بلوچ اسٹوڈنٹس پرنٹ پنجگور ھنکین ءِ ھنکینی لس مجلس ءِ دیوان سنگت شاہ زیب بلوچ ءِ پاگواجھی ءَ برجم دارگ بوتگ، دیوان ءِ مِھمانِ ھاس بی ایس ایپ ءِ بُنجاھی پَتّر ءِ باسک امیر جیئند بلوچ بوتگ، اِے دیوان ءِ تہ ءَ پَجّاری نِشست، بُنجاھی سرکولر، گل ءِ کار ءُ آیوکیں گامگیج ءِ سر ءَ گپ ءُ باوست کنگ بوتگ۔
بلوچ اسٹوڈنٹس پرنٹ پنجگور ھنکین ءِ ھنکینی لس مجلس ءِ دیوان ءِ تہ ءَ بی ایس ایپ ءِ بُنجاھی پَتّر ءِ باسک امیر جیئند بلوچ ءَ تران کنان ءَ گْوشت کہ پنجگور ءِ ورنایانی تہ ءَ راجکاری ءِ سنچ ءِ ودی کنگ ءِ ھاتر ءَ مارا وانگجاھانی تہ ءِ نودربراں گْوں ھمگرنچ بوگی اِنت تاںکہ آ راجکاری ءَ سرپد بہ بنت۔ پنجگور ءِ تہ ءَ نودربر راجکاری نہ بوگ ءِ برابر ءَ اِنت، ھالاںکہ پنجگور ءِ تہ ءَ مزن شھدربرجاہ ھم ھست کہ آ ھود ءَ بازیں بلوچ ورنا وانگ ءَ اَنت مارا گیش ءَ چہ گیش بلوچ نودربر راجکاری پِڑ ءَ ھوار کنگی اِنت۔
دیمتر ءَ بی ایس ایپ ءِ بُنجاھی پتّر ءِ باسک امیر جیئند بلوچ ءَ تران کنان ءَ گْوشت کہ راج ءِ مروچیگیں ورنا آیوکیں باندات ءِ رھشون اَنت، مارا بلوچ نودربراناں وانگ ءُ راجکاری ءِ پِڑ ءَ زانت ءُ سرپدی دیگی اِنت۔ بازیں ورنا ھست اَنت کہ آیاناں اِے سرپدی نیست کہ ما کجام کارگل (ڈپارٹمنٹ) ءَ داھلہ بِہ زُور اَنت ءُ داھلہ ءِ چکّاس ءِ واست ءَ مارا کجام کجام کتاب وانگ ءُ چکّاس ءِ تیاری کنگی اِنت، اِے مئے وانندھیں ورنا کہ آ مزن شھدربرجاھاں وانگ ءَ اَنت گُڑا آیانی کیریئر کونسلنگ ءَ بہ کن اَنت تاں کہ آ وتی کارگل ءَ گْوں بندوکیں کتاباں بہ وان اَنت ءُ تیاری بہ کن اَنت تاں کہ آیوکیں روچاں مزن شھدربرجاھاں آیاناں وتی کارگل ءِ گچین کنگ ءَ اڈ ءُ جنجالی دیم ءَ مہ اَیت۔
آئی ءَ دیوان ءِ تہ ءَ وتی ھیال درشان کرت ءُ گْوشت کہ ھما وانگجاہ کہ آ بند اَنت، بازیں ماشٹر ھست اَنت کہ آ وانگجاھاں ساڑی نہ اَنت ءُ نودربرانی وانگی وھد ءَ زوال کنگ ءَ اَنت گُڑا مارا وانگجاھاں روگ ءُ دورہ کنگی اِنت تاںکہ ماشٹر وتی زمہ واری پیلو بہ کن اَنت ءُ بلوچ نودربراں گْوں دل پھکی بہ وانین اَنت۔ وانگ ءِ سنچ ءِ ودی کنگ ءِ ھاتر ءَ مارا وانگی مراگش اڈ کنگی اِنت۔ بے وانگ ءَ راج کدی ھم دیمروی کرت نہ کنت، الم ءُ زانت مردم ءَ تچکیں راہ پْیش دار ایت۔ اِے درگت ءَ ما زُوت ءَ چہ زُوت جُھد کن انت کہ یک وانگی مراگشے “ایجوکیشنل فیسٹیول” اڑ کن اَنت۔
دیوان ءِ گُڈ سر ءَ آیوکیں گامگیج ءِ سرھال ءِ سر ءَ سنگتانی درشان کرتگیں سر ءُ سوجانی سر ءَ چار ءُ تپاسگ بوت ءُ گل ءِ کارانی دیم ءَ برگ ءِ ھاتر ءَ توجیل زُورگ بوت اَنت، نوکیں کابینہ جْوڑشت ءِ واست ءَ گچین کاری ءِ وسیلہ ءَ چہ ھنکینی کابینہ ءِ سنگت گِچین کنگ بوت اَنت، شاہ زیب بلوچ ھنکینی کماش، کمک کماش معراج بلوچ، کارگشاد شاھد بلوچ، کمک کارگشاد مقبول بلوچ ءُ اعظم عمر شنگکار گچین کنگ بوت اَنت۔
دیوان ءِ ھلاسی ءَ چہ پیسر بی ایس ایپ ءِ بُنجاھی پَتّر ءِ باسک سنگت امیر جیئند بلوچ نوک گچین بوتگیں اگدہ داراناں گل سوگند دات ءُ آیاں اِے اَھد کرت کہ ما بی ایس ایپ ءِ لْوٹ ءُ گزرانی پابند بہ اَنت ءُ گْوں دل پھکی ءَ گل ءِ کارانی دیم ءَ برگ ءِ ھاتر ءَ وتی جُھد برجم دار اَنت۔
Watch Latest Videos
