نبشتانک: گریشگ ءِ پدمنتگیں وانگجاھانی ھال
نبشتہ کار: زمیر مکسّود
ما ءُ شُما درست سرپد ایں کہ سرکاری وانگجاھاں وانگ نیستی ءِ برابر اِنت یکے وَ اِش اِنت کہ سرکار آسراتی(سہولت) نہ دنت اگاں کمو باز دنت گڑا دیم ءِ مردم وتی سر ءَ بھر ءُ بانگ اِش کن انت ءُ وانگجاھاں سر نہ بنت منی کرا سبوت ھست کہ مئے میتگ ءِ وانگجاہ ءِ کرسی ءُ ٹیبل کے بُرتگ اَنت بلے ھچ گوشت نہ کن آں، کسی نام ءَ گپت نہ کن آں، پرچا کہ اگاں گپ بہ کن آں گڑا مردم اے جیڑہ ءَ زاتی (پَرسنل) زُور اَنت ءُ گوں سرجمیں کھول ءَ دلگران بنت پرچاکہ کرسی ءُ ٹیبلانی بروک مئے وتی مردم اَنت.
بلوچستان ءِ کُنڈ کُنڈ ءِ وانگجاھانی ھمے ھال اِنت چُش کہ من گریشگ ءِ جامینّدے آں، من گریشگ ءِ ھمک میتگ ءِ وانگجاھانی ھال ءَ سرپد آں.
گریشگ ءِ تہ ءَ لھتیں جاگہ ھست اود ءَ وانگجاہ نیست اگاں وانگجاہ ھست گڑّا وانینوک بزانکہ اُستاد نیست اگاں استاد ھست گڑا وتی کِرد ءَ پیلو نہ کن اَنت بزانکہ ڈیوٹی نہ دے اَنت۔
دگہ لھتیں انچیں جاگہ ھست سرکار ءَ وانگجاہ ءِ بلڈینگ داتگ ھالانکہ بجٹ اوں پاس بوتگ بلے انگت ءَ بلڈینگ بندوک نہ اَنت یا کمیں دیوال بستگ ءُ پد ءَ زر وارتگ انت بلڈینگ کپی ءُ چونڈی کرتگ اَنت بلے کس ءَ چشیں ھمت نیست کہ ٹھِکدار ءَ جُست بہ کنت واجہ اے زر کُجا شُت اَنت ءُ بلڈنگ انگت ءَ سرجم نہ اِنت بَلے چُشیں مردم نیست کہ اے جُست ءَ بہ کنت پرچاکہ ٹیکھدار وتی ھندانی مردم اَنت دِلگران بنت یا ایشی ءَ وتی زاتی جیڑہ جُوڑ کن اَنت۔
ھما میتگاں کہ وانگجاہ نیست گڑّا آ میتگانی زھگ پند ءَ دور دگہ میتگانی وانگجاھاں رو اَنت بلے روگ ءَ چے پائیدگ؟ اود ءِ اُستاد اوں وانینگ ءَ چہ باگی اَنت ءُ پہ وت کاروبار کنگ ءَ اَنت یاکہ دِگہ شھر ءُ بازاراں شُتگ اَنت وتی زھگاں ماں شریں وانگجاھاں وانینگ ءَ اَنت، آھاں راج ءِ پروا نہ اِنت بس وتی زھگانی باندات ءَ پہ جیڑ اَنت آ چو نہ زان اَنت کہ اے زھگ اوں کَسے ءِ باندات اَنت.
بلکیں یک ءُ دو ایمانداریں یا راج دوستیں اُستاد دست کپ اِیت کہ وتی کِرد ءَ پیلو کنگ ءَ اَنت بلے گیشریں اُستاد وانگجاھاں نیا اَنت کہ شھراں شُتگ اَنت یا وَ دِگہ کاروبار کنگ ءَ اَنت. اگاں دُرستیں اُستاد وتی کِرد ءَ پیلو بہ کن اَنت ءُ بلکیں وتی زھگانی نہ راج ءِ باندات ءِ واستا بہ جیڑ اَنت ءُ وانگجاھاں وتی میتگانی زھگاں بہ وانین اَنت گُڑّا راج ءِ باندات رُژناہ بیت ءُ راج دیمروئی کنت بَلے چُشیں سوچ ءُ پِکر کُج اِنت؟
ما اوں وتی نابودی ءَ یک کاسانیں جُھدے کُت ھما کہ اُستاد وانگجاھاں ساڑی نہ اَنت آیانی ارزی بُرز ءَ بُرت بَلے ھِچ پہ ھچ انگت مئے بازیں میتگانی نودربر چہ وانگ ءَ زبھر اَنت.
ھمے وانگجاھانی اُستاد در ءُ دوریں نہ اَنت بلکیں ھمے کش ءُ کرانی مردم اَنت، مئے وتی سیاد ءُ ازیز بنت بلے انگت ایشاں ءَ پہ میتگ ءِ زھگاں بزگ اوں نہ کنت کہ اے تپلیں زھگ چہ دور دگہ میتگاں پند ءَ کاینت کہ ما ایشاں یک ساھتے درس بہ دے اِیں کہ مئے راج ءِ باندات اَنت۔
من ءُ منی دِگہ بازیں سنگتاں کاسانیں جُھدے کُت گریشگ ءِ درستیں وانگجاھانی رپورٹ یک پہ یک یکجاہ کُت اَنت بُرز ءَ دیم دات اَنت چاگردی رسانکدر (سوشل میڈیا) ءَ کمپیں اوں کُت بلے ھچ پَرک نہ بوت.
مئے وتی میتگ (دَمب، نوکاباد) ءِ وانگجاہ ءِ اُستاد اوں وانگجاہ ءَ نیت ءُ نہ وانین اِیت باز رند ءَ میتگ ءِ مردماں پون کُتگ ءُ گُشتگ پرچا وانگجاہ نیا ئے بَلے ھو کنت ءُ پد ءَ وانگجاہ ءَ نیت اِنت.
ما اگاں اُستاد ءِ نام ءَ چاگردی رسانکدر ءَ بگر اِیں یا ھلاپ ءَ دو گپ نبشتہ بہ کن اِیں گُڑّا اُستاد مئے کھول ءَ پون کنت مارا بیھار دنت ءُ ھاموش کنگ ءِ جُھد ءَ کنت.
بَلے ما باز دیر اِنت ھاموش بوتگ اِیں ھِچ پائدگ نہ رس اِتگ نوں مارا ھاموش بوّگی نہ اِنت ءُ یکشل ءَ جُھد کنگی اِنت پہ وتی راج ءِ بانداتاں.
زمیر مکسود گریشگ، نوک آباد ءِ جاہ منند ئے جی سی پیسل آباد مزن شادربرجاہ ءِ نودربر یے۔
Discover more from Balochistan Affairs
Subscribe to get the latest posts to your email.