عزت اکیڈمی پنجگور ءِ لس مجلس ءِ دیوان برجم دارگ بوتگ، اے دیوان ءِ تہ ءَ اکیڈمی ءِ باسکاں بہر زرتگ۔
دیوان ءِ بندات گوں سکریٹری رپورٹ،مالی رپورٹ ءُگچینکاریانی آسر،سئے ایں اینجنڈایاں بوتگ۔
دیوانے بندات ءَ اکیڈمی ءِ پیسریگیں کارگشاد اقبال زہیر بلوچ ءَ دیوان ءِ دیم ءَ سکریٹری رپورٹ ونتگءُ اکیڈمی ءِ سئے سالانی کار ءُ کردانی سرا سرجمیں چمشانکے داتگ۔
دومی ایجنڈہ ءِ رد ءَ اکیڈمی ءِ پیسریگیں کماش خدارحم شوہاز ءَ دیوان ءِ دیم ءَ مالی رپورٹ ونتگءُ سرجمی ءَ مالی آمدن ءُ خرچ باسکانی دیم ءَ ایر کتگ انت۔
لس مجلس ءِ باسکاں ءَ دوئیں رپورٹانی سرا تران کنگ ءَ پد آیاں ءَ من اتگ۔
گڑی ایجنڈہ ءِ رد ءَ سئے باسکی گچینکاری ڈل کہ آیانی تہ ءَ ڈاکٹر سعید علی (کماش)، پروفیسر مشتاق گچکی (باسک)، نادر بلوچ (باسک) ہوار ات انت، ہمے ڈل ءِ کماش ءَ دیوان ءِ دیم ءَ گچینکاریانی آسر ءِ جار جت انت۔
اکیڈمی ءِ سرجمیں مجلس ءِ باسک بےمقابلہ گچین بوتگ انت کہ آیانی نام چوش انت،ملا مراد بلوچ (کماش)، صبرین نزیر (کمک کماش)، ودود عبدل (کارگشاد)، سعید عزیزاللہ (مالی کارگشاد)، پیرجان نعیم (شنگکاری کارگشاد) گچین کنگ بوتگ انت۔
پروفیسر اکبر غمشاد، خدارحم شوہاز، اقبال زہیر بلوچ، صابر سید، غلام جان غلام، عتیق شے مرید باسک ھوار بوتگ انت۔
گڈسراں گچینکاری ڈل ءِ باسک پروفیسر مشتاق گچکی ءَ مجلس ءِ نوک کچین بوتگیں اگدہ دار ءُ باسکاں ءَرا سوگند داتگ۔
نوک گچین بوتگیں کماش ملا مراد ءَ دیوان ءِ اتکگیں باسکانی منت گپتگ ءُ دیوان آسر کنگ جار جتگ۔
Watch Latest Videos
