کرک ءِ ڈل ، گچک پنجگور ءَ 25 اپریل 2022 ءَ پاکستانی لشکر ءَ بلوچ جھدکار سالھ ء ھارون ءِ مات شاہ بی بی ء سھراب، نشار شھزادی ء ابدلرھمان ءُ شھزادی ءِ پیریں پت ابدالرھمان ءِ پجیگ ءَ آئی ءِ کھول ءِ دگہ مردم دزگیر کنگ ءَ پد وتی چیریں آزار جاھاں برتگ ءُ پہ زور بیگواہ کرتگ اَنت۔ما پہ آیانی زند ءُ جاندْراھی ءِ بارہ ءَ بے تاھیر این ءُ لوٹ کن ایں کہ آ زوت یلہ کنگ بہ بہ اَنت۔
استانءَ کسے دوست مہ بیت ھم بلے ھچ مردم ءِ پہ زوریں بیگواھی پہ مردم دوستیں جھان ءَ اوپار کنگی گپے نہ اِنت۔بلوچستان ءَ پہ زوریں بیگواھیانی تہ ءَ روچ پہ روچ گیشی آیان اِنت۔پیش ءَ سیاسی کارکن ءُ گوں آجوئی ءِ جنگ ءَ بندوکیں مردم نشانگ کنگ بیتگ نی آیانی کھول پہ زوریں بیگواھی ءِ نشانگ کنگ بیگ ءَ اَنت۔
سالھ ءِ پت ھارون چہ ایشی ءَ پیش ھم دزگیر کنگ ءُ لٹ دیگ بیتگ چہ بازیں جنگ ءَ آ سک ٹپ ءُ ٹور بوتگ ءُ جاور ئِے ناگیگ اِنت۔پاکستانی لشکر نام گیپتگیں کھول ءِ سر ءَ زور دیگ ءَ اِنت کہ آ سالھ ءَ پاکستانی لشکر ءِ دست ءَ بہ دنت۔
بلوچانی سر ءَ پاکستانی لشکر ءِ زوراکی گچینی کارے ءِ پدگوانک نہ اِنت بلکیں آ بلوچ ءِ زمین ءُ چاگرد ءَ سرجمے ءَ دستیگ کنگ لوٹ ایت۔ بلے وھدے کہ جاھے آئی سیتانی سر ءَ ارشے بہ بیت آ چہ پیسر ءَ گیش اتگیں وتی نشانگانی سر ءَ گوں گیشتریں زور ءَ کارروائی کنت داں پنجاپ ءِ مردماں رد دات ءُ ایمن کرت بہ کنت۔
کراچی ءَ گھار شاری ءِ دیمونیں ارش ءَ پد اسلام آباد ءُ لاھور ءَ بلوچ نودربر نشانگ کنگ بیتگ اَنت۔ بیبگر امداد ءِ پجیگ ءَ دگہ نودربر پمیشکا نشانگ اَنت کہ بلوچ چہ آئی ءِ زانتکاریں مردماں زبھر کنگ بہ بیت، ھمے پیم پاکستانی لشکر ءَ بنگلہ دیش ءَ ھم کرتگ اَت۔
بلوچ نیشنل موومنٹ پاکستانی ریاست ءِ زوراکیانی بگیری ءَ بے توار نہ بیت۔ما ھم یونائیٹڈ نیشنز (یو این) ءِ مردمی اگبالانی بھرگ ءِ پجیگ ءَ مردمی اگبالانی پانک جنیں دگہ ادارھاں نمدی نبیس این ءُ میان استمانی مردمانی بے تواری ءِ سر ءَ آیاں یکشل ءَ کاگد دیم دئے این ءُ پاکستان ءِ بدیں کارپدانی سر ءَ وتی بے تاھیری ءَ درشان کن ایں۔