ھیومن رائٹس کمیشن آف پاکستان ریجنل آفس، تربت مکران ءِ کوآرڈینیٹر غنی پرواز ءَ گوں وتی مکران ءِ سجہیں جنین و مردیں آدمیں کارکنیں ھمراہاں مرچی یک بیانے داتگ ءُ بانک نورجان فضل ھوشاپی ءِ ناجائیں دسگیر کنئگ ءُ قید کنئگ ءُ بلوچی زبان ءِ شاعر حبیبہ پیرجان نذرآبادی ءِ آوار جنئگ ءُ گار و بیگواہ کنگ ءَ را گوں ترندی ءَ ایر جتئگ ءُ ھردکانی زوتاں زوت یلہ دئیگ ءِ لوٹ کتئگ۔ آئی ءَ گشتگ کہ چدو پیسر ایدگہ سکیورٹی فورسزاں بلوچ ورنا، چُک، پیرین ءُ جنیں آدمانی زوریں آوار جنئگ، گار و بیگواہ کنئگ، کشئگ ءُ دور دئیگ ءُ ایدگہ غیر قانونی، غیر انسانی ءُ غیر اخلاقی چست و ایرانی وسیلہا مکران، بلوچستان ءُ بلوچ چاگرد ءِ جاور چہ کچ ءَ ءُ گیشتر ھراب کتئگ انت ءُ بلوچانی واستا آہانی جند ءِ سرزمین ءُ چاگرد چہ دوزہ ءَ گندہ تر کتئگ انت، وھدیکہ نوں سی ٹی ڈی ءَ یک ھنچیں غیر قانونی، غیر انسانی ءُ غیر اخلاقی درچے بنا کتئگ کہ مکران، بلوچستان ءُ بلوچ چاگرد ءِ جاوراں چہ پیشی ءَ ھم گندہ تر کنئگ ءَ انت۔ دیمترا آئی ءَ گوں بلوچستان ءِ صوبائی سرکار، پاکستان ءِ بنجائی سرکار، سجہیں ملک ءِ عدلیہ ءُ ایدگہ واکداریں ادارہاں دزبندی کتئگ کہ آ توکا بکپ انت ءُ سی ٹی ڈی ءُ ایدگہ سکیورٹی فورسزاں سرپد بکن انت ءُ نورجان فضل ءُ حبیبہ پیرجان ءَ زوتاں زوت یلہ بدیائین انت ءُ سجہیں گار و بیگواہیں بلوچاں زاہر بکنائین انت ءُ یلہ بدیائین انت۔ ءُ بلوچانی غیر قانونی، غیر انسانی ءُ غیر اخلاقی دزگیری، آوار جنئگ ءُ گار و بیگواہ کنگ ءُ کشئگ و دور دئیگ ءِ دراجیں چر ءَ بند بکنائین انت۔ ءُ گوں بلوچاں انساف بکن انت۔ تاکہ مکران، بلوچستان ءُ بلوچ چاگرد ءِ جاور شرّ و شرتر بہ بنت ءُ بلوچ چو ایدگرانی پیم ءَ یک ھلکاپیں زندے گوازینت بکن انت۔
Latest on YouTube