نبشتہ کار: حسن ھمدم
ماھیگ انت، ماھیگ اَنت۔شرّیں ماھیگ اَنت، ھُشتری میتگ ءِ تنک ءُ دَمکاں جارجنان ات ءُ گوزان ات تہ یک جنینے ءَ توار پرجت چونیں ماھیگ انت؟ “شِزُک” اماّں کولگر انت پہگین انت، کاشک انت ءُ سارُمیں ماھیگی سَرگ اش ھم مان-بیابیا”شِزُک” بزگ تو دیریں گار بوتگ ئے ماسی ماھکان ءَ گوں مھریں دروشمے ءَ دومی نیمگ ءَ توارجت”شِزُک” ءَ وتی ھُشتر بُرت ءُ ماسی ماھکان ءِ لوگ ءِ پیشگاہ ءَ جوکّینت ءُ ماھیگ ءِ بُوشکنت شِزُک ھروھد کہ پہ ماھیگ ءِ سودا ءَ اے میتگ ءَ آتکگ تہ آئی ءَ یکش ءَ ماسی ماھکان ءِ گور ءَ داشتگ-
ھنچوش کہ ماسی ماھکان ءَ شِزُک ءَ را مھر ءُ ہمدردی داتگ کمّیں باز ھمے وڑیں دروشماں گوں ماسی ءِ جنکّ “نازُک” ءَ ھم گوں شِزُک ءَ یک مھر ءُ دوستی یے بوتگ ءُ ھمے دوستی ءِ سبب بوتگ کہ نازُک ھر وھد ءَ پہ شِزُک دعا لوٹتگ کہ ھُدا آئی ءِ روزیگ ءَ پہ شائستگی ءُ وشی بہ دنت ءُ دائم ءَ آئی ءِ ماھیگ پائدہ بہ بنت-
شِزُک ءِ مال ءُ مڈی ھمے ھُشتر ءُ لُجر اتنت- آئی ءَ ھما کسانی ءَ وتی پت ءِ مرگ ءَ پد ھمے ھُشتر ئےِ گپتگ ءُ رھادگ بوتگ ءُ تاں مروچی ھمے کشکءَ روان انت-چہ ایشی ءَ گیش بزگیں شِزُک ءَ دگہ ھچ نہ زانتگ ات- شِزُک ءِ ماھیگ ءِ بھا کنگ ءُ پہ آئی ءَ نازک ءِ دعا ئے نیک ءِ اے سلسلہ جاری ات کہ نیام ءَ ھنچیں وھدے آتک کہ شزک ءِ آمد بند بوت ءُ آ باز وھد ءَ گار بوت-چہ شزک ءِ گاری ءَ نازک سک بے وار ءُ بے قرار بوت ءُ آ پہ شِزُک ءِ باورا بژنیگ ھم است ات ءُ پہ شِزُک ءَ سک دلپدرد ھم بوتگ ات کہ شِزُک پرچا گار انت…. کہ اناگہ ءَ یکروچے ماھیگ انت، ماھیگ انت، شرّیں ماھیگ انت- شِزُک ءِ توار میتگ ءَ شنگ بوت، ھنچوش شزک ءِ توار نازُک ءِ گوشاں کپت گشئے نازک چار ءَ چست کت ءُ آ پہ بے سمائی شِزک شِزک گُشان شِزک ءِ دیما شت ءُ پہ روانی شِزُک ءَ را گشت ئےِ “شزک تو کجا بوتگ ئے؟ ترا چے بوتگ؟ تو پرچا دیر کتگ؟ تو نہ زان ئے چنت وھد انت کہ من پہ بے قراری تئی وداریگ بوتگاں…. نازُک ھمے رنگیں بڈّے جست پہ بے وتی کت بلے شِزُک ءُ پہ سادگی ءُ بزّگی درّائینت” نازُک ترا ھدا ایمان بہ دنت کہ تو منی وداریگ بوتگءُ پہ منا بژنیگ بوتگ ئے، بلے ھدا زانت کہ منی سر ءَ چے گوستگ تو زان ئے؟ منی” پُلس” چنچو بیمار بوتگ ءُ من پہ آئی ءِ ھاترا زیارت ءَ پیر نشتگ نوں ہمیش انت کہ ھدا ءَ پہ مئے سر ءَ بزگ بوتگ ءُ پُلس چہ بیماری ءَ رکّ اتگ-،،
پُلس شِزُک ءِ ھُشتر ءِ نام انت کہ آئی ءَ چہ دنیا ءِ ھر چیز ءَ دوست تر انت-
“شِزُک تئی ھُشترءَ چے مَرگ بوتگ؟ کہ تو چہ منا ھم بیھال بوتگ ئے،، نازُک ءَ پہ زھرکنی گشت-
” نازُک منا ھرچی گشئے بہ گوش بلے منی پُلس ءَ بددعا ئے مہ دئے،، تئی پلس ءَ نازک ءَ دپ پُرکت کہ شِزُک ءَ آئی ءِ دپ ءِ ھبر پچ گپت ءُ گشت ئےِ”نازک نوں تو اگن منی پلس ءَ بددعا یے دات گڑا منی تئی لوگ ءِ آپ ھرام انت کہ من بیایاں،
“اِناّں اِناّں شِزک من تئی پلس ءَ بد دعا نہ دیاں بلے من گُشاں تئی پلس ءَ چے بوتگ؟
“نازک من نزاناں کہ منی پلس کئے ءَ نزر کت کہ ھُدا آئی ءِ نزراں کُنٹ بہ کنات دانکہ دگہ بزگے ءِ پلس چو منیگ ءَ وتی ٹیلگاں مہ کنت- بلے نازک ترا یک گپّے گُشاں پہ ھُدا ءِ نام ءَ مروچیگ ءَ پد منی پلس ءَ تو ھچ پیمیں بددعا یے مہ دئیے-،،
ھمے گپّاں کنان ءَ شِزک ءِ چم آپلک بوتنت،ھمے جاور ءَ نازک ھم سک نگیگ ءُ بژنیگ کت ءُ آئی چمانی ارس ھولمب بوتنت ءُ آ تچان ءَ دیم پہ لوگ ءَ شت ءُ تاں دیر ھمود ءَ گریت ءُ سر ئےِ سُبک ءُ ہوش ھم برجاہ کت تہ آئی ءَ وتی ءُ شِزک ءِ باورا بیچار کت-نوں آئی ءَ ھما توامیں گپّ ءُ تران کہ آئی ءَ گوں شِزک ءَ پہ بے سمائی کتگ اتنت یاد آتک انت-تہ آئی ءَ مارِت کہ آئی ءَ گوں شِزک ءَ بے پناہ مھبت بوتگ کہ آئی ءَ چہ اد ءُ پیسر وتی شِزک ءِ دوستی ءُ ہمدردی ءِ کچ ءُ کساس نہ زانتگ، بلے وھدیکہ آئی ءَ وتی مھبت ءِ جہلانکی پہمت تہ آئی ءَ ھما رنگ ءُ دروشماں گوں شِزک ءَ پُر مھریں گپّ ءُ تران بنا کت ءُ ھررنگ ءَ کوشست ءُ جھد ئےِ کت کہ شِزک آئی مھبت ءِ رنگ ءَ بہ چنت ھمے وڑا آئی ءَ شِزک ءِ ھاترا کدی مدرجت ءُ کدی وتی پس ءِ دراھیں شیراوک ءَ شِزک ءِ چاھانی تھا مان ئےِ کُتنت ءُ برے شِزُک ءِ ھررنگ ءَ آئی ءَ وتی شِزک ءَ را وش ءُ مھرانی تھا بندیگ کنگ ءِ جھد کت-ھمے درک ءُ دورانی تھا کہ نازک سک باز وش ءُ گوں وتی ھم گنگلاں ترانپولی ءَ لگّ اتگ ات کہ شِزُک آئیارا مگ ءُ مھرانی بندیگ کتگ-شزک ءِ ماہیگ ءِ بھا ئے رو-آ،جاری ات کہ یک روچے ماسی ماھکان گوں چیزے جنین ءَ شورکت کہ گوادر ءَ پہ گِندکی روئیں پہ ھمے ھاترا آھاں گاڑی یے باڑو کت بلے پہ راھدگے ءَ نازک ءَ پرپرین ات منا ھم برے گوں….ماسی ماہکان چہ نازُک ءَ لاچار بوت ءُ آئی ھم آخری وھد ءَ گاڑی ءَ سوارکت ءُ پہ گوادر ءَ رھادگ بوتنت-راہ ءَ یک جاگہے نازک ءَ شِزک ءَ را دیست کہ آ پہ گوادر ءَ رؤگا ات،نازک ءَ دل ءَ گْوشت کہ چہ گاڑی ءَ دَؤر بکن ءُ دیم پہ شزک برو بلے آئیءَ اے کت نہ کت ءُ آئی ءَ توار ھم پِر کت نہ کت کہ گاڑی چہ جنین ءَ پُر ات، آئیءَ تُرس ات کہ آئی ءِ سیٹ ءَ کپے دروشم ءَ مہ زانت- شِزک ءَ آئیارا ندیست بلے نازک دراہیں راہ ءَ ھیالانی تھا گار بوت- گوادر ءِ مسافری جت ءُ پدا میتگ ءَ آتک انت، بلے نازک ھروھد ءَ شزک ءِ ھیالانی تھا بال ءُ نیم بال ات ءُ وداریگ ات کہ شزک چہ گوادر ءَ بئیت تہ آ شِزک بہ گْوشیت کہ آئی ءَ شزک ماں گوادر ءِ راہ ءَ دیستگ کہ آ ملّان ءَ ھُشتری مھار ءَ بوتگ ءُ دیم پہ گوادر ءَ رؤگا بوتگ چہ دُور ءَ آئی ءِ شِزُک ءِ ملّگ جاہ آؤرتگ انت-ھمے ھیالانی تھا برے آئی ءَ وتارا شِزُک ءِ بانور لیک ایت ءُ برے آ تپرکہ بوت کہ باریں چے بیت-بلے ھمے روچاں یکروچے اناگہ-ماھیگ انت، ماھیگ اَنت ءِ شِزُک ءِ توار ماں میتگ ءَ شنگ بوت ءُ نازُک چہ گل ءَ ھمنچک بوت کہ بال نہ کت ءُ گوں شِزک ءِ ھُشتر جُکگ ءَ نازک ءَ وتارا رسینت ءُ پہ گل ءُ پُر مھریں وڑے ءَ گشت ئےِ “شِزُک! من گوادر ءِ راہ ءَ ترا دیستگ تو وش ملّانءَ رؤگا ات ئے ھما وھد ءَ منی دل گشت چہ گاڑی ءَ دؤر بکن ءُ تئی کرّا بیا بلے من ترا توار ھم جت کت نہ کت-
شِزُک ءَ پہ گَلے گشت نازُک! شرّیں تو منی پُلس پجاّ آؤرت یا یا منا؟ نازک ءَ وتی دوھیں پنچ وتی سرا جت انت ءُ گشت ئےِ:
“اوہ ءِ منی سر-،،
Discover more from Balochistan Affairs
Subscribe to get the latest posts to your email.