نبشتہ کار: جاوید بلوچ
بلوچستان پہ اھوالکاری ءَ جھان ءِ تھار ءُ ڈُکّال تریں زمین زانگ بیت۔ ادا ھمے سیاسی گَل کہ وت ھم پارلیمانی سیاست کنگ ءَ اَنت، ھمے ھم گِلہ کن انت کہ مارا داں پارلیمنٹ ءَ دور دارگ ءِ ھاتر ءَ وتگڑیں پارلیمانی سیاسی گَل جوڑ کنگ بوتگ انت چو باپ پارٹی، وتگڑیں قبائلی شخصیت، میر ءُ سرداری ءِ نام دیگ بوتگ انت۔ ھمے وڑ ءَ بلوچستان ءَ مصنوعی یا وتگڑیں دانشور ءُ ففتھ جنریشن ور ءِ نام ءَ میڈیا آؤٹ لٹس، سوشل ایکٹویسٹ، ءُ سماجی گَل یا سول سوسائیٹی والا طبقہ یے ھم وجود داریت کہ آئی ءِ فنڈنگ کنگ، ادارگاں مراگش کنائینگ، یک وتگڑیں مثبت امیجے ءِ پیش دارگ ءِ کار کنگ ءَ اے ادارگ کار گِرگ بنت۔ اشانی ھم مول ءُ مراد ھمیش کہ اے یک نٹورکے ءِ بھر انت ءُ آ نٹ ورک بلوچستان ءِ گُٹگیر کُتگیں چاگرد ءِ تہ ءَ اگاں یک جاورے ءَ سر کش اِت گڑا آئی ءَ دگہ رنگے دیگ بہ بیت ءُ پد ءَ لاھور داں گْوادر ھمے تاثُر دیگ بہ بیت کہ بچار مئے توار یک اِنت۔
بلوچستان انفارمیش بلیک ھولے۔ یک انچیں تھاریں چاتیں کہ تھا چی بوھگ ءَ اِنت۔۔۔۔ ھچ درائی مہ کنت۔ ابید چہ این جی اوز کلچر ءِ لھتیں اکساں۔۔۔۔ بلے پد ءَ ھم لھتیں انچیں ایونٹ بنت کہ آ ”بلوچ ماس“ ءِ توار جوڑ بنت، بلوچ ءَ یکجاہ کن انت ءُ یک شورے بنا بیت۔ اے وَ راستی یے کہ شور وقتی بنت بلے شور ءِ توار داں دور ءَ روت۔ برمش، ھیات، کریمہ، گْوادر، ءُ زاھدان ءِ ھونی ایں جمعہ ءِ زھرشانی ءُ دگہ لھتیں انچیں وئیل ءُ ایونٹ بوتگ انت کہ آیاں بلوچ یکجاہ کتگ ءُ درآمدیں میڈیا ءُ این جی اوزانی دروشم ءَ بلوچ چاگرد ءِ دیم ءَ داتگیں وتگڑیں پوزیٹیو ماسک لگوشتگ ءُ جھان سھیگ کُتگ کہ بلوچستان ءِ تہ چیزے بوتگ۔۔۔۔
پد ءَ ھمے قوت بازیں زرانی ھرچ ءُ دارچ کنگ ءَ ابید ھم لاچار بوتگ انت کہ وت ءَ ھم ھوار بکن انت گوں، زائریں گپے کہ ایجنڈہ سیٹنگ تھیوری یا میڈیا فریمنگ ءِ رِد ءَ اشانی مول ءُ مراد ھچ بر اے وَ نہ بیت کہ بلوچستان ءِ ھمے رنگ ءَ پیش بہ دار انت کہ ھما وڑ بوھگ ءَ اِنت بلے اے لاچار بوتگ انت کہ وتی وڑ ءَ کمو باز بلے چیزے پیش بہ دار انت۔ اشانی واستہ چیزے سال پیسر ففتھ جنریشن وار ءِ یک کنسیپٹے بلکیں مزنیں منصوبہ ءِ تیار کنگ بوتگ ات۔ سک باز زرّ ھرچ کنگ بوتگ اَت۔ بلوچستان ءِ تہ ءَ یک نیٹورکے جوڑ کنگ بوت۔ بازیں بلوچ ورناہ ایکٹویزم ءُ مثبت رپورٹنگ ءِ نام زورگ بوت انت ءُ کار گِرگ بئیگ ءَ انت بلے یک انچیں وئیلے آیانی سرجمیں منصوبہ، زر ءُ اشتھاراں چون زوال کنت، اے مبارک قاضی ءِ نمیران بوھگ ءَ کُت ءُ پیش داشت۔
بلوچ داں وت ءَ لاھور ءُ درآمدانی چمّاں چاریت ءُ آیاں متاسر کنگ ءَ یل نہ دنت آ ایوک وتی وٹساپ کونٹیکٹ ءَ کہ ھما ایڈ انت، امینچک ءَ محدود بیت۔ یا فیس بک ءَ ھمایانی فیمنیسٹ، لبرل ءُ دانشور ھور انت ھمایانی تہ ءَ یک دانشورے لیکگ بیت بلے قاضی نہ بیت۔
ھمے گُٹگیریں جاوراں ھم پاکستان ءِ تہ ءَ سندھی میڈیا درساں گیش طاقتور اِنت۔ آئی ءِ سبب ھمیش انت کہ سندھی ءِ کرّا اشیی ءِ ارزشت گیشتر انت کہ کجام سرھال ءِ سر ءَ سندھی میڈیا چے گُشگ ءَ اِنت ناکہ لاھور ءُ اسلام آباد ءِ نیوز چینل۔ چیاکہ سندھی زانت کہ اے ڈیجیٹل دھر ءَ جھان ءَ وتی توار ءِ سر کنگ ءَ وتی زبان بس اِنت۔” اے مثال وَ سک مشہور انت کہ یک سندھی پوریاگرے پمے ھاتر ءَ ھالتاک نہ گپت کہ وانگ ئے زانت بلکیں پمشکہ زورایت ئے کہ بند مہ بیت۔ “ ھمے وڑ ءَ پشتو میڈیا اِنت کہ آیاں میان استمانی تک ءَ مزنیں نماھندگی ھست۔ بلوچ ءِ بدبھتی اِنت کہ بلوچ ءِ دانشور وت ءَ ھمے واستہ دانشور، فیمنست، پروگریسو یا مُلا ءُ میر ءُ سردارے کنت کہ من ءَ پِلانی انچو بہ گُش ایت۔۔۔۔ وت تؤ چی یے؟ درآمد ترا ھما چمّاں چاریت۔
بلے نمیرانیں قاضی درویش تھنا یک بلوچے اَت، آئی ءَ زند ءَ ھم امینچو شرپ رستگ اَت کہ کمو دنیاداری ئے پیش بہ داشتیں مرچی وتی یک لبزانکی ادارگ ءِ واھُند ات یا ھمک لھتیں روچاں پد بلاھیں مراگشاں پاگواجہ بوتگ ات بلے ناں ھما اَت ءُ ھما کہ آئی ءِ جند۔ ءُ ھمے رنگ ءِ تہ ءَ ھم چنچو رژناہ بوت۔۔۔
قاضی ءِ نمیران بوھگ ءَ پد گندگ بوھگ ءَ اِنت مرچی درآمدیں میڈیا ءُ ففتھ جنریشن وار ءِ میڈیا آؤٹ لٹس ھم بلوچ ءِ مُچی ءَ لاچار کُتگ انت کہ چیزے بہ گُش انت۔ ءُ قاضی ءَ وتی نمیران بوھگ ءِ میڈیا فریمنگ وت کُت۔
جاوید بلوچ گْوادر بلوچستان ءِ جاھمنند اِنت ءُ اھوالکاری ءِ نودربرے۔
Discover more from Balochistan Affairs
Subscribe to get the latest posts to your email.