فضل بلوچ
ما ھر وھد ءَ نبشتہ کن ایں کہ زبان راجانی پجّار اِنت بلے مرچی ھمے پجّار گار ءُ بیگواہ کنگ بوگ ءَ اِنت وتی زبان ءِ گار ءُ بیگواہ کنگ ءَ منی ءُ تئی دست مان اِنت۔ اے گپ من ءَ ءُ ترا سرپد بوگی اِنت کہ وھدے کہ ما گْوش ایں مئے زبان گار ءُ بیگواہ کنگ بوگ ءَ اِنت، ایشی ءِ زمہ وار من ءُ تو اَنت من تو سرپد اَنت کہ یک راجے ءِ وانِندگ کہ وتی راجی زبان ءَ نہ وان اَنت ءُ نبشتہ نہ کن اَنت گُڑا آ زبان ءِ گار ءُ بیگواهی دیر نہ کنت منی ءُ تئی زبان ءَ دری مردم گار ءُ بیگواہ کنگ ءَ نہ انت- آ منی تئی جند ءِ زبان ءَ گار ءُ بیگواہ کنائینگ ءَ اَنت، دری زبان اِش آرتگ ءُ مئے سرا مُشتگ، من ءُ تو یک مچی ءَ یکجاہ کہ نند انت ، دری زبان ءَ گپ کن انت، وتی زبان ءِ گپ کنگ ءَ من ءُ تو میار کن اَنت۔
مرچی مئے کِرّ ءَ چُشیں ادارہ ھم نیست کہ مئے وتی مادری زبان وانینگ بہ بیت، ما کدی اے ھم جھد نہ کُرتگ کہ مئے مزنیں شاھدربرجاھانی تہ ءَ مئے زبان ءِ کارگلے بہ بیت، مئے زبان ھم چو دری زبانانی وڑ ءَ وانینگ بہ بیت، مرچی مئے جند ءِ سر زمین ءِ سرءَ یک دری راجے کیت پہ پْوریاگری ءِ واست ءَ مئے جند ءِ سر زمین ءِ مال ءُ مڈّیاں بارت آئی ءِ ھوار وتی زبان ءَ ھم مئے سر ءَ مُشگ ءَ اِنت، کہ شما بلوچاناں اے زبان دربرگ لوٹ ایت، اگاں ما بہ چار ایں کہ آ یک دری راجے اتکگ مئے جاہ ءَ آئی ءَ را مئے زبان دربرگ لوٹ ایت بلے ما کدی ھم اے نہ جیڑ اِتگ کہ اِد ءَ مئے زبان گار ءُ بیگواہ کنگ بوگ ءَ اِنت ما ھمے سرپد بوگ ءَ اَنت کہ ما یک دومی زبان ءِ دربرگ ءَ اَنت، بلے آ راج اِد ءَ اتکگ کمّیں وھد ءِ واست ءَ آیانی شمار ھم کم اِنت، بلے پد ءَ ھم آیانی زبان ءَ دربرگ ءَ اَنت، ما اے گپ ءَ نہ جیڑ اَنت کہ مئے جند ءِ سرزمین اِنت، اگاں آ اتکگ مئے مِھمان اِنت گُڑا باید وَ ھمیش اِنت کہ آ وت مئے زبان دربرگی اِنت، آئی ءِ واست ءَ بلوچی ادارہ جوڑ کنگ بہ بیت ءُ بلوچی وانینگ بہ بیت تاکہ دَریں راج ھم تئی زبان ءَ ھیل بہ کن اَنت ءُ آئی ءَ ھوار تئی زبان ءِ دیمروی ھم بیت۔
اگاں مرچی اے راج کہ گنگ ءُ بے توار اِنت وتی زبان ءِ ارزشت ءَ نہ زانت کہ آئی ءَ چہ آئی ءِ ماتی زبان پُلگ بوگ ءَ اِنت۔ مرچی تئی زبان ءِ سر ءَ دری زباناں ارش کُرتگ تئی زبان دری زبانانی چیر ءَ چیر ترّگ ءَ اِنت نو بہ جْیڑ پہ وتی زبان ءَ ، بہ جیڑہ پہ وتی زبان ءِ زندگ دارگ ءَ ، وھدے کہ تو لوٹ ئے ، تو یک زندگیں راجے ءِ دروشم ءَ بہ مان ئے گُڑا ترا جُھد کنگی اِنت پہ وتی زبان ءَ ، تاکہ تئی زبان زندگ بہ مان ایت گُڑا تو زندگ مان ئے، تو زندگ مان ئے، تئی راج تئی ھاک زندگ مان ایت۔
تو لوٹ ئے کہ تئی راج زندگ بہ مان ایت گُڑا وھد ھمیش اِنت وتی زبان ءِ رکینگ ءِ جُھد ءَ بہ کن اگاں اے وھد ءَ تو وتی زبان رکینت کُرت نہ کرت گُڑا اے وھد چہ تئی دست ءَ چہ شُت بہ زان تئی زبان چہ تئی دست ءَ شُت، وھدے کہ تئی زبان تئی دست ءَ چہ شُت بزان تئی بیگواھی اِنت ءُ تئی راج ءِ بیگواھی اِنت۔ تئی راج ءِ پجّار گار بیت۔
Discover more from Balochistan Affairs
Subscribe to get the latest posts to your email.