نبشتہ کار: کے بی فراق
ہردیں بلوچ ءَ را راج کاری و جہدکاریءِ ردا گنداں تہ انچو سمابیت کہ اے یک انچیں چکاس ئےءِ جہدکارے کہ آئی ءَ ایوک زند ءِ یکیں چیدگ دیستگ ءُ مُلما اِنت ءُ چہ ہمیشی یے باج بری ءَ وتی سوب مندی سرپد بیت چوکہ ھقی ایں دروشم ءَ بچاراِت داں جاور دگہ رنگیں ءُ سرجم ایں نتیجگ ئے ءَ سھرا کنگ ءَ پہ ہمک تکءِ کارکنگءِ لوٹءَ کنت۔
بلے اے گپ ءَ کئے نوں بروت ءُ واجہاں سوج بہ کنت کہ دنیاءِ ایندگہ راج کاری یے بُن دپتر ایوک یکیں نمیران بوگءِ پیپر ءَ گوں معنادار نہ بیتگ ۔اے درگتءَ ھمک تک وتی نیمگءَ دلگوش گور کنگ ءِ لوٹءَ کنت۔
چوشکہ بلوچ ءِ گورا نمیرانی ءِ پیپر چہ بندات ءَ جوان ءُ شرتر انت گڑا سوگوہی ہمے گوش ایت کہ ایدگہ نیمگءَ دلگوش دیگ بہ بیت چیاکہ اے دگہ جہت سک باز نزور، بزگ ءُ نبوگءِ شونءَ دینت۔
البت بلوچءِ جہدکاری نمیرانی ءَ ابید سک باز ھُورک ءُ ھالی انت۔گڑا اے گپ گوں مھکمی ءَ جنگ بیت کہ پدا ھمے نیمگءَ دلگوش دیگی انت یا نا ایدگہ ادارتی، سیاسی، سماجی، زانشی ءُ معاشی ءُ وانگ و زانگی پِڑ ھمے دابءَ ارزشت دارانت ءُ استیں لس مھلوک ءِ تہا نندگ ءُ کارکنگ ھژدری بیت۔بیدے مھلوک ءِ شریداری ءُ زانشی جہتءَ سرپدی دیگءَ ھچ چُشیں جُنزے دنیا ءَ سوبمند نہ بوتگ کہ ایوک یکیں چیدگ اِش زُرتگ ءُ جہد کُتگ۔
پرے ھاترا بلوچ ءِ یکیں پیپرءِ نمبر ھمک وھدءُ زمانگءَ چہ سدءَ بُرز آتکگ ات بلے اے گپ سرپد بوگی اِنت کہ مردمے یاکہ راجے ایوک یکیں پیپرءِ سوبمندیءَ گوں سوبین نہ بیت بلے بلوچءِ گپ یکے کہ آ ایوک یکیں پیپرءَ دنت ءُ زندءِ چکاس ءَ سوبمند بیت۔
بزانکہ بلوچءَ دائما نمیران بوگ ءِ چکاس ءِ پیپر مدامی این وڑءَ شر داتگ ءُ پیداک اِنت بلے بیا کہ زندءِایدگہ تک ھان اوں سدءَبُرزآرگ کپ ایت گڑا راجے سوبین بیت۔
من سرپد نباں کہ ھما تک جوان ءُ شرتر بہ بیت انگت اوں گیش ھمائی نیمگءَ دلگوش بہ بیت گڑا اے یک نفسیاتی جیڑھے بیت کنت ءُ ایشیءَ ھمے درچءَ چارگ ءُ تپاسگ بہ بیت چیا کہ وتی ھمک جہتءَ را کرٹیکل تھنکنگ ءِ ردا چارگ ءُ تجزیہ کنگ ھژدری بیت ایوک یکیں جہتءَ زور جنگی نہ اِنت ۔ چاگرد ءُ چاگردءِ لس مھلوک کہ است اِنت، ایشیءِ تہا سیاسی، سماجی ،زانشی ءُ ایدگہ جہتءَ سرپدی دیگ کپیت ءُ موبلائزشن ءِ درچءَ گوں ریلیسٹک اپرووچ ئے ءِ دروشمءَ کارکنگ کپیت چیا کہ اے سپر ایوک گوں تراکءَ سرجم نہ بیت۔
چوشکہ مھلوک یک راھے ءُ سروک یک راھے ءُ یک دگرءَ سیالی اش مھکم ایں رنگے ءَ سھرا نہ اِنت۔چوش مہ بیت کہ کسے چہ سہ مِنزلءَ ماڑیءَ کپتگیں مردءَ بُروت اے جُستءَ بہ کنت کہ ترا کششِ ثقل ءَ چون وتی نیمگءَ ژپ اِت۔منی دلءَ مئے مردم ھمے کپتگیں مردمءَ فرسٹ ایڈ ءِ جاہءَ ھمے جُستءَ کننت کہ ترا کشش ثقل ءَ چون وتی نیمگءَ ژپ اِت۔وھدیکہ اے ساھتءَ آئیءِ زندگ دارگ یا زندگ بوگ ھژدری انت،اے رنگیں جُست ایشی ءَ پد اوں کنگ بنت۔البت ما دنیگہ ھمے دابیں جُست ءُ فیصلہ آنی ءُ کُتہ کاریانی میانءَ تکانسر ءُ مانگیش اِتگیں۔
پرے ھاتر جاوراں اے رنگیں دروشمے گپتگ ءُ ھمے رنگیں فیصلہ کنوک وتی جندءِ سرا گوں نگدی چماں چارگ ءَ گیش ھمے نگدی چماناں ناوشیں چمےءَ چارگءَ یاں کہ چیا چو ھال کننت ءُ زالبولانی اے رنگیں ھواری اِش سوج کتگ کہ اے درگتءَ پدا بیچار کنگ ءُ تجزیہ کنگ المی اِنت۔ چو مہ بیت ما وتی ھمک سرءَ بباہ بدایں ءُ آسرءَ چندے لاپ گار پہ سروکی ءَ پشت بہ کپ ایت ۔
چوشکہ انی اوں سروکی ءِ جاور ءُ آھانی راجءِ درگتءَ فیصلہ ساڑھگءِ ردا سوج کنگ نہ بیت ءُ نیکہ نگدی چماں گوں چارگ بنت بلکیں ھمک تکءِ مردم ءُ کارست ءُ ندکار اے درگتءَ الم بیدے تُرس و بیمءَ وتی درانگازی ءَ ءُ آبجیکٹیب انالیسز ءِ دروشمءَ الم ھوار بہ کنت چیا کہ اے جہد اے وھدءَ مھلوکءِ تہا موجودیں یک سائنسی ءُ نظریاتی بنیادءَ مھکم ایں سیاسی پارٹی ءُ ادارتی جہت ءَ گوں مھکم ایں باسک ءُ سروکاں چہ زبھریں چاگردئےءَ وتءَ سھرا نہ کنت۔پرے ھاترا جہد ایوک یکیں جہتءَ ھچبر وتی برتر نتیجگءَ ندنت۔کسے بہ نندایت ءُ ھال بہ کنت ۔ گوستگیں بیست سالءِ اے جہدءِ پوسٹ انالیسز بہ کنت ءُ بچارایت کہ ایشیءِ اے وھدءَ حاصلات چے رنگین اَنت ءُ ما کجا اُوشتاتگ ایں۔۔یا انچو پہ دیم روگی انت ءُ یک پدائی سرءِ دیگ ءَ پیش ھمے بگوش ایت کہ وتءَ قربان کنگءَ ساجو بئت ۔ءُ ھمے دابءَ روان کن اِت کہ آبسر ایوک ھمے دابءَ رس ایت۔دگہ ھچ اپشن نیست۔اے درجگءَ کسے بروت ءُ سر بہ بیت ءُ ایشی ءَ پد ایندگہ مھلوک ءَ گوں وتی سیالیءَ درست کُت مہ کنت۔جوانی یے نہ اِنت۔
ھمے درچءَ الم ھال بہ کن اِت ءُ چہ رومانس، واھشاتی، فرمائشی، جزباتی، واقعاتی، ردِ عملی ءُ ہیروورشپ ذہنیت ءُربیت درآھگ انت۔بلے کرد ءُ ند معکوس مہ بنت کہ دید چہ وتی دیدانک زبھر بہ بیت۔
گوں نمیرانیں بھگت سنگھ ءِاے گوشتنءَاے دوئیں لبزاں چہ شما موکل لوٹ آں۔
بے رھمیں نگد ءُ آجویں پگر، آشوبی پگرءِ دو بُنکی ءُ ارزشت داریں چیدگ انت۔
دلگوش: اے نبشتانک ءِ تہا درائیں حیال ءُ مارشت نبشتہ کار ءِ جند ئیگ انت۔
بلوچستان افیئرزءِ ادارہ ءِ ایشاں گوں تپاک بوھگ المی نہ انت۔
Discover more from Balochistan Affairs
Subscribe to get the latest posts to your email.