انسانی حقوق کی عالمی تنظیم ہیومن رائٹس واچ نے پاکستان کے وزیراعظم عمران خان کے اسمبلیاں تحلیل کرنے کے اقدام پر تحفظات کا اظہار کرتے ہوئے اسے آئینی بغاوت قرار دے دیا۔
رپورٹس کے مطابق عالمی ادارے ہیومن رائٹس واچ نے اپنے بیان میں کہا پاکستان کے وزیر اعظم عمران خان کا عدم اعتماد کے ووٹ کا سامنا کرنے کے بجائے پارلیمنٹ کو تحلیل کرنے کا اقدام پاکستانی شہریوں کو اپنی حکومت کے انتخاب کے حق سے محروم کرنے کے مترادف ہے ۔
بیان میں مزید کہا گیا ہے کہ اس اقدام نے پاکستان کو سنگین آئینی بحران میں دھکیل دیا ہے ۔
خیال رہے کہ وزیر اعظم عمران خان کے خلاف اتوار کے روز تحریک عدم اعتماد پر ووٹنگ ہونی تھی تاہم ڈپٹی اسپیکر قومی اسمبلی نے تحریک کو آئین کے خلاف قرار دے کر مسترد کردیا۔
قرارداد مسترد ہونے کے بعد عمران خان نے اپنے خطاب میں صدر پاکستان کو اسمبلی تحلیل کرنے کا کہا جس کے بعد صدر عارف علوی نے قومی اسمبلی تحلیل کردی۔