی دؤرءِ جوڑ داتگیں لبز، ہنچو ٹیلی فون، ریڈیوءُ موبائل ءِ لبزانی کارمرزیءِ بدلءَ وتی کلاسیک شوہاز کنگی اِنت۔ منیرءِ نزیکءَ عہدی دؤرءُ ہمے دؤرءِ شاعرانی مستریں شری چو انتظارحسینءَ ایش اِنت کہ اودءَ بلوچءِ کلچر گوں نیچر ءَ ہمگرنچ اَتءُ ہمے ہمگرنچیں کلچرءُ نیچرءِ تہ شعر گوشوکیں شاعر ہمے ہم پتیءُ تپاکیءِ بروردے اَت کہ آ ہمیشیءِ تہا بوتءُ وتا درانگاز کنگءَ دست گٹ اَت۔ چو انتظار حسینءِ وڑا، منیر مومنءِ حیالءَ بلوچی لبزانکءِ دومی دؤر ہما اِنت کہ اودءَ کالونیل طاقتانی زبانءُ دودمانءِ اثر بلوچءِ کلچرءَ گوں نیچرءَ ہمگرنچ بوہگءَ چہ سند اَنتءُ بلوچی لبزانکءَ بے گانگی، بے معنائیءُ گیگگانی ءِ زندانءَ دور دینت۔ سیمی دؤرءَ، یک نیمگےءَ مارا عطا شادءِ سروکیءَ، بلوچی لبزانکءَ یک برے پدا وتا نیچرءُ کلچرءَ گوں ہمگرنچ کنگءُ وتی ربیتءَ زندگ کنگءِ جہد گندگءَ کئیت ءُ دومی نیمگءَ عطا شاد بلوچی لبزانکءَ نوک نوکیں شعری بُنگپ، فارمءُ تکنیکءَ چہ آشنا کنت۔ ۔ بلوچی لبزانکءَ منیر مومنءِ “کلاسیک “ءِلیکہ ہمے پدر کنت کہ منیر مومن ہما ماڈرنزمءِ منوگر اِنت کہ اے وڑیں ماڈرنزم یک ہنچیں نوکی یے ءِگپءَ جنت کہ ایشیءِ بنزہ بلوچءِ کلاسیکءِ تہا اِنتءُ دومی اے وڑیں نوکیتءَ وتی کوہن بوہگءِ ہچ وڑیں ترس نیست کہ اے وڑیں ترس مارا بودلیرءِ ماڈرنٹیءِ لیکہءِ منوگرانی تہا گندگءَ کئیت۔
عطاشادءُ منیر مومنءِ ماڈرنٹیءِ ہلاپ بوہگءِ حیال بازیں جاہاں مارا رست کنت۔ اردو زبانءَ شنگ بوتگیں یک حال ترانے کہ اے “کلیاتِ عطاشاد : اب جب نیند ورق اُلٹے گی”ءِ تہا ہوار اِنت ایشیءِ تہ عطاشاد وتی شاعریءِ جمالیاتی، نیچرءُ بلوچءُ بلوچستانءِ نمائندگیءِ ہمراہیءَ اے گپءِ سرا ہم زور دنت کہ من وتی شاعریءِ تہا “استحصالی نظام، وڈیرہ شاہی، آمریت، سرداری نظامءُ زلمءُ زوراکی ءِ ہلاپءَ سک باز نوشتہ کتگءُ ایشانی ہلاپءَ نوشتہ کنگءِسببءَ گٹ گیر ہم کنگ بوتگاں” عطاشادءِ بلوچءِ نیشنلسٹ جہد کارانی وڑا سرداری نظامءَ کالونیل طاقتءِ جوڑ کتگیں ادارگے سرپد بوہگءُ ایشیءِ ہمراہیءَ آمریت، زلمءُ زوراکیءُ لبزانکءَ زندگیءَ گوں ہمگرنچ کنگءِ ساعتءَ عطا شادءِ تب چو ملا فاضلءِ وڑا اِنت۔ چو ناگمانءِ گیشینتگیں فرقءِ وڑا عطاشادءُ منیرءِ نیامءَماڈرنٹیءِ ہلاپءَ پاد آہگءِ یک فرقے ہمے بیت کہ ماڈرنٹیءِ سیاسیءُ راجمانی زلمءِ ہلاپءَ وہدے آ توار چست کنت گڑا آئیءِ توار ترند درا بیت بلئے منیر مومن وہدے ماڈرنٹیءِ سیاسیءُ راجمانی زلمءُ زوراکیءِ ہمراہیءَ ماڈرنٹیءِ معاشی نظام، مشینی دور، کیپیٹلزمءُ ٹیکنالوجیءِ ہلاپءَ پاد کئیت گڑا آئیءِ یکیں پناہ لبزانکءُ ازم جوڑ بنت کہ ایش آئیءِ زبانءَ ترندءُ تہلیءَ نیل اَنت۔ پمشکا، بیستءُ یکمی کرنءَ، بلوچی لبزانکءَ، منیر مومنءِ سروکیءَ، یک ہنچیں جہدےکنگ بوہگءَ اِنت کہ اے جہدءِ اولی منزل بلوچءِ زندمانءَ چہ مشینی دؤرءِ اثراں چہ رکّینگءُ بلوچءَ مشینے جوڑ بوہگءَ چہ دارگ اِنت۔ اے کارءِ ہاترا منیر لبزانکءَ یک پناہ یے، سنگرءِ جوڑ کنتءُ لبزانکءِ وسیلہءَ مشینی دؤرءَ بلوچءَ وتی کلاسیک، ربیتءُ دودمانءَ چہ یاگی بوہگءِ بدلءَ ہمیشانی تہا بوہگءُ ماڈرنٹیءِ مشینی دؤرءِ ہلاپءَ اوشتگءِ سکینءَ دنت۔ منیرءِ حیالءَ ماڈرنٹیءِ منوگرانی نوکیتءُ میان استمانی لبزانکءِ رندگیریءِ نامءَ وتا چہ وتی کلاسیکءُ گوستءَ چہ کشگءِ عمل عطاشادءِ ہما جہدءَ چہ یاگی بوہگ اِنت کہ آئیءَ نوکیتءِ بنزہ چو بودلیرءِ وڑا ہستیں دؤرءِ چیز یا فیشنءِ سرا ایر کنگءِ بدلءَ پہ وت وتی کلاسیک گچین کتگءُ ہمیشیءَ شر ترءُ نوک تر گشگءِ جہدے کتگ۔ ماڈرنٹیءِ نوکیتءِ بدلءَ اچ وتی کلاسیکءَ چہ نوکیتءِ شوہازءَ منیر مومن پرے ہاترا درکپگ لوٹیت پرچا کہ اے مشینی دؤرءَ بلوچءِ شنگءُ شانگیں ، پرشت پروشیں ءُ جنگ آماچیں زندءَ ماڈرنٹیءِ نوکیت بلوچءِ زندمانءَ گیش تر بہرءُ بانگی، ناامیتی، بے معنائی ودی کت کنت۔ منیرءِ حیالءَ مشینی دؤرءَ بلوچءِ زندمانءَ بیلنس کنگءَ کسے کمک کت کنت گڑا آ ہما لبزانک اِنت کہ اے وڑیں لبزانک وتا چہ کلاسیک چاگرد، زندمان، راجمانءُ سیاستءَ چہ سندگءِ حقءَ نہ اِنت۔ منیر مومنءِ ماڈرنزمءُ اے آر دادؔءِ ماڈرنزمءِ نیامءَ مستریں فرق ایش اِنت کہ منیر مومنءِ ماڈرنزم بلوچءِ پرشتءُ پروشیں راجی کیلواں مشینی دؤرءَ بیلنس کنگ لوٹیت بلئے اے آردادؔءِ ماڈرنزم پرشتءُ پروشیں راجی کیلواں نوکیتءِ نامءَ گیش تر پروشگ لوٹیت۔ منیر مومنءِماڈرنزم ماڈرنٹیءِ مشینی دؤرءِ نوکی، بدلیءُ سدلیءَ ایر جنتءُ ایشانی ہلاپءَ ماڈرنزمءَ یک سلاہ یےءِ حسابءَ کارمرز کنت۔ دومی نیمگءَدادؔءِ ماڈرنزم ماڈرنٹیءِ مشینی دؤر، مشینی دؤرءِ سببءَ بلوچءِ زندمانءَ اتکگیں بدلیءُ سدلیءَ وش اتک کنتءُ ہمیشانی درشانیءَ ماڈرنزمءَ پہ وت گچین کنت۔
بلوچی لبزانکءَ چو عطاشادءُ منیر مومنءِ وڑا ماڈرنزمءَ یک لبزانکی مئیلےسرپد بوہگءِ بدلءَ ایشیءَ ماڈرنٹیءِ ہلاپءَ یک پد کردےسرپد بوہگءَ گوں” بلوچی لبزانکءَ نوکیءِ تبءُ مئیلءِ در بگندے فاضلءِ زمانگءَ پچ بہ بیت یا بگندے چہ فاضلءَ پیش” (فراز، قاسم، نوکیں تبءُ مئیلءِشاعری،تاکدیم34 (۔ بلئے ماڈرنزمءِ ماڈرنٹیءِ ہلاپءَ پد کردءِ ہمراہیءَ ایشیءَ وتی باتنءَ چہ کلیءَ تر کنگءِ جنزےسرپد بوہگءَ چہ ما اے گشت کنیں کہ بلوچی لبزانکءَ شستءِ زمانگ ہما زمانگ اَت کہ اودءَ بلوچی لبزانکءَ ماڈرنٹیءِ ہلاپءَ ہم توار چست بوہگءَ اِنتءُ لبزانکءَ ‘انورڈ ٹرن’ءِ دیگءِ ہمراہیءَنوک نوکیں ازمیءُ فارمی تجربہ ہم ۔ پرے ہاترا ما گشت کنیں کہ شستءِ زمانگءَ عطاشادءِ سروکیءَ بلوچی لبزانکءَ ماڈرنزمءَ وتی روتگ چتگ اَنت۔ پرچا کہ عطا شاد ہما شاعر اِنت کہ آئیءِ گورا مارا ماڈرنٹیءِ ہلاپ بوہگءِ حیال ہم رسیتءُ لبزانکءَ تہی سپرءِ مسافر کنگءِ ہمراہیءَ ازمی تکءَ نوک نوکیں بُنگپ چہرءُ شیبنءِ کارمرزی ہم۔ عطاشادءَ پد، منیر مومن ہما شاعر اِنت کہ آئیءِ گورا مارا مشینی دؤرءِ ہلاپءَ چست بوہگءُ لبزانکءَ ہمے دؤرءِ دیما یک پناہ گاہ یے سرپد بوہگءِ ہمراہیءَ لبزانکءَ باتنءِ سپرءَ سر کنگ لوٹیت اودا” ہر شعر یا لچہ کہ چرے آپسرءَ وتی کلیءَ آپ کنت تنی نہ بیت۔ بلوچی لبزانکءَ ماڈرنزمءِ ماڈرنٹیءِ ہلاپ بوہگ ہما اولی شرط اِنت کہ ایشیءِ کمکءَ ما بلوچی لبزانکءَ پوسٹ ماڈرنزمءِ روتگءَ شوہاز کت کنیں۔ کسے اگاں چو دادؔءِ وڑا ماڈرنزمءَ ماڈرنٹیءِ ہلاپءَ چست بوتگیں جمالیاتی، سیاسیءُ فلسفیانہ جنزےءِ بدلءَ یک مئیلءُ اسٹائلے سرپد بہ بیت گڑا نے ما بلوچی لبزانکءَ ماڈرنزمءَ شریں وڑےءَ شوہاز کت کنیں نہ پوسٹ ماڈرنزمءَ۔۔۔ پوسٹ ماڈرنزمءِ شوہازگءِ اولی راہ ایش اِنت کہ کسے ماڈرنٹیءِ ہلاسیءِ جارءَ بجنتءُ پوسٹ ماڈرنٹیءِ بنا بوہگءِ شادکامیءَ در بئیت۔ وہدے دادؔءِ گورا ماڈرنزم یا ماڈرنٹی ابدمانیں چیز اَنت کہ ہچبر ہلاس نہ بنت گڑا پوسٹ ماڈرنزمءُ پوسٹ ماڈرنٹیءِ دؤر چوں بنا بیت؟۔ ہمے ہاترا داں بلوچی لبزانکءَ ماڈرنزمءِ شوہاز ماڈرنٹیءِ ہلاپءِ بوہگءِ بدلءَ ہمیشیءِ پلہ مرزیءِ رنگءَ چارگ بہ بیت بلوچی لبزانک پوسٹ ماڈرنزمءِ سیمسراں سر بوت نہ کنت ۔
آسرال:
بیستءُ یکمی کرنءَ بلوچی لبزانک ہما چار راہ یے سرا اوشتاتگ ایشیءَیک نوکیں راہءُ ڈائریکشنءِ دیگءَ اے آر دادؔءَ ماڈرنزمءِ جنز پہ وت گچین کتگ۔ آئیءِ ماڈرنزمءِ چماں گوں بلوچی سیمی دؤرءِ لبزانکءَ چارگءُ پدا اے جارءِ جنگ کہ بلوچی لبزانکءَ ماڈرنزم انگت سر نہ بوتگ، دو گپ پدر کنت۔ (الف) دادؔءِ نزیکءَ ماڈرنزم لبزانکءِ راجدپترءَ یک جنزءِ بدلءَ تبءُ مئیلےءِ دابءَ چست بوتگءُ ماڈرنزمءِ تبءُ مئیل داں زندگی ہست اِنت ہلاس نہ بیت۔(ب) دادؔءِ ماڈرنزمءَ تبءُ مئیلے سرپد بوہگ ہمے پیش داریت کہ ماڈرنزمءُ ماڈرنٹیءِ نیامءَ ہچ فرق نیست۔ دادؔءِ ماڈرنزمءِ بابتءَ اے وڑیں حیال دارگءِ سببءَ بلوچی لبزانکءَ آئی ءِ ماڈرنزمءِ منوگر اے گپءِگیشینگءَ ناکام اَنت کہ ماڈرنزمءِ وتی گوست، کلاسیک، زندمانءُ سیاستءَ گوں سیادی چی اِنت۔ ماڈرنزمءَ گوں ماڈرنٹیءِ چماں چارگءِ سببءَ بلوچی لبزانکءَ کسے اگاں بلوٹیت کہ ماڈرنزم کدی، چو کئےءَ آرتگ اے جستانی پسوءَ شوہاز کت نہ کنت۔ ماڈرنزمءَ گوں ماڈرنٹیءِ چماں چارگءِ سببءَ بلوچی لبزانکءَ روچ مروچی اے گپءِ گیشینگ مُشکل اِنت کہ ماڈرنزمءِ سیادی گوں پوسٹ ماڈرنزمءَ چی اِنتءُ انوگیں دؤرءَ کہ بلوچی لبزانک ساچگ بوہگءَ اِنت ایشانی تہا کئے ماڈرنسٹے،کہ پوسٹ ماڈرنسٹے۔ دادؔءِبلوچی لبزانکءَ ماڈرنزمءَ یک مئیل، اسٹائلےءُ ماڈرنٹیءِ نوکیتءِ پلہ مرزیءِ بدلءَ اگاں ماڈرنزم اے وڑا چارگ بہ بیت کہ ماڈرنزم ماڈرنٹیءِ ہلاپءَ چست بوتگیں یک جمالیاتی، فلسفیانہءُ سیاسی پدکردے گڑا اے وڑیں ماڈرنزم بلوچءِ تبءَ گوں ہمدپ اِنت۔ ماڈرنزمءَ ماڈرنٹیءِ ہلاپءَ پدکردےءِہمراہیءَ ماڈرنزم تہی سپرءِ لیکہءِ حسابءَ چارگ بہ بیت گڑا بلوچی لبزانکءَ شستءِ زمانگءَ ماڈرنزمءِ جنزہءِچست بوہگءِاثر مارا دست کپت کن اَنت۔ ماڈرنزمءَ ماڈرنٹیءِ ہلاپءَ لانک بندگءَ چہ کشگءُ ایشیءَ تہنا اندر، واب،فردی آزادیءُ اندری مارشتءِ درشانی سرپد بوہگءِ عمل بلوچی لبزانکءَ یک ہنچیں کئورےءَ دور دنت کہ ایشیءِ تہا کپگءَ پد اے حیالءِ دارگ ہم گناہ یے جوڑ بیت کہ لبزانک وتی زند، چاگرد، دودمانءُ زندمانءِ ازمی درشانیءِ نام اِنت۔ ماڈرنزمءَ ماڈرنٹیءِ ہلاپءَ چست بوتگیں یک جمالیاتی، فلاسفیانہءُ سیاسی جنزءِ سرپد بوہگءَ چہ بلوچی لبزانکءَ ماڈرنزمءِ منوگرءُ ہلاپی ماڈرنزمءُ ماڈرنٹیءِ نیامءَ فرق گیشینت کن اَنت بلکیں چریشیءَ چہ آہاں پوسٹ ماڈرنزمءُ ماڈرنزمءِ نیامءَ تپاوت کنگءَ ارزانی بیت۔
ماڈرنزمءُ ماڈرنٹیءِ نیامءَ فرق گیشینگءَ پد نوکیں پٹءُپول کارانی دیما اے ہم جست چست بوت کنت کہ ماڈرنزمءِ ماڈرنٹیءِ ہلاپءَ چست بوہگءِ عمل نوں وت یک ربیتےجوڑ بوتگ کہ چوشیں ربیتءِ پروشگءِ واستہا مارا دگہ لبزانکی جنزےءِ نیمگءَ گام جنگی اِنت کہ ایشیءِ وسیلہءَ آ نہ ایوکءَ ماڈرنٹیءِ ہلاپءَ اوشتات بکنت بلکیں ماڈرنزمءِ ہلاپءَ ہم۔ اے وڑیں پٹءُپول کارءِ دیما وہدےاے وڑیں جست چست بوت گڑا آ پوسٹ ماڈرنزمءِ لبزانکی جنزءَ ماڈرنٹیءُ ماڈرنزمءِ ہلاپءَ چست بوتگیں جنزءِ نگاہاں بچاریت۔ وہدے آ پوسٹ ماڈرنزمءَ ماڈرنٹیءُ ماڈرنزمءِ ہلاپءَ چست بوتگیں جنزےسرپد بیت گڑا پہ ایشاں اولی جست ہمے چست بیت کہ پوسٹ ماڈرنزمءِ بنزہ کجام اِنت؟ پوسٹ ماڈرنزمءِ بنزہاں شوہاز کنگءَ گوں آ نہ ایوکءَ ماڈرنزمءِ بازیں جنزاں چہ آشنا بوت کت کنت کہ اے وڑیں جنز ماڈرنٹیءِ ہلاپ بوہگءِ بدلءَ ماڈرنٹیءِ لیکہانی پلہ مرز بوتگ اَنت۔ پوسٹ ماڈرنزمءِ بنزہانی شوہاز کنگءِ ساعتءَ ماڈرنزمءِ نوکیں بنزہانی سرپدیءُ پدا ایشاں بلوچی لبزانکءَ سر کنگءِ عمل ماڈرنزمءُ پوسٹ ماڈرنزمءِ گپءُ ترانءَ نوکیں دابےءِ بخش اِت کن اَنت۔
سرشون:
بُزدار, واحد۔ (2015)۔ عطاشادءَپد۔۔۔قاسم فرازءِ نوکیں درشانداب, منی شیرانی دومی دپتر۔ تربت ،کیچ: اِستین شنگار کیچ۔
حسرت, راشد۔ (2018)۔ آدینک(10)(جدیدیت تاک)۔ تربت: بلوچستان اکیڈمی تربت۔
حسین, ساجد۔ (2014)۔ اے آر دادؔءِآزمانکاری۔ مستاگ(6), 25۔
دادؔ, اے ار۔ (2009)۔ پد نوکیءُ بلوچی ادب۔ بام۔
دادؔ, اے ار۔ (2017)۔ من چوں جیڑاِتگ۔ کراچی: سید ھاشمی ریفرنس کتابجاہ۔
دادؔ, اے ار اکتوبر تا دسمبر2012)۔ ںوکی(جدیدیت) چی یے؟۔ مستاگ( تاک3), 22۔
دادؔ, اے ار, ‘تہنا برو،تہنا نہ بے, منی چندے دستونکءُ لچہ۔
دادؔ, اے ار نوک رنگی چے یے؟۔ آدینک( جدیدیت تاک)۔
دشتی, م۔ (2018)۔۔ نوکی،، جدیدیت،،کجام اِنت؟۔ آدینک(جدیدیت تاک10), 17۔
شاد, شرف۔ (جنوری 2014)۔ درانگاز( تاک) (p۔ 127)۔ بل نگور: باقی بلوچ لابیری بل نگور، مکران۔
فراز, قاسم۔ (n۔d۔)۔ نوکیں تبءُ مئیلءِ شاعری، بام
فہیم, لالا۔ (2019)۔ کڑے بڑے۔ کراچی: علم و ادب پبلش اینڈ بُک سیلر۔
مجاہد, مجیب۔ (2010)۔ واتر نباں۔ گوادر: گام پبلی کیشنز گوادر۔
مہر ۔ رھیم۔ (2014)۔ دردءِ ناتوانی دلءَ ناتوان کنت۔ درانگاز(تاک۳), 6۔
مومن, منیر۔۔ ماہکاں دوچے نودےءِشنزاں گوپتگیں، منی چندے دستونکءُ لچہ
یارجان بلوچ کراچی یونیورسٹیءَ فلسفہءِ نودربرے ءُ لبزانکءُ فلسفہءَ گوں ھبءُ واہگ دار ایت ۔