رجانک: علی گوہر
پیش ءُ گیشاں ہست ات یک غریب ءُ نیزگاریں موچی ئے کہ آئی ءَ پازوار ءُ کوش دوتک ءُ زند ءِ کہریں روچ تیلانک دات اَنت۔ آئی ءِ کٹّ ءُ کمائی ہمنچک ات کہ مرگاں گو٘ری آئی ءَ را بس یک وہدے ءِ نان پہ ورگ ءَ رس ات، بلے آ انگت چہ کلاں شادان تر اَت۔ چہ کار بوج ءَ رند آئی ءَ لوگے ہم نیست ات کہ ہمود ءَ بہ روت ءُ وتی گرمے سارت بہ کنت۔ بزاں آئی ءِ ہنکین ءُ بنجل ہما کڈک ات کہ ہمود ءَ کوش ءُ پازوارئِے دوتک۔ بلے ہردیں کہ آئی ءَ وتی کار ہلاس کت، گڑا روچ برکت ءَ پیسر آئی ءَ انچیں ڈولدار ءُ شادانیں سوتے جت کہ گوشداروکاں دست دپ ءَ کت۔
ہمے موچی ءِ کُڈّک ءِ نزیک ءَ یک سیر ءُ ہزگاریں مردے ءِ ماڑی اَت، کہ ہمک شپ ہمے وش ءُ ڈولداریں سوت آئی ءِ گوشاں کپت۔
موچی ءَ ہردیں کہ ہمے سوت الہان کت گڑا ہمے سیر ءُ ہزگاریں مرد حیران ءُ اُبّکہ بوت ءُ گوں وت درّائینت:
’’اے موچی انچو غریب ءُ نیزگار اِنت کہ تانسریں روچ ءَ کار کنگ ءَ پد باریں چے پیم نانے رسیت ئِے۔بلئے آ انگت چہ من شادان تر اِنت وہدیکہ من سُہر ءُ تِلاہانی واہنداں بلے چو گل نہ آں‘‘۔
گڑا ہمے ہزگاریں مرد ءَ فیصلہ کت کہ موچی ءَ گْوٛشاں منی لوگ ءَ دعوتے ءَ بئیت۔
موچی ہمے ہزگاریں مرد ءِ گْوٛشگ ءِ پد ءَ آئی ءِ ماڑی ءَ دعوت ءَ شُت، گڑا مرد ءَ چرآئی ءَ پُرس اِت:
’’من زاناں تو سکّ وار ءُ نیزگاریں مردمے ئے، بلے ہر شپ چہ تئی الہان کتگیں
سوت ءَ ہمے پدّر بیت کہ تو سکّ گل ءُ شادان ئے،من ءَ اے بابت ءَ سرپد بہ کن‘‘۔
موچی ءَ پسہ دات ’’من پمیشا گلاں کہ توامیں روچ ءَ کار ءُ حزمت کناں۔ وتی نان ءَ در گیجاں۔ یکے ءَ کہ نان بہ بیت پہ ورگ ءَ، پچ بہ بیت پہ پوشگ ءَ، گڑا آ مردم ءَ را اے دنیا ءَ دگہ چی ءِ حاجت بیت؟‘‘۔
موچی ءِ چرے پسہ ءَ ہزگاریں مرد سکّ حیران بیت ءُ چرآئی ءَ پرس اِت۔
’’تئی ھیال ءَ ترا گیشتر زرّ ءُ مال بہ بیت گڑا تو شادان تر نہ بَئے؟‘‘۔
موچی ءَ پسہ دات ’’ہَو‘‘۔
گڑا ہمے ہزگاریں مرد موچی ءَ را پنچ ءُ شش ھِشت تلاہ دنت کہ تئیگ اَنت۔
تِلاہانی رسگ ءِ اولی روچ ءَ موچی ءَ وتی دل ءَ گوٛشت:
’’ اگاں دزے منی لوگ ءَ بُہ پُتِریت ءُ منی تِلاہاں بہ بارت بزاں من پد ءَ ہما واریں مرد باں‘‘۔ پمیشہ چَمے تُرس ءُ بیم ءَ بازیں شپ ئِے پہ آگہی روچ کنت۔ ہما شادمانیانی تام کہ چد ءُ پیش آئی ءَ رسیتگ ات، نوں پہک ہلاس ءُ گار بوتگ ات۔ پمیشہ آئی ءِ سوت ہم اشکنگ نہ بوت۔
گڑا موچی ءَ گوں وت جیڑ اِت ءُ درّائینت ’’ اے سُہراں بدل ء وشی من ءَ را پہک گمیگ کت ءُ نادرٛاہی یے دات۔ پمیشہ پمن ہما پیش ءِ وار ءُ نیزگاریں موچی بوئگ گہتر اِنت کہ پہ وت روچے ءِ نان ءَ در بہ گیجاں ءُ پد ءَ ہما گل ءُ شادانیں سوت ءَ بہ الہاناں‘‘۔
پد ءَ آئی ءَ دُرٛستیں سُہر بُرت ءُ ہما ہزگاریں مرد ءِ ماڑی ءَ ہمائی ءِ دست ءَ دات اَنت ءُ پِر تَرّ اِت۔
گڑا آ پد ءَ گوں وتی پیشی کار ءَ مشکول بوت ءُ شپاں وش ءُ شادانیں سوت ءَ را الہان ات ئِے۔
کسہ کار:۔ ابیبا شیبی را۔
اے کسہ من چہ ‘جین بہروڑ ءِ شوہاز اِتگیں افریقہی کسہانی کتاب (افریکن فولک ٹیل) ءَ رجانک کتگ۔(رجانکار)
Watch Latest Videos
