انور عجب مارشتے ءَ ماں پتاتگ اَت ۔ آئی ءَ وتی سرا بد اتک، ساہ ئِے زُرت نہ کت۔ آئی ءَ گُمان بوت کہ اے بدیں بوہ چہ آئی ءِ تہا پیداگ اَت۔ ہر روچ نوک ءُ بدتریں بوہے اَت۔ روچے گوٛش ئے مُرتگیں مُشکے ءِ بوہ اَت، روچے گوٛش ئے سڑیتگیں جناوری جونے ءِ۔
انور ءِ مستریں واہشت وشبوہانی بوہ چِنگ بوتگ۔ آئی ءَ مدام وشبوہیں پُل ، نیبگ ءُ دار بوہ چِت اَنت۔ آ مدام بازار ءِ تہلگیانی دُکاناں شُت ءُ ہما تہلگ ءُ درمان کہ وشتریں بوہے کت، زُرت ءُ بوہ ئِے چت اَنت۔ آئی ءَ ٹیکی جاہاں سینٹ ءُ لوشن چار اِت انت، وتی حاص ءُ ناسیں دوچے ءَ دوتکگیں دزمال ءَ لگاشت اَنت۔ لوگ ءَ کہ اتک، دزمالے پونز ءَ اَت۔ ہر ہما چیز کہ وشیں بوہ ئِے کت، دوست اِت ئِے۔ آئی ءَ چہ وتی سئیں تروہاں ہما تُرو کہ مرد ئِے مشکت ءَ اَت، دوستر اِت ئِے۔ حالانکہ اے دوئیں ترو زر ءُ دولت ءَ وشحال تر اِت انت ءُ دوئیں دلمانگ اِت انت کہ انور آہانی زامات بہ بیت۔ پمیشکہ، آہاں انور ءِ باز حیال داشت، بلئے انور ءَ ہما تُرو دوستر اَت کہ وہدے مردئِے ملک ءَ اتک، آئی ءَ وش وشیں بوہ ءُ باس گون اَت۔
انور ءَ تاکچنڈ پمیشکہ دوست نہ اَت کہ اے موسم ءَ چیز ، درٛچک ءُ دارانی ہمراہی ءَ مردمانی بوہ ہم کم ترّ اِت، زمستان پہ انور ءَ ہمے وڑ نہ وش اَت۔ بلئے، گرماگ ئِے سک وش بوت۔گرماگ ءَآئی ءِ رنگءُ دانگ ءُ دیم ءِ نور ءُ جلوہ ہم ودّ اِت۔ آ کہ وہدے آدینک ءِ دیم ءَ اوشتات، تاں دل ءِ اتک کہ اے وشرنگی ءُ وش نودی ہمے سارت ءُ وشیں بوہاں داتگ۔آئی ءَ مدام ہما مردم دوست بوت کہ وشتریں بوہ ئِے کت۔
انور ءَ مدام جنک بوہ چِت اَنت، آہاناں دگہ ہچ نہ کت۔ آ وش اَت کہ جنک وشیں بوہ کن انت۔ بازار ءِ مردم ہم انور ءَ زانان اِت انت۔ اوّل سرا لہتیں مردماں نَہ وشّی درشان کت، بلئے بازار ءِ ہچ چشیں جنکے ءَ گوٛاہی نہ دات کہ انور ءَ کسّے ءِ گوما سُبّکی کتگ یا کسّے ءَ بدیں چمّے ءَ چاریتگ۔ میزاں میزان ءَ مہلوک ءِ زہر ایر اتک اَنت۔
یک روچے ناگت ءَ انور ءَ سبزکیں بچکے ءَ ڈِیکّ وارت کہ آ چہ دُور ءَ اتکگیں مردمے سما بوت۔ آ چہ دنزاں مین اَت۔ انور ءِ دل ءَ اتک کہ دُور ءَ اتکگیں مردم باریں چونیں بوہ کن انت۔ بلئے، ڈِیکّ وارتگیں مرد ءِ جُستاں انور بے تاہیر کتگ اَت ءُ آ بوہ ءَ نہ کپت ءُ وتی جندئِے کشّ اِت۔
انور ءَ بازیں پٹّ ءُ پول ءَ پد حال رس اِت کہ آ ہمے بازار ءِ آ دست ءِ مردمے اَت ءُ ہما روچ ءَ کہ انور ءَ دیستگ اَت، ہما اَت بازار ءَ گندگ نہ بوت۔ کمّے وہد گوٛست۔ روچے انور کہ بازار ءَ دراتکگ اَت، آئی ءِ پونز ءَ وشتر ءُ سارت تریں بوہے کپت۔ آئی ءَ کش ءُ کرّ ءِ مردم چار اِت انت، درٛچک ءُ دار چار اِت انت، بوہ چت اَنت۔ دُرس ہما وڑ اِت انت کہ بوتگ اَنت، بس گوٛات مٹّیتگ اَت۔ انور ءَ پہ ہما گاریں مرد ءَ اومان بوت ءُ پاداں مجبور کت کہ آئی ءِ لوگ ءَ در بہ گیجیت۔ آ ہمینچو نزیک تر روان بوت، اے بوہ ہمینچو ودّان اَت۔ انور ہیدے ءَ سَر کتگ اَت۔ ہما گاریں مرد ءِ لوگ ءِ رسگ ءَ انور ءَ دیست کہ مُچّی ئے اَتءُ مردمانی رؤآ اَت۔ مردم وڑ وڑیں گپ جنگ ءَ اِت انت، بلئے آئی ءِ پہم ءَ ہچ نیاتک۔ ہما مرد ءِ لوگ ءِ کسانیں زنگی ئیں گیٹ ءِ دپ ءَ چوَٹی تاہے ءِ گندگ ءَ گوں انور دیم پہ ہمائی تچگ ءَ لگّ اِت۔ وشبوہ ءَ بوہ پد داتگ اَت۔ انور ءَ مار اِت کہ بوہ چرا چوَٹ ءَ پیداگ اَت۔ چوَٹ ءَ حُشکیں حونی ٹپ پر اَت۔پُشترا گوٛشئے لہتیں جناوری پد اِت انت۔ انور حیران ءُابکہ ءَ اَت ءُ اناگہ انور دیم پہ وتی لوگ ءَ تچگ ءَ لگّ اِت۔ انور ءَ چوَٹ ءِ تاہ پجّاہ آؤرتگ اَت۔
ہما روچ ئیگ اَت کہ انور ءِ آ ملّگ ءُ داب ہلّان بوت۔ وش نیتک گل بوت اَنت ءُ آئی ءِ دوزواہ بی تاہیر۔ آئی ءَ کسّ ءَ نہ گُوٛشتگ اَت گوں کہ نوں آئی ءَ وشیں بوہ دوست نہ بیت۔ آئی ءَ وتی ہما دوچی ئیں دزمال مرچاں گون نہ اَت۔
یکّے ءَ گوٛشت چیر ترّیتتگ۔
یکّے ءَ گشت کہ کسّے ءَ دُزّیتگ۔
یکّے وش اَت کہ دزمال ئِے گون نہ اَت۔
بلئے، انور ءَ کسّ ءَ حال نہ داتگ اَت کہ آئی ءَ دزمال چون کتگ اَت۔
آ مرچاں تہلگی لین ءُ ٹیکی جاہاں گندگ نہ بوت۔
لہتیناں گوٛشت کہ انور مرچاں شرّ نہ اِنت کہ لوڈیانی دمک ءَ یلہ اِنت۔
یکّے ءَ وتی ایمان داتگ اَت کہ من انور ہیرونیانی گوما گپّ ءُ دیوان ءَ دیستگ۔
وڑ وڑیں گپ ترّگ ءَ اِت انت۔ آئی ءِ سنگتاں ہوں کسّ ءَ نہ گوٛشتگ اَت کہ انور ءَ چی اَت۔
مرچاں انور کم گندگ بوت، آ چہ لوگ ءَ کم دراتک۔ آئی ءَ چہ جنیناں بدیں بوہے بوت۔ ہما جنک ءِ حیالاں ہوں آئی ءَ را تاہیر نہ دات کہ آئی ءِ بوہے چہ دُرائیں مردمانی بوہاں وشتر بوتگ اَت۔ آ پولنگ اَتءُ ساہ ءِ کشّگ ءَ بے وار اَت۔ کدی کدی انچو مار اِت ئِے کہ کسّے ءَ آئی ءِ گُٹ داشتگ ۔ آ سک بے تاہیراَت۔
۔۔۔ انور ءِ مرگ ءِ حال اُستاہے ءَ گون اَت۔ آئی ءِ جون روچے ءَ پد کَور ءِ نزّیک ءَ اُستاہانی میتگ ءِ سوتکال ءُ گیمرتگیں درٛچکانی تہا گندگ بوتگ اَت۔
Discover more from Balochistan Affairs
Subscribe to get the latest posts to your email.