بلوچ اسٹوڈنٹس ایکشن کمیٹی کے مرکزی ترجمان نے اپنے جاری کردہ بیان میں اسلامیہ یونیورسٹی بہاولپور میں زیر تعلیم بلوچستان کے طالبعلموں سے فیس طلبی، مختص نشستوں کے خاتمے اور جامعہ میں طالبعلموں سے ناروا اور متعصبانہ سلوک کی شدید الفاظ میں مذمت کرتے ہوئے کہا کہ بلوچستان میں تعلیمی اداروں کی عدم دستیابی کے باعث پنجاب سمیت دیگر صوبوں کی جانب رخ کرنے والے طالبعلموں کی راہ میں رکاوٹیں ڈالنا نہایت ہی تشویشناک ہے۔
انھوں نے کہا کہ بلوچستان ایک ایسا خطہ ہے جہاں تعلیمی نظام نہایت ہی مخدوش اور ابتر ہے۔ بلوچستان میں نہ صرف تعلیمی اداروں کی کمی ہے بلکہ قائم شدہ تعلیمی ادارے بھی کھنڈرات کا منظر پیش کر رہے ہیں اور دن بہ دن مختلف معاشی مسائل کا شکار ہو کر دیوالیہ ہوتے جا رہے ہیں۔ اعلی تعلیمی اداروں کی دیوالیہ ہونے کا ازالہ طالبعلم بھاری فیسیں بھر کر بھگت رہے ہیں۔ اس کے علاوہ تمام تر تعلیمی اداروں میں بنیادی سہولیات بھی میسر نہیں جس کے باعث طالبعلم معیاری تعلیم حاصل کرنے سے قاصر ہیں۔
انھوں نے مزید کہا کہ اسطرح کے حالات میں بلوچستان کے طالبعلم ایک مجبوری کے تحت ہزاروں میل سفر کرکے پنجاب سمیت دیگر صوبوں کی جانب رخ کرتے ہیں۔لیکن گزشتہ چند سالوں سے دیگر صوبوں کی جانب رخ کرنے والے ان طالبعلموں کی راہ میں بھی رکاوٹیں حائل کرنے کی منظم کوششیں کی جا رہی ہے جس کی واضح مثال ہر سال مختص نشستوں میں کمی اور حکومت کی جانب سے منظور شدہ اسکالرشپ کا خاتمہ بھی ہے۔ اس کے علاوہ پنجاب سمیت دیگر صوبوں کے جامعات میں بلوچستان کے طالبعلموں کو انتظامی طور پر متعصب رویوں کا شکار بنا کر امتیازی سلوک روا رکھا جا رہا ہے۔ اس طرح کے رویہ طلبا کو ذہنی کوفت اور غیر محفوظی جیسے ماحول کو پروان چڑھا کر طلبا کی تعلیمی کیرئیر میں رکاوٹ کا باعث بنے گی۔
اپنے بیان کے آخر میں انھوں نے کہا کہ حکومت بلوچستان دیگر صوبوں میں جاری اسکالرشپس کا مستقل حل نکالتے ہوئے عملی اقدامات کریں تاکہ ہزاروں طالبعلم ہر سال علمی میدان میں مستفید ہو سکیں۔ اگر حکومت کی جانب سے طلبا مسائل کے حل کےلیے سنجیدہ اقدامات نہیں اٹھائی گئی تو تنظیم دیگر تنظیموں سے لیکر جمہوری طرز عمل اپناتے ہوئے سخت احتجاجی عمل اپنائے گی۔