کوئٹہ:
بلوچستان حکومت کے ترجمان لیاقت شاہوانی نے واقعے میں دو پولیس اہلکاروں کی ہلاکت کی تصدیق کی ہے۔
انہوں نے بتایا کہ دھماکے میں پولیس وین کو نشانہ بنایا گیا جس میں 15 پولیس اہلکار سوار تھے۔
پولیس کے مطابق اتورا کی شب تقریباً آٹھ بجے کوئٹہ کے علاقے زرغون روڈ پر سرینا ہوٹل کے قریب پولیس وین میں بلوچستان کانسٹیبلری کے اہلکار اپنی ڈیوٹی پر مامور تھے کہ قریب کھڑی موٹرسائیکل میں دھماکہ ہوا۔
دھماکے کی اطلاع ملتے ہی سیکیورٹی فورسز اور ریسکیو ادارے فوری طور پر جائے وقوعہ پر پہنچ گئے۔ فورسز نے علاقے کو گھیرے میں لے لیا جس کے بعد امدادی سرگرمیاں شروع کر دی گئیں۔
پولیس کے مطابق ہلاک ہونے والوں میں بلوچستان کانسٹیبلری کے اہلکار نیاز احمد سیلاچی اور علی اکبر شامل ہیں جب کہ زخمی ہونے والے 21 افراد میں پانچ پولیس اہلکار ہیں۔ البتہ اسپتال ذرائع کے مطابق دھماکے میں زخمی ہونے والے افراد میں سے تین کی حالت تشویش ناک ہے۔