نیشنل پارٹیءِ سروک ءُ بلوچستان ءِ گوستگیں سرکماش واجہ ڈاکٹرعبدالمالک بلوچ ءُ پارٹیءِ بنجاہی اُگدہ دار ءُ سنیٹر کہودہ اکرم دشتی، کبیرمحمد شہی، جان محمدجان بلیدئی ، واجہ ابوالحسن، ضلعی رہشون مشکور انور، محمد جان دشتی ءُ ایدگر باسکاں بلوچستان اکیڈمی آف لٹریچر اینڈ ریسرچ (تربت)ءِ تروتاب کتگ، اکیڈمیءِ سروک ڈاکٹر غفور شادءَ آہاناں وش اَتک کتگ ءُ اکیڈمیءِ کارانی بابت ءَ سرپد کتگ ءُ مالی کم گشادی ءُ جیڑہ درشان ہم کتگ اَنت۔
نیشنل پارٹی سروک ءُ بنجاہی رہشوناں اکیڈمیءِ کردءَ را ساڑاتگءُ گُشتگ کہ پہ زبان ءُ لبزانکءِ ودّینگءَ ءُ پہ زانت ءُ زانشتی دودانی دیما برگءَ ہرچی کہ نیشنل پارٹی وس ءُ واکءَ بیت ءُ آئی دست رسیت آ کنت۔
ڈاکٹر عبدالمالک بلوچ ، کبیر محمد شہی ءُ واجہ اکرم دشتیءَ بلوچی زبان لبزانک ءُ دودو ربیدگءِ دیمروی ءُ تک و پہناتانی بابتءَ گوں اکیڈمیءِ اُگدہ دار ءُ باسکاں تران کتگ۔
اکیڈمیءِ گوستگیں سروک عبید شاد، کواسیں پولکار کار واجہ یوسف عزیز گچکی، کارگشاد شگراللہ یوسف، نائب کماش عارف عزیز، کابینہ ءُ ایگزیکٹیو باڈی باسک عابد علیم، مقبول ناصر، قدیرلقمان، احمد عمر، گلاب جمع ءُ جمال پیرمحمد ہم دیوانءَ ساڑی بوتگ اَنت۔
اکیڈمیءِ کماشءَ گوں دلءِ جہلانکی ءَ نیشنل پارٹی رہشونانی منّت گپتگ ءُ آہاناں بلوچستان اکیڈمیءِ چاپ ءُ شنگ کتگ کتابانی داد بکشاتگ۔
Discover more from Balochistan Affairs
Subscribe to get the latest posts to your email.