دنیا ءَ بازیں راجی جنز بندات بوتگ، بازیں راجی جنز سوبمند ءُ دیگه بازینیں بے سوب بوتگ اَنت ۔ بلے همک راجی جنز ءِ زمینی حقائق چه دومی ءَ گِستا ءُ جِتا بوتگ اَنت. همے زمینی حقائق راجی جنزاں شیپ دئنت، رودين اَنت ءُ سوبمند یا که بے سوب کن اَنت. پرچه که هما اوزار که همک راجی جنز ءِ واسته یونیورسل اَنت آهانی سرءَ مزنیں کساسے ءَ کتاب ءُ وانگی است اَنت که کجام اوں رجی جنزانی کیڈر بلوٹنت آهاں درگیتک ءُ ونت کن اَنت.
بلے هما اوزراں که زمینی حقائق جوڑ کن اَنت، آ هما آتراپ ءُ ماحول ءِ زیرِ اثر بنت که همودا راجی جنز ردوم گِرنتءُ توان ءَ بنت. زمینی حقائقانی چارگ ءُ تپّاسگ ءِ هاتر ءَ همک راجی جنز ءَ را شرّین ءُ زانت کاریں مردومانی یک مزنیں ٹیمے درکار بیت که آ زمینی حقائقاں گوں سائنسیءُ علمی نگاه ءَ بچاریت ءُ راجی جنزءَ سرپد بکن.
همے ٹیم ءَ را سائنسی زبان ءَ انٹیلیجنسیه ءَ گشنت. اِے انٹیلیجنسیه وت اوں راجی جنزانی پیداور اِنت که ایش وتی راجی جنز ءِ زمینی حقائقانی همک تک ءُ پهناتاں شرّیں رنگے ءَ زانت ءُ راجی جنزءَ جوڑ بوهگ ءُ سوبین بوهگ ءَ مدت ءُ کمک کنت. چوں وا اِے انٹیلیجنسیه لوکل زمین ءِ سرءَ هلک ءُ میتگاں تلان اِنت که اودا ایش زهن سازی کن اَنت، کنونس کن اَنت مردوماں راجی جنز ءِ نیمگ ءَ کار اَنت.
بلے ایشانی امپیکٹ تهنا هما آتراپاں داں محدود اِنت که همودا ایش کارءَ اَنت. پدا دومی نیمگ ءَ هما اَنت که آهانی دائره کار مستر اِنت ءُ راجی جنز ءِ سنٹر ءَ داں آهانی گپ گوشدارگ بنت ءُ راجی جنز ءِ جند ءَ اثرمند کن اَنت ءُ زمینی حقائقانی بنيادءَ راجی جنزاں شیپ دینت ءُ دیم ءَ بَرنت.
اِے مین اسٹریم انٹیلیجنسیه اِنت. ایشی تها راجی جنزے بازیں بهرانی مردوم گون اَنت چوش که سیاسی ءُ سماجی راهشون (هما که راجی جنز ءَ وڑے نه وڑے ءَ اثر مند کن اَنت).
ایشی ءِ تها پولکار، نبشته کار ءُ زانتکار اوں مان اَنت. بلے پولکار، زانتکار ءُ نبشته کار راجی جنزءَ هواریں پارٹی ءُ سیکشنزانی میانجی ءَ بریجنگ کن اَنت ءُ جهد کن اَنت که دورسیں پارٹی گوں یکے دومی ءَ هال ءُ اهوال ءِ تها به بنت دانکه په راجی جنزءَ ٹاهینتکیں فيسله ءُ پولیسی گيشتر گراونڈ رائلٹیزانی هساب ءَ به بنت که راجی جنز ءَ پائدگ بدینت۔
بلے ما همے گندیں که وهدے بلوچ ءِ نبشته کار، زانتکار ءُ پولکار بلوچ راجی جنزے سرا که گپ ءُ تران کن اَنت یا نبشتانک ءُ پولکاری رپورٹ ٹاهین اَنت۔ آهانی گشتانک، نبشتانک، یا پولکاری بلوچ ءِ سیاسی بریجنگ ءَ بیزار اِنت، بلوچ ءِ جند ءَ کنفيوز کن اَنت۔ مروچی اوں مۓ زانتکار ءُ نبشته کار وتی گشتانک ءُ نبشتانکانی تها هما راجی جنزانی مثالاں دئینت که آهانی زمینی حقائق نا گوں بلوچ راجی جنزءَ هم دپی ءُ یکّی کن اَنت ءُ نا هما دوراں که آ راجی جنز بوهگ ءَ بوتگ آ گوں مروچی ایں دور ءَ همدپی ءُ یکّی کن اَنت۔
ایشی سرا ترا بازیں کساس ءَ پٹ ءُ پول ءُ ریسرچ، لیکه ءُ تهیوری دست کپیت۔ بلے ریسرچ کجام اوں به بیت آ سنگءِ سرے لکیر نا اِنت۔ بانده که دیگه لیکه ۓ گوں گيشتر ثبوت ءُ لوجک ءَ بائیت گوستگيں لیکه رَد کنگ ءُ یل دئیگ بنت۔ بائد اِنت کنفيوژن پیداک کنوکیں پولکار، زانتکار ءُ نبشته کار جهد بکن اِنت ءُ وتی کار ءَ پجه بیارنت هما دلیل ءُ مثال که آ وتی نبشتانکءُ گشتانکانی تها دینت آ وت ساری ءَ بچارنت که همے دلیل ءُ مثال بلوچ راجی جنز ءِ زمینی حقائقانی هساب ءَ اِنت یا نا؟
بائد اِنت که اِے هبر ءَ اوں بزان اَنت که آهانی کار بلوچ راجی جنزے بهر ءُ تهریں ٹُکرانی هور کنگ ءُ بلوچ راجی جنزءَ سیاسی، سفارتی، سماجی ءُ ایندگه پڑاں توانگر کنگی اِنت۔ نوں ما شما وت بجیڑين ءُ بچاریں که مۓ زانتکار، نبشته کار، پولکار ءُ سیاسی ءُ سماجی لیڈر یا که مئے انٹیلیجنسیه بلوچ راجی جنز ءِ تها وتی کرد ءَ پیلو کنگ اِنت؟ اگاں کنگ ءَ اِنت وا شر بلے اگاں کنگ ءَ نا اِنت گڑا ما را کجانگو برگ ءَ اِنت؟
Discover more from Balochistan Affairs
Subscribe to get the latest posts to your email.