کراچی شہ دربرجاہ ءِ دو نودربر دودا الہٰی ءُ گمشاد بلوچ کہ آ 7 جون 2022 ءَ پولیس ءِ کاؤنٹر ٹیرر ازم ڈپارٹ منٹ چہ کراچی ءَ لوگ ءَ آوار جتاں ، نوں آ بازیاب بوتگ ءُ وتی لوگاں سربوتگ انت ، اشانی آوار جنگ ءَ پد تربت ءُ کراچی ءَ زہرشانی کنگ بوتگ ات ۔
یات دارگ بہ بیت کہ دودا الہٰی ءُ گمشاد بلوچ ءِ بازیابی ءَ چندے ساہت پیش سندھ اسمبلی ءِ نزیک ءَ آہانی بیگواہی ءِ حلاف ءَ زہرشانی کنگ ءَ سندھ پولیس ءَ جنین آدم ءُ ورناہیں نودربر جَت ءُ پروشت انت ، ءُ بازیں مردمے کمیں وقت ءَ دزگیر کنگ ءُ کڈن کنگ بوت کہ آ سندھ اسمبلی ءِ دیما زہرشانی مکن انت ۔
اے بارو ءَ وائس فار بلوچ مسنگ پرنسز ءِ سمی دین بلوچ کہ اے زہرشانی ءَ گون بوتگ ، آئی ءِ گشگ انت ،پولیس ءَ جنین آدمانی سریگ ءُ سرءِ چادر دُور کتگ انت ، پادانی کَوش درکتگ انت ، ءُ چوش رستراں مردم اش چیلّینتگ انت ءُ پولیس ءِ گاڑٰیانی تہا کُورّاتگ انت ، ءُ جنین آدمانی بارو ءَ سُبکّیں دانک اش گُشتگ ، سمی دین بلوچ ءَ گشتگ کہ ما ایمنیں زہرشانی کنیں ، مئے لوٹ قانودی ءُ دستوری انت ، ءُ اے ملک ءَ زہرشانی کنگ ملک ءِ ہمک جاہ منند ءِ حق انت ، سندھ پولیس ءِ اے زوراکی ءَ ما بِہہ شموشکار نہ بیں ، آئی ءَ گوں سندھ سرکار ءَ لوٹ کتگ کہ سندھ پولیس ءِ حلاف ءَ درقانودی کِردءَ گامگیج بزوریت ۔
Discover more from Balochistan Affairs
Subscribe to get the latest posts to your email.