سمی دم درینگانے- چارمی بھر

زبیر بلوچ

١٩٨٨ءِ الیکشن ءُ بی این اے حکومتءَ کمو پیش زیا الحقءِ فضائی حادثہءَ رَند ملکی سیاست مٹ بیت جنرل الیکشنءِ اعلانات بنت۔ ادا بلوچستانءِ لیڈر شپ ووٹ ءُ الیکشنءِ بھر زورگءَ دلمانگ بیت ( پی این پی بیزان میر غوث بخش بزنجو ءُ آئیءِ ھم حیال ساری ءَ چے ووٹ ءُ الیکشن ءِ سیاستءِ سرا کنونس اِتاں ) ما ادا بی ایس او پارگ بوتگیں قیادتءِ گپءَ آں کہ بی این وائی ایمءِ سرا اے وھدءَ سیاست کنگءَ اِتاں ۔ اے بی این وائی ایمءَ زُور آں بی این ایم کننت ءُ الیکشن کمیشنءَ یک پارلیمانی پارٹی یے حیثیتءَ رجسٹر ئِے کننت ءُ ووٹ ءُ الیکشنءَ رؤگ ئے فیصلہ کناں۔ ناگتیں اے فیصلہءِ سرا بی ایس او لس بلوچ پوریاگر مززور ماہی گیر بزگر عام سیاسی کارکن مکرانءَ بگر داں جھلاوان سراوان ءَ بگر داں کچی ءُ بولان کراچی ءُ خلیجءِ کُلیں بلوچاں کہ ھر وھدءَ بی ایس او ءُ بی این وائی ایمءِ کمکار ءُ سپورٹر اِتاں بلائینڈ کلٹ ئے بنیادءَ بلوچ ءُ بلوچستان ءِ سرا جبر ءُ قھر ظلم و زوراکیانی ھلاپءَ قومی حق ءُ اختیار ءُ وت واجہی ئے ھاترا لیڈر شپءِ توار ئے سرا لبیک کت۔

اے پریکٹس چے ھدّاں داں سوب مند بوت چے ھدّاں سوب مند نہ بوت ایشیءِ سرا ھرکسی وتی زاتی نقطہ یے بوت کنت۔ بلے اے پریکٹس ایش اَت کہ پارلیمنٹءِ سالےءَ رند پروشگ اکبر خانءِ حکومتءِ سرا گورنر بلوچستان ظفر اللہ جمالی ئے ارش بلے پدا زوت عدالتءِ نیمگءَ چے بحال کنگ بیت۔ کمو وھدا رند ملکءِ اسمبلیاں غلام اسحاق خان پروشیت۔ اسمبلیءِ پروشگءَ رند بی این ایمءِ پْروشگ- اختر مینگل کہ سندھی بلوچ فرنٹءِ نیمگءَ چے لندنءَ سردار مینگلءَ راہ داتگ ات یا یک وفدےءَ بی ایس اوءِ پریس کانفرنس کہ ڈاکٹر یاسین بلوچءِ قیادتءَ کنگ بوتگ ات کہ ایشیءِ تہءَ سردار عطا اللہ مینگل نواب مری ءُ دگر بلوچ اکابریناں اپیل کنگ بوتگ ات کہ بیا اِں بلوچستانءَ یک قومی بلوچ پارٹی یے اڑ بِدی اَنت ءُ بلوچ راجی جنزءِ قیادتءَ بہ کناں۔ ( ہمے اپیل پدا بی ایس اوءِ پروشگ ئے یک واجھے زانگ بوت ) ۔ بی این ایمءَ دو ٹکّرا بیت۔ بلوچ سیاست بلوچءِ ثقافت بلوچءِ زندمان قومی انٹیگریشن و یکجتی ہمنچو روایتی مھلوکءَ نکس داتگ تینگہ استیں بلوچ تاریخءَ کسّا نہ داتگ ۔ دومی نیمگءَ ڈاکٹر حئی وتی بی این ایمءَ بی این ایم حئی کنت۔

اے ھبر چو روچءَ پدّر اِنت کہ بلوچءِ پارٹی پروش اَنت گڑا وتی انا ءُ زد ءُ بیر گیریءَ رو اَنت ھمے ھسابءَ سردار ءُ مڈل کلاس بی ایس اوءِ توکءَ لابئینگ شروع کناں ۔ گڑا مڈل کلاسانی نیمگ واجہ گلام مھمد ءُ سردارءِ نیمگءَ ایڈوکیٹ رحیم بلوچ ونڈے ونڈے گر اَنت وتی سنگتاں دئینت ۔ بی ایس او ساریءَ چے دو ات نوں سے بی ایس او بوت اَنت ۔ بی ایس او سھب، بی ایس او حئ، بی ایس او مینگل۔

روان انت