بلوچ اسٹوڈنٹس فرنٹ ءِ بنجاھی جارکش ءَ 21 فروری ءَ ماتی زبانانی میان استمانی روچ ءِ درگت ءَ جار پرّینت ءُ گْوشتگ ماتی زبانانی مْیان استمانی روچ ءَ ” بلوچی ءُ براهوئی مئے وتی شَهدیں زبان اَنت ” ءِ نام ءَ کُلیں ھنکیناں مراگش اڈ دیگ بنت،
بنجاھی جارکش ءَ دیمتر ءَ تْران کنان ءَ گْوشت کہ راجانی بُنِکّی پجّار ماتی زبان اِنت، بیدے زبان ءَ راج زندگ بوت کرت نہ کن اَنت، راج پمیشکہ یک راجے منّگ بیت کہ آ راج ءَ را وتی زبان بیت۔ راجے ءِ بستار ءَ وتی ھستانک ءِ برجم دارگ ءَ مستریں چیدگ زبان اِنت، راج پمیشکہ یک راجے زانگ بیت کہ آ وتی زبان ءَ گپ جنت۔
راج ءِ زهگاں پہ زانشتی ءُ راجی سنچ ءُ سما ءِ ودّینگ ءَ اینکس ماتی زبان ءِ لبز سان بوت کن انت، دومی دری زبان ءِ لبز بوت نہ کن انت۔ پہ راج ءِ پُسّگاں راجی سَماہ ءُ زانت ءِ ودّینگ ءَ ماتی زبان ءِ وانینگ هژدری اِنت۔ اگاں بنیات ءَ زهگ ءَ ماتی زبان ءِ وانینگ مہ بیت تاں آ راج دیم ءَ بازیں مَجگی جْیڑهانی آماچ بیت ءُ زانشتی تَکاں دیمروی کُرت نہ کنت۔
بلوچ اسٹوڈنٹس فرنٹ سیاسی نودربر گل ءِ بستار ءَ سیاسی هیلکاری ءَ گْوں هوار مدام ماتی زبان ءِ پهازگ ءِ جُهد ءَ کنگ ءَ انت ءُ همے درگت ءَ گل ءَ وتی رهبند بلوچی ءُ براهوئی ءَ کرتگ۔ گل ءِ گیشتر جار بلوچی ءُ براهوئی ءَ انت ءُ گل ءِ نیمگ ءَ سیاسی گالبندانی سر ءَ شنگ بوتگیں کتابک ” زانش” بلوچی ءُ براهوئی ءَ کرتگ۔ همے رنگ ءَ گل ءِ نیمگ ءَ اوتهل ءِ مزن شَهدربرجاه ءَ بلوچی ءُ براهوئی ڈیفارٹمنٹ ءِ پچ کنگ ءِ واست ءَ زهرشانی کرتگ ءُ کراچی شهدربرجاه ءَ بلوچی ءِ ڈیفارٹمنٹ پچ کنگ ءِ واست ءَ گل وتی جهد ءَ کنگ ءَ انت۔
بلوچ اسٹوڈنٹس فرنٹ ءِ بنجاھی جارکش ءَ وتی درشان ءِ تہ ءَ دیمتر ءَ گْوشت کہ بلوچی زبان ءِ دیمروئی ءِ ھاتر ءَ چہ سرکار ءِ نیمگءَ ھِچ وڑیں مدت ءُ کمک نیست، اگاں ما وتی زبان ءِ سر ءَ وت کار مہ کن اَنت ءُ زبان ءِ دیمروی ءَ وتی کرد پیلو مہ کن انت گُڑا مدان مدان ءَ مئے زبان ءِ شھدیں لبز گار بوان بنت ءُ زبان وھد ءِ مجانی تہ ءَ ایرمش بیت، ماتی زبانانی میان استمانی روچ ءِ برجم دارگ ءِ مول ءُ مراد ایش اِنت کہ ما وتی زبان ءِ ارزشت ءِ بابت ءَ ورنایانی تہ ءَ سِنچ ءُ سماہ ودی بہ کن اَنت تاںکہ ورنا وتی زبان ءَ نبشتہ بہ کن اَنت ءُ وتی گپ ءُ باوستانی تہ ءَ دری زبانانی لبزاں کارمرز مہ کن اَنت بلکیں وتی ماتی زبان ءِ لبزاں شوھاز بہ کن اَنت ءُ وتی گپ ءُ گالانی تہ ءَ کارمرز بہ کن اَنت۔
آئی ءَ وتی جار ءِ گُڈ سر ءَ گْوشت کہ “بلوچی ءُ براہوئی مئے وتی شھدیں زبان اَنت” ءِ نام ءَ کُلیں ھنکین ماتی زبانانی میان استمانی روچ 21 فروری ءَ مراگش برجم بدار اَنت۔
Discover more from Balochistan Affairs
Subscribe to get the latest posts to your email.