قدیر لقمان
شیشہ کہ انگریزی زبان ءَ (کرسٹل میتھ) یا (میتھیمفیٹامین) گوٛشگ بیت، مردمی جوڑ کتگیں (چو ہیرؤن ءُ تریاک ءَ نہ کہ درٛچکے ءَ چہ پیداگ بنت) کیمیکل ءَ جوڑ بیت کہ چو شیشگ گونگیں رنگ اِنت ءُ وڑ وڑیں رنگ ءَ ہوں بوت کنت۔ تچکیں لبزاں ایش کہ شیشہ یک انچیں نشہ ئے کہ مردمی جوڑ کتگیں کیمیلے کہ چہ ایفڈرین ءَ جوڑ بیت ۔
آپ رنگ ءَ ابید دگہ رنگاں ہوں بوت کنت، چوشکہ زرد چکیں، مالٹا رنگیں،ناسی ئیں یا شکرو ئیں۔ اے چو گولی وڑ ءَ ہوں نزّآرگ بیت۔ ایشی ءِ لس رنگ وَ سادہیں شیشگ یا آپ رنگ ءَ کئیت، پمیشکہ ایشی ءَ کرسٹل میتھ ءَ ابید عربی ءَ شیشہ ، انگریزی ءَ برف( آئیس) ءُ دور رودراتکیں ایشیاءَ شابو ہم گوٛش انت۔( پاکستان ءِ اے دگہ جاگہاں چوش کہ کراچی ءُ خیبر پختونخواہ ءَ برف( آئیس) گوٛش انت ئِے۔
’میتھ یک آپ رنگیں نشہ ئے کہ مردم ایشی ءَ شونک اَنت ، کشّ اَنت یا سوچن ءَ کن اَنت ءُ جن اَنت۔ لہتیں وَ انچو وارت ئِے،بلئے دُرست کنگ ءِ یک ترٛندیں واہشتے پیداگ کن اَنت ، پرچہ کہ اے نشہ یک درٛوگیں وشّی ءِ سنچے پیداگ کنت ءُ وت باوری ، برز تب ءُ ہاٹی ءِ عجبیں مارشتے دنت۔ اے سنچ ءُ واہشت مردم ءَ ردیں راہ ءَ سر گرین اَنت ءُ وتی واہشت ءُ واہگانی پیلو کنگ ءِ بے رہبندیں پارست سوج دئینت۔ اے وڑیں ردیں کارراجمان ءُ ملک پہ ہردوئیناں تاوان انت‘۔
بُن گَپّ
شیشہ ءِ مستریں تاوان ذہن ئیگ اِنت
شیشہ ذہن ءَ یا سرَگ ءَ نیوروٹرانسمٹر ڈوپامائین (نیورو ٹرانسمیٹر ڈوپامائن) ءِ کشّگ ءِ سوب جوڑ بیت کہ یک عجب رنگیں وشّی یا اشتاپیں مارشتے پیداگ کنت ۔ اے ہوں لازم اِنت پہ زانگ ءَ کہ انسان انچیں بر بیت کہ پہ شادہی انچیں کار کنت، چوش کہ موسیقی ءِ گوش دارگ، ویڈیو لئیبے ءِ کنگ یا وش تامیں ورَگ ءِ ورگ ہوں ابرمی حساب ءَ کسانیں قدّ ے ءَ ڈوپامائین پیداگ کنت کہ انسان ءَ وشّی ءِ مارشت ءَ دنت، ءُ باز براں کہ وہدے کسانیں چک یا کسّے کہ ہمے ویڈیو لئیب یا انچیں دگہ کارے ءِ عادت ءَ چنت، آئی ءِ سبب ہم ہمیش اِنت کہ زیادئیں لئیب ءَ یا ہما کار ءِ کنگ ءَ اے ڈوپامائین ءِ مقدار انچو ودّیت کہ ذہن ءَ اِشّی ءِ طلب بار بار بیت۔
بلئے، شیشہ یک دم مزنیں مقدارے دنت ذہن ءَ کہ اشّی ءِ طلب ہم سک بیت۔ پمیشکہ وہدے شیشہ ءِ کارمرزگ ءَ پد ذہن کسانیں کچّءِ ڈوپامائین ءَ سیر نہ کنت یا بئے نہ کنت، پمیشکہ اشّی ءِ نہ رسگ انسان ءَ دلپرٛوشی ءِ نیمگا بارت کہ پدءَ انچو مجبور بیت کہ دگہ کارے بہ کنت ، تاوانے بہ دنت ، دزّی ئے یا انچیں دگہ کارے کہ شر مہ بیت، پرچہ کہ شیشہ ءِ نیاد ہم باز اِنت ءُ انچو زرّ ءِ شوہاز ہم گران اِنت۔
شیشہ ءِ اے دگہ تاوان
شیشہ وراک ءَ کم کنگ ءُ بے وابی ءَ ابیدپہ انسانی جان ءَ ہوں تاوان اِنت۔ ایشی ءِ داتگیں تاواناں ہواریں نقص
کسانیں وہد ءِ تاوان
بے وراکی
حون ءِ زور ءِ برز بوہگ
چمّ ءَ ساہی ءُ نزور ترّگ
بے وابی
دل ءِ بز بوہگ
جزباتی بوہگ یا زوت زہر گرگ
وہم کنگ
رویہ ءِ پرٛوشت ءُ پرٛوش
تاں دیراں داشتیں تاوان
حون ءِ زور ءِ دارگ تاں کہ دل ترٛہک بوئگ یا مِرگ
جگر،گُٹّگ ءُ پُپّانی حرابی
ساہ کشّگ ءِ جیڑہ
دنتانانی سڈگ
دلپرٛوشی
شیشہ ءِ راجدپتر
شیشہ ءِ نشہ ءِ درٛاجیں راجدپترے۔ اے چہ برلن ءِ ہمبولڈ مزن شاہدربرجاہ ءَ ماں نوذدہمی قرن ءَ بندات بیت، وہدے 1871ءَ جاپان ءِ سرکار وتی اوّلی فارمیسٹیکل داکترے، نگاہی ناگایوشی ءَ برلن ءَ پہ وانگ ءُ دربرگ ءَ دیم دنت۔ آئی ءِ عمر آ وہد ءَ 25سال بیت۔اے ہما وہد اَت کہ کیمسٹری ءِ زانت ءَ اِنچو دیمروئی نہ کتگ اَت ءُ پٹّ ءُ پولکار نوک نوکیں چیز در گیجگ ءَ اِت انت کہ رند ترءَ پلاسٹک ، کھاد، فارمیسس، ترٛاک ءُ دگہ ہزاراں انچیں چیز یا کہ پہ لوگ ءِ کاراں کار داتگیں، جوڑ بہ بیت۔
ناگایوشی استاد آگسٹ ویلہم یون ہوفمن ءِ چیر دستی ءَ وانگ ءَ دیم دیگ بوت کہ آ وتی نودربراناں یک لیبارٹری ئے ءَ لکچر دیگ ءُ شر پہمینگ ءُ پلانٹ کمپاؤنڈ ءَ حاصیں دلچسپی زورگ ءَ میاں استمانی نامے کٹّگ ءَ اَت۔ ہوفمن ءِ چیر دستی ءَ ہمبولڈ مزن شاہدربرجاہ ءَ مارا انوگیں متھ مفٹیمین (میتھیمفیٹامائنز)، پیٹروکیمیکل ءُ نوکیں جوڑ کتگیں کیمیکل رنگ داتگ اَنت۔
1919ءَ آکرا اوگاٹانامیں یک دگہ جاپانی کیمیادانے ءَ کہ پہ وانگ ءَ برلن ءَ اَت، کرسٹل میتھ ءِ جوڑ کنگ ءِ ارزان ترءُ زوت تریں وڑے درگیتک۔ آئی ءَ ایفیڈرین ءِ جوڑ کنگ ءِ ناگایوشی ءِ وڑءَ را زُرت ، بلئے سُہریں فاسفورس ءُ آؤڈینے گیش کت کہ ہمے آسرآپ رنگیں نکانے ءِ شکل ءَ جوڑ بوت۔
اوّلی مزن جنگ ءِ ہلاسی ءَ ماں 1919ءَ جاپان ءَ سپاہیگ، فیکٹری کاردارءُ اے دگہ کاری آنی سرءَ گیش چہ گیش شیشہ کارمرزگ بنا کت کہ اے گیش پہ بے وابی ءُ دم نہ برگ ءِ واستہ کارمرز بیت۔
رند ترءَ،اے گیشتریں رنگ ءَ جوڑ کنگ بوت، چوش کہ گولی ءِ شکل ءَ، ماں سوچن ءَ، ءُ دگہ۔ حتٰی کہ 1942ءَ ایڈوف ہٹلرءَ ہوں وہد ءِ سرءَ میتھ آئی وی ءِ سوچن کارمرزیتگ، کہ آئی ءِ داکتر تھیوڈور مورلءَ جتگ اَنت۔ ہمے شیشہ دومی مزن جنگ ءَ سک باز کاربندگ بوت کہ سپاہیگاں گیشتر آگہ بوئگی اَت ءُ دم برگی نہ اَت۔ جاپان ءِ سرکار ءَ سکّیں مزنیں تعدادے ءَ کرسٹل میتھ جوڑ کتگ ءُ اسٹورکتگ اَت۔
جنگ ءِ ببا دیگ ءَ پد، جاپانی سرکار ءِ امبار لس مہلوک ءِ دزرس ءَ بوت اَنت ءُ شیشہ ءِ مزنیں کچّے لس مہلوک ءَ کار مرز اِت۔
داں 1960ءَ وہد ءِ ہمرائی ءَ مٹ بوتگیں وڑءُ ڈول ءُ دزرسی ءَ کرسٹل میتھ بزاں شیشہ ءَ گیش ءَ چہ گیش مہلوک متاثر کت ءُ جاپان ءَ بگر داں امریکہ ءُ اے دگہ مزنیں ملکانی مردم اِش وتی امبازاں زرت اَنت۔نوں گیشتر اثرمند بوتگیں ملک گوں امریکہ ، زرباررودرتکی ایشیا ، جاپانءُ چین شیشہ ءِ ہلاپ ءَ قانود سازگ ءَ اَنت ءُ ایشی ءِ گرءُ دارءَ اَنت۔
ما اگاں بیائیں اے ملک ءَ ، پاکستان ءَ انوگ ءَ تاں اثر مند بوتگیں دمگ ءُ استان، گیشتر خیبر پختونخواہ ءُ بلوچستان اَنت ءُ کسانیں حدّے ءَ کراچی ءِ دمگ اِنت( گیش ہما نیمگ ءَ کہ بلوچ نشتگ اَنت)۔ پاکستان ءَ پترگ ءِ ارزان تریں روٹ چہ اوگانستان ءُ ایران ءَ گیِشّ اَنت کہ اے دوئیں ملکاں گوں ہواریں ڈسٹرکٹ گیشتر ہمے نشہ ءِ تہا کپتگ اَنت۔ حاص کہ بلوچ ہلک ءُ دمگ، خاران، پنجگور، کیچ ءُ گوادر ءِ کساسیں حدّے ہمے نادرٛاہی ءِ آماچ اَنت۔
پیسر ءَ ، پاکستان ءِ سرکار ءَ شیشہ ءِ بوئگ نہ منّیتگ، (لس زبان ءَ شیشہ ءَ نوک رنگیں چلیمے کہ بازیں تامیں گڈاکو ءَ گوں کشّگ بیت، ءُ گیش بیچلر پارٹی ءُ مزنیں مردمانی دیوان ءَ گندگ بیت،نام داتگ) ، بلئے 28نومبر2012ءَ ما ں ڈی ایچ اےاپارٹمنٹ بخاری کمرشل ءِ نزّءَ کراچی ءَ کہ ترٛاکے ءِ آواز اِش کنگ بوت ، پولیس ءَ ہمے پہم اِت کہ اے ناشرکاری اُرشے کہ چمے راہ ءَ محرم ءِ روانک رؤگ ءَ اَت۔
وہدے ہمے بلڈنگ ءِ سر ءَ پولیس چھاپہ جنت، تا گندیت کہ اودءَ میتھ ءِ جوڑ کنگ ءِ کسانیں پلانٹے ہست ءُ شیشہ جوڑ کنگ بوہگ ءَ اِنت۔ پدءَ محرم ءِ روانک دارانی کوکار ءُ جھگّہاںءُ پولیس ءِ پریس کانفرنس ءَ پد بازیں حالتاک ءُ ٹی وی چینلاں ہمیشی ءِ سرءَ رپورٹ نشر کت۔ نوں اے نوکیں نشہ دیم ءَ اتک ءُ منّگ بوت کہ ادءَ سر اِنت۔
شیشہ ءِ نشہ آماچیں مردمانی کساس
اقوام متحدہ،راجانی ہواریں گل ءِ نشہ ءُ جدول ءِ کارگسءِ ردءَ سرجمیں دنیا ءَ ہمک سال 500مٹرک ٹن میتھمفیٹمین ہواریں ڈرگ جوڑ بیت کہ 24.7ملین(یک ملینے 10لکّ اِنت) کشّوک اَنت ئِے۔ امریکہ ءِ سرکار ءَ ماں 2008ءَ رپورٹ کتگ اَت کہ 13ملین مردم چہ 12سال ءَ برُز ءِ کشّوک اَنت، کہ آہانی تہا 529,000دائمی کشّوک اَنت۔ 2007ءَ ماں امریکہ ءَ 4.5درسد مستریں وانگ جاہانی نودربر ءُ 4.1درسد دہءِ قدّ ءِ نودربر کم چہ کم یک رندے وتی زند ءَ شیشہ کنگ ءَ رپورٹ کنگ بوتگ اَنت۔
شیشہ چِک ریپبلک ملک ءَ ہوں مزنیں جیڑہے۔ اودءَ اے پرویٹِن گوٛشگ بیت ءُ مزنیں لیبارٹریاں کم ءُ کسان کسانیں لوگی لیبارٹریاں سک زیادہ جوڑ کنگ بیت۔ اشّی ءَ تچک ءَ وتی کارمزرگ ءِ واستہ جوڑ کن اَنت، بلئے مرچاں انچیں رپورٹ ہست کہ یورپ ءِ دگہ ملکاں ءُ کینیڈا ءَ ہم دیم دیگ بوئگ ءَ اِنت۔ چِک ریپبلک، سویڈن، فِن لینڈ، سلواکیہ ءُ لٹویاءَ 20تاں 60درسدہماہاں رپورٹ بنت کہ چرے نشہ ءَ چُٹّگ لوٹ اَنت۔
زرباری رودراتکیں ایشیا ءَ شیشہ ءِ لسّیں گونگ گولی ئیگ اِنت کہ تھائی لینڈ ءَ یابا فلپائین ءَ شابو گوٛشگ بیت۔
مردم پرچہ شیشہ ءِ نشہ ءَ کن اَنت؟
شیشہ کنگ ءِ سبب ءِ زانگ ءِ واستہ مزنیں ملکاں پٹّ ءُ پول بوتگ ءُ لہتیں سبب دیم ءَ آرگ بوتگ ۔ چوش کہ مئے ہلکاں یا ملک ءَ چشیں پٹّ ءُ پولے نیست کہ ما بہ زانیں کہ مئے ہلکاں اشّی ءِ سبب چی اَنت۔ پرچہ کہ مئے راجمانی تب دگرے ءُ اے دگہ ملکانی دگر۔ پہ درور، مئے کرّءَ نشہ سر ء عام رسیت، چو وردن ءِ سامان ءَ ، بیزورگاری ءُ پرٛشت ءُ پرٛوش لہتیں انچیں سبب اَنت کہ بلکیں دگہ ملکاں نیست اَنت یا ہست اَنت ، بلئے کسانیں حدّے ءَ۔ بلئے پدءَ ہوں ، لہتیں انچیں سبب ہست کہ گوں مئے جاوراں ہم دپ اَنت یا نزّیک اَنت۔ ءُ لہتیں انچین اَنت کہ منّگ بنت۔
وت علاج کنگ
لہتیں کنوک شیشہ کنگ ءَ ساری لہتیں انچیں ذہنی ءُ جانی نادراہیانی آماچ بنت، چوش کہ بے واکی، دلپرٛوشی، جذباتی بوئگ، بدن درد یا انچیں دگہ، کہ آ وتی علاج ءَ شرّیں ڈاکٹرے ءِ بدل ءَ وت کنگ لوٹ انت یا بوت کنت کہ نہ زان اَنت چہ کجا سوج بہ گراَنت ءُ چون اشانی علاجی بیت۔ سنگتے اگاں وت نشہ بہ کنت، آ ہمے سوج ءَ دنت کہ نشہ بہ کن گوں ، تئی علاج بیت۔ آ پہ وت ءَ چوش کن اَنت کہ کشّوکے گیش بیت، آہاں پائدگ اِنت۔
دلمانگی ءُ چاگردی ڈول
بازیں براں انچو بیت کہ مردمے چہ وتی سنگتاں مجبور بیت یاآہانی نشہ کنگ ءِ ڈول ءَ دلمانگ بیت یا ہماہانی وڑءَ نشہ مہ کنت، چراہانی نیمگ ءَ آوڑیں لفٹ ءُ رائٹے نہ رسیت ئِے پمیشکہ آنشہ کنت۔ وہدے تہہ ءِ پتریت، پدءَ دراہگ گران اِنت۔
وپت ءُ واب ءِ گیشی
دنیا ءِ بازیں دمگاں شیشہ کنوک اشّی ءَ پہ وتی وپت ءُ وابی واہشتانی گیش کنگ ءِ واستہ ہوں کار مرز اَنت۔ پرچاکہ اشّی ءِ کارمرزگ ءَ وپت ءُ وابی واہشت ودّاَنت، بلئے اے زیادہی آئی ءَ ردیں راہے ءَ ہم بارت، ایچ آئی ویءِ نادراہی ءَ بگر داں زردوئی ءَ درا، اے بازیں وپت ءُ واب ءَ بندوکیں نادراہی ہوں دنت۔
مردم ءَ را توانگر ءُ نہ ترس کنگ
اے نشہ مردم ءَ را توانگر ءُ نہ ترس ہم کنت، کہ اے نیوروٹرانسمٹرز یلہ دنت کہ ذہن ءَ ہاٹی دیئنت کہ اے ڈڈ بوئگ ءِ مارشت ءَ ہوار یک دلیری ئے ودی کنت، بلئے اے انسانی جان ءِ نظام ءَ حراب کنت کہ پدءَ بید ء اشّی ءَ مردم دلپرٛوشی (ڈپریشن)ءِ آماچ بیت، ءُ پہ اِشی ءِ دزرسی ءَ ردیں کاراں ہواربیت۔
لہتیں دگہ سبب
لہتیں دگہ سبب ہم بوت کن اَنت، چوشکہ وزن ءَ کم کنگ یا انچو دپ وشّی ءُ پکنک ءُ پارٹیاں ہوں کارمرزگ بیت ، حاص ڈنّی ملکاںءُ دگہ لہتیں ذاتی سببے ہم بوت کنت کہ تجربگ ءَ نیاتکگ۔
گڈسرءَ،شیشہ ءِ نشہ کہ اِنچو ودّیتگ ءُ اشّی ءِ دگہ یک ارزانیں آسراتی ئے ایش اِنت کہ اے انچو لوگے ءَ کسانیں پلانٹے ءَ ہوں تیار کنگ بیتءُ چشیں مزنیں حرچ ءُ درچے ہم پکارنہ اِنت ئِے ، پدءَ، اے نشہ ءِ چو ارزانی ءُ اے ملک ءِ راجمانی پاہازگ ءِ حرابیں ترتیب ءَ اے گیشتر بیمناک کتگ۔ انچو سما بیت کہ شیشہ آؤکیں وہدءَ چہ ہیرون ءَ ہم گوٛزیتءُ گیش ءَ چہ گیش تاوان دنت، پمیشکہ اے المّ اِنت کہ اشی ءِ گرءُ دار بہ بیت۔
Discover more from Balochistan Affairs
Subscribe to get the latest posts to your email.