بلوچ اسٹوڈنٹس ایکشن کمیٹی ملیر ھنکین ءِ ھنکینی لس دیوان برجم دارگ بُوتگ، رضوان بلوچ ھنکینی کارمستر ءُ گُلاب بلوچ ھنکینی کارگشاد گچین کنگ بُوتگ اَنت۔
بلوچ اسٹوڈنٹس ایکشن کمیٹی ملیر ھنکین ءِ ھنکینی لس دیوان ھنکین ءِ گْوَستگیں کارمستر نورخان بلوچ ءِ پاگواجھی ءَ برجم دارگ بوتگ، دیوان ءِ ھاسیں مھمان بُنجائی کمیٹی ءِ باسک سلیم بلوچ ءُ گچینی مھمان بُنجائی کمیٹی ءِ باسک شیراز بلوچ بُوتگ اَنت۔
دیوان ءَ بنجاھی سرکولر ، ھنکینی گوستگیں اھوال، شرگداری،گل کاری، ھندی ءُ میان اُستمانی سیاسی جاورھالءَ پد آؤکیں گامگیج ءِ بُنگپانی سرءَ تران بیتگ۔
دیوان ءَ بُنجائی سنگتاں تران کنان ءَ گْوَشت کہ ما ہما ادارہ ءِ بھریں کہ مئے سرءَ راج ءِ ورنایانی مزنیں اُمیتے بندوک اِنت ءُ مئے مدُام جُہد بیتگ کہ ما راج ءِ اُمیتانی سرءَ بوشتیں۔ سیاست تچکیں راہ ئے ءِ پیمءَ نہ اِنت بلکیں وڈ وڈیں پیچ ءُ تاباں گوں بندوکیں عمل ئے۔ سیاست ءِ تہ ءَ مُدام جہلی ءُ بُرزی کایئنت بلے مارا ہرچ وڈیں جاورانی دیمءَ اوشتگی اِنت ءُ دورچاری ءَ گوں وتی مکسد ءِ پیلو کنگءِ ہاتر ءَ جُہد برجاھ دارگی اِنت۔
بلوچ چاگرد ءَ ورنا وانگی انتظامی جیڑہاں اوار جتائیں ایدگہ راجمانی جیڑہانی ہم آماچ اَنت۔ دومی نیمگءَ بلوچ وتی ڈیھ ءِ کجام ہم ھند ءَ نشتگ اُود ءَ زند گوازینگ ءِ بُنکی آسراتیاں چہ سرجم ءَ زبہر کنگ بوتگ۔ بُنکی جیڑہانی آماچ کنگءَ اوار روکپتی بلوچستان ءَ بگر داں رودراتکی بلوچستان ءَ بْیا بلوچ ءِ کُشت ءُ کُوش یکشل ءَ برجاہ اِنت ءُ پہ بلوچ ءَ زِند گوازینگ روچ پہ روچ گران کنگ بُوگ ءَ اِنت۔
بُنجائی سنگتاں دیمتر ءَ تران کنان ءَ گْوَشت کہ ملیر ءِ تہ ءَ گِندگ بیت کہ ورناہانی مزنیں کساسے وانگ ءَ چہ گِستا اِنت ءُ کسان کسانیں کارے ءَ گوں وتءَھمگرنچ کُتگ ءُ وتی زِند اِش ھمے داب ءَ برجاہ داشتگ اشی ءَ چہ بلوچ چاگرد نپری سوچ ءِ تہ ءَ روگ ءَ اِنت کہ اشی ءِ گِرءُدار المی اِنت۔ ملیر ءَ بلوچانی مزنیں کچے آباد اِنت ھمے میتگاں وانگجاہ نیستی ءِ ھساب ءَ اَنت ءُ بازیں وانگجاہ کہ ہست اَنت آ پہ زور جیڑہانی آماچ کنگ بُوتگ اَنت۔ بلوچ میتگاں وانگجاہانی انتظامی جیڑہانی گیش ءُ گیوار کنگ ءَ ھوار بلوچ لیٹریسی کمپین ءِ وسیلہ ءَ چہ وانگجاھاں نودربرانی کونسلنگ ءُ ایجوکیشنل واک کنگ بیت ءُ ملیر ءَ یونیورسٹی ءِ جوڑ کنگ ءِ ھاتر ءَ گل ءِ نیمگ ءَ چہ یک زرمبشتے جُنزینگ بیت۔
دیوان ءَ سرجمیں بُنگپّانی سر ءَ گپ ءُ تران ءَ پد آؤکیں گامگیج ءِ تہ ءَ ھنکین ءِ گْوَستگیں کابینہ ھلاس کنگ بُوتگ ءُ نوک گچین بُوتگیں کابینہ ءَ رضوان بلوچ ھنکینی کارمستر، شاہ تاج بلوچ کُمک کارمستر، گُلاب بلوچ کارگُشاد، نومان بلوچ کُمک کارگُشاد ءُ وسیمہ بلوچ ھالرسانی کارگُشاد گچین کنگ بُوتگ اَنت۔
دیوان ءِ گُڈسر ءَ بُنجائی سنگت ءَ نوک گچین بُوتگیں ھنکینی کابینہ سوگند دات اَنت ءُ نوک گچین بُوتگیں زمہ واراں پیمان کُت کہ وتی زمہ واریاں جْوانیں رنگے ءَ جُنزینں۔
Discover more from Balochistan Affairs
Subscribe to get the latest posts to your email.