سمی دم درینگانے-اْولی بھر

زبیر بلوچ

وہدے یک معاشی سماجی نظام ءُ آئیءِ زرائع پیداور  سماجی دیمروئی کت نہ کنگءَ آں گڑا چاگرد اوشت ءُ جمودءِ آماچ بیت ۔ ہمے رنگءَ اگاں یک سیاسی سر ءُ پرے  یا تحریکے چاگردی جمود ءُ اوشتءَ پروشگءَ نہ اِنت یا بجائے جمودءِ پروشگ ءُ سیاسی عملءِ رائے پچ کنگا گیش فاشزم ءُ جنگو ازمءِ نیمگا برگءَ اِنت گڑا تو سرپد بُہ بو کہ اے تحریک یا اے سیاسی سُرءُ پُرءِ مکسد بے منزل انت ۔ بے مکسدی ءُ  بے منزلی ہر وہدءَ گوں بے نظریہ ءُ بے پگر و سساءَ ہمگرنچ بیت ۔ بے مکسدیت ءُ بے منزلی چاگردءَ گیش بحران ءُ جمودءِ نیمگءَ بارت ۔ مایوسی ءُ دلپروشی پیداک کنت۔

تحریک ءُ سیاسی سرءُ پر چاگردءِ اجتماعی ذہنی تشکیل کنگءَ کمک ءُ مدت کنت چاگرد ءَ ساپ کننت پلگاراں شیواراں، بلے ما گندگءَ ایں مئے گورا چیز اے رنگءَ نہ آں۔ بجائے اجتماعی ذہنی تشکیل کنگءَ چاگردءِ ساپ ءُ پلگارگءَ  انتشار ءُ دلپروشئ ودی بوہان انت۔ عوامی تحریک پہ ھلو ھالو تیار نہ بنت تحریکءِ جوڑ بوھگءَ دراجیں پند  برگ بنت لس مہلوک ہروہدہ دگانی سرا آرگ نہ بنت ایشاں دگاں آرگ  ئے واستہ تاریخی لحماتانی ودار کنگ لوٹیت ۔ مئے گورا  سانحہ ڈنک ءَ بگر داں سانحہ ڈک چاغی ءَ درا درزنے ءَ گیش تاریخی واکہات ءُ لحمات اتکگ ءُ شتگاں بلے وژن ءُ مکسد نہ بوہگ ئے سببءَ درست پہ بے مکسد بوتگ انت اے ویلاں کس ءَ تحریکےءِ شکل دات کت نہ کتگ یک مومنٹمے جوڑ کت نہ کتگ   ایشی وجہ چے انت لامحالہ  من نہ کشتگ ہلار نہ انت یا قیادت ءُ نظریہءِ بحران ۔

اے  چیزان چے پدر بوہگءَ اِنت  بلوچءِ گورا قیادتءِ بحران روچ پہ روچ چوں شومکءِ ریشءَ بوہان انت اگاں شومک پہ وہد ءُ ٹیمب الاج مہ بیت جانی نکس دنت ۔ بلوچءِ اے بحران چو ہمے مثالا انت ۔اے سیاسی عملءِ ہچ حساب ءَ نہ انت کہ کسے بگشیت کہ مہلوک سالءِ دوزدہ ماہ ءَ گوں مہ بیت روڑ ءُ دگانی سرا اے پریکٹس دنیا ءَ ہچ جاگہ نہ بوتگ۔ روڑ ءُ دَگءِ سرا مہلوک تاریخی لحمات و واکہانی ودارءَ بہ کنت ۔ بلے انقلابی قیادت نہ  بوہگءِ سبب ءُ بلوچءِ شنگ ءُ شانگیءَ اے درستیں تاریخی واکہات کہ برمشءِ واکہءَ  بگر داں چاغیءِ واکہہ تاں اتکگاں وت مہ وتی ناتپاکیءَ چو دے ءُ بلا پلیکتگ آں ۔ داں روچ ئِے مروچی ھچ بلوچ پارٹی ءُ واننداں گلے ءَ  اے تجزیہ نہ کتگ کہ اے تاریخی لحمات ءُ واکہانی بے مکسد کنگ ئے زمہ وار کے انت ءُ ایشانی احتساب کجام عدالتءَ چے کنگ بہ بیت ۔ہمے زمہ وار پدر کنگ بہ بنت۔

 انچو کہ مارکس گشیت بیدئے یک مشت بوہگءَ لس مہلوک پہ لٹ ءُ پلءِ واستہ را میٹریلے

سمیءِ اے دومی سیمی دیوان انت ہمے گپءَ پیلس دئیگءَ انت کہ مارا نوں دم برتگ ۔

سوال ایش کہ پرچہ دم برتگے؟

بلے ما اِدا سمیءَ میاریگ کت نہ کنیں پرچہ سمی میاریگ نہ انت

سمی یک کودکیں چکے سینزدہ سال انت تہنا گوں وتی نزوریں کوپگاں برے اے دگ ءُ برے آ دگ برے اے شہر برے آ شہر برے اے چوک برے آ چوک ءُ فٹ پاتھ کپان ءُ پروشان انت چوں دم نہ بارت الم دم بارت۔ ھاں یک گپے الم گشان   انقلابی جہدکار دم نہ براں پرچہ کہ آہانی کرا انقلابی پارٹی یے گوں انقلابی مکسد ءُ پروگرامے ءَ گوں  وژن ءُ مکسدےءَ  ہروہد ساڑی ءُ ہمکوپگ انت۔

انچو کہ ٹراٹسکی گشیت تو دم نہ برے تو کدی نہ جُک ئے تو بَھا ھوں نہ بئے اگاں تئی مکسد گوں انقلابی پروگرامے ءُ پگرےءَ بندوک بہ بیت ۔

سمی یک بے میاریں کودکے میاری وَ ہما پروڈیوسر اَنت ڈائریکٹر اَنت کہ چوں اے رنگءَ  سیاستءَ پروڈیوس کنت و ڈائریکشن کنگءَ ہر کارا دست مان کنگءَ انت۔ مسنگ پرسنانی جیڑہ خالصتاً انسانی جیڑہ ادا کسے کئیت دِگہ وتی سیاسی مکسدءِ گِرگ لوٹیت گڈا بِزاں آ عقل  ءُ ہوشءَ چے دور یک وابے ءُ اِلُوژن یے توکا انت منطق پگر ءُ شعورءَ چے بے سما انت ۔زمینی راستی آں نہ بلد انت ۔ علمءِ گوات ئِے نہ لگیتگ۔ اگاں علم ءُ پلسپہءِ شمالءَ کشیتگ بگندے کمو باز گواتءِ لگیتگ ئے بلے چو وہابی مسلماناں بیدئے آھاں کس مسلمان نہ انت۔