بلوچ اسٹوڈنٹس ایکشن کمیٹی ءِ نیمگءَ دو جتائیں جاہاں بالیچہ ءُ ڈیرہ مراد جمالی ءِ ھنداں کتاب میڑہ برجم دارگ بوتگ۔
اولی چہ نصیرآباد ھنکین ءِ نیمگءَ ڈیرہ مراد جمالی ءِ شاہ دربرجاہ ءَ دو روچی کتاب میڑہ ئے برجم دارگ بوتگ ءُ دومی چہ تربت ھنکین ءِ نیمگءَ بالیچہ ءَ مبارک قاضی ءِ یاتءَ مزن وانگجاہ ءَ برجاہیں مراگش ءَ یک روچی کتاب میڑ ئے برجم دارگ بوتگ۔ دوئیں کتاب میڑہ سوبمندی ءَ گوں آسر بوتگ اَنت۔
کتاب میڑہءَ بلوچستان، سیاست، راجدپتر، لبزانک ءُ ایدگہ بنگپانی سرءَ کتاب ایر کنگ بوتگ کہ ورنا، زہگ ءُ استاداں سیل کتگ ءُ پہ وت کتاب درچیتگ ءُ زرتگ۔
گل ءِ لبزانک گام ءُ نوْشت ہم ایر کنگءَ ھوار بلوچ لٹریسی کیمپئن ءِ کتابُک ہم ایر کتگ ءُ استاداں داتگ انت۔
بلوچ اسٹوڈنٹس ایکشن کمیٹی ءِ گُشگ انت کہ بلوچستان کتاب کاروان ءِ نامءَ کتاب میڑہ ءِ کاروان برجاہ اِنت ءُ سرجمیں بلوچستان ءَ پہ بلوچ نودربر ءُ استاداں میڑہ اڈ دیگ بیت داں آ بوان اَنت ءُ آہانی زانشتی ہوالہ ءَ رُدوم بہ بیت ءُ دنیا ءِ لبزانک ءَ ھوار وتی جند ءِ لبزانک ءَ ونت بہ کن اَنت داں وتی جند ءَ پولیت بہ کن اَنت۔
Discover more from Balochistan Affairs
Subscribe to get the latest posts to your email.