بلوچ نیشنل موومنٹ کے مرکزی ترجمان نے اپنے بیان میں کہا کہ بلوچ نیشنل موومنٹ کا دسواں قومی کونسل سیشن بنام شہید ڈاکٹرمنان بلوچ اور شہدائے بلوچستان کامیابی سے اختتام پذیر ہوا۔پارٹی انتخابات کے نتیجے میں نئی کابینہ اور سینٹرل کمیٹی کے ممبران کا چناؤ عمل میں لایا گیا۔
انہوں نے کہا ڈاکٹرنسیم بلوچ چیئرمین، ڈاکٹرجلال بلوچ سینئر وائس چیئرمین ، بابل لطیف بلوچ جونیئروائس چیئرمین،سیکریٹری جنرل دل مراد بلوچ، سینئر جوائنٹ سیکریٹری جنرل کمال بلوچ ، جونیئرجوائنٹ سیکریٹری جنرل حسن دوست، فنانس سیکریٹری ناصر بلوچ، انفارمیشن و کلچر سیکریٹری قاضی داد محمد ریحان، ویلفئر سیکریٹری ماسٹر ظفر، خارجہ سیکریٹری ھمل حیدر اور ناظر نور ہیومین رائٹس سیکریٹری منتخب ہوئے۔
ترجمان نے کہا مذکورہ کابینہ اور سینٹرل کمیٹی کے ممبران آئندہ چار سال کے لیے قومی کونسل سیشن کی طرف سے دی گئی ذمہ داریوں پر کام کریں گے۔
ترجمان کے مطابق بی این ایم کے قومی کونسل سیشن میں بلوچستان کے تمام اضلاع اور بیرون وطن مقیم بی این ایم کے قومی کونسل کے لیے منتخب 79 کونسلران نے شرکت کی۔
ترجمان نے کہا بی این ایم کے قومی کونسل کی صدارت پارٹی چیئرمین خلیل بلوچ نے کی جس میں پارٹی کا آئین، پارٹی امور اور آئندہ کی حکمت عملی، ملک ، خطہ اور بین الاقوامی صورتحال کا جائزہ اور تنقیدی نشست میں خودتنقیدی کے اصول پر پارٹی کی گذشتہ کارکردگی کے مثبت اور منفی پہلوؤں پر سیرحاصل گفتگو کی گئی۔
بیان کے آخر میں کہا گیا نومنتخب کابینہ پارٹی اور بلوچ قوم سے عہد کرتی ہے کہ قومی کونسل سیشن کے فیصلوں کی روشنی میں بی این ایم کو ادارہ جاتی بنیاد پر مضبوط بنایا جائے گا۔
بلوچستان کی قومی آزادی کے لیے برسرپیکار تمام تنظیموں سے مکتبہ فکر کے اختلاف کی موجودگی میں بھی تعلقات کی بحالی اور قومی مفاد میں مشترکہ جدوجہد کے لیے ٹھوس کوششوں کا آغاز کیا جائے گا۔اتحاد اور تنظیم کے درمیان توازن کو برقرار رکھتے ہوئے قومی امنگوں کے مطابق تمام بلوچ قوتوں کو ایک سمت میں رکھنا بی این ایم کے منشور کا حصہ ہے۔
Discover more from Balochistan Affairs
Subscribe to get the latest posts to your email.