بلوچ اسٹوڈنٹس ایکشن کمیٹی خضدار ھنکین ءِ ھنکینی لس دیوان ھنکینی کمک کارمستر نوید بلوچ ءِ پاگواجہی ءَ اڈ دیگ بوتگ۔ دیوان ءَ مہمان ھاس مزن کارگشاد اظہر بلوچ ءٗ گچینی مهمان بنجاہی کمیٹی ءِ باسک پیرجان بلوچ ءُ بالاچ بلوچ ساڈی بوتگ انت۔ دیوان ءَ بنجاہی سرکیولر، گوستگیں ھنکینی اھوال، تنقیدی نشست، تنظیمی امور، ھندی و میان استمانی سیاسی جاورھال ءِ بنگپانی سرءَ دلجمی ء گوں گپ ءُ تران ءَ رند آوکیں گامگیج ءَ نوکیں ھنکینی کابینہ گچین کنگ بوتگ۔
بنجاہی سنگتاں تران کنان ءَ گُشتگ کہ سیاست وتی تہءَ پراہ ءُ شاہگانیں عمل ئے ءُ مدام برجاہیں مٹی ءُ بدلیانی نام اِنت۔ یک وھدے خضدار بلوچ سیاست ءِ بنجاہ بوتگ بلے وھدءِ ہمراہی ءَ زُوراور ءِ زُوراکی ءَ رند مرچی ما گِندیں کہ بلوچ نودر سیاست ءِ تہءَ خضدار ءِ مردمانی کمی گندگ پیداک اِنت۔ اِیشیءِ مزنیں سوب اے بوت کنت کہ مرچی بلوچ ورنا بے کساس ءَ گار ءُ بیگواہ کنگ بوھگ ءَ اَنتءُ اے جاورہالانی تہءَ ورنا تُرس ءِ آماچ بوتگ اَنت ءُ سیاسی گلانی بہر بوھگ ءَ نہ اَنت۔ بلے زوراور ءِ دیمءَ اُوشتگ ءِ واستہ ھاموشی ءُ کنارہ کشی حل نہ اِنت۔ اے زوراوری دارگ لوٹ اَنت ءُ دارگ ءِ واستہ سیاست المی انت۔ یک نودربر گل ئےءِ بستار ءَ ما جہد کنیں کہ خضدار ءِ تہءَ جِند ءِ جاہمننداں وتی ہمراہ بکنیں، بہ گِندےکسانیں کچ ئےءَ بلے مرچی گندگ پیداک اِنت کہ ما ورنا وتی ہمراہ کتگ اَنت بلے نُوں دیمترءَ ما خضدار ءِ تہءَ ورنایانی آوار کنگ ءِ واستہ مستریں جہدے کنیں۔
دیمترءَ بنجاہی سنگتاں تران کنان ءَ گُشتگ کہ خضدار ءِ تہءَ وانگی ادارہ چوناہءَ کم انت پدا ہمے ادارہ ہم جیڑہانی آماچ انت چوشکہ ڈگری کالج ئے است بلے بُنیاتی آسراتی ءَ چہ زبہر اِنت۔ ہمے ڈولءَ جھلاوان میڈیکل کالج وتی بنیاتی آسراتی ءَ زبہر اِنت ءُ آہیءِ انفراسٹکچر پرُشتءُ پروش ءِ آماچ اِنت۔سکندر یونیورسٹی ءِ بلڈنگ سرجما تیار اِنت بلے چار سال بیت کہ انگت وانگ بندات کنگ نہ بوتگ ءُ بلدنگ انچُوش تیار کتگ ءُ یل کتُگ- خضدار ءَ کُلیں وانگی ادارہانی جنجال بلوچ لٹریسی کمپئین ءِ وسیلہ ءَگل ءِ نیمگءَ چہ زورگ بنت ءُ جتائیں چِستءُ ایر کنگ بنت۔
دیوان ءَ سر جمیں بُنگپانی سرءَ گپ ءُ تران ءَ پد آؤکیں گامگیج ءِ تہ ہنکین ءِ گوستگیں کابینہ ھلاس کنگ بوتگ ءُ نوک گچین بوتگیں کابینہ ءَ شاہ نور بلوچ ھنکینی کارمستر، نوید بلوچ ھنکینی کمک کارمستر، جویریہ بلوچ ھنکینی کارگشاد، عزیر بلوچ کمک کار گشادءُ خلیل بلوچ ھنکینی ھالرسانی کارگشاد گچین کنگ بوتگ انت۔ دیوان ءِ گُڈ سرءَ بنجاہی سنگت ءَ نوک گچین بوتگیں ھنکینی سنگت سوگند دات انت ءُ نوکیں ھنکینی زمہ واراں وتی زمہ واریانی سرجم کنگ ءِ پیمان کُت۔
Discover more from Balochistan Affairs
Subscribe to get the latest posts to your email.