سر بوتگیں ھالانی رِد ءَ یکشمبے ءِ روچ ءَ چار بج ءَ دران ءَ ماھیگ ءِ شکار ءَ ھپت مردم وئیل ءِ آماچ بوتگ ات کہ چہ اشاں دو ٹپیگ ، یکے بیران ءُ چار انگت ھاکانی چیر ءَ انت۔
ھالانی رِد ءَ انگت دران ءَ چیر تراِتگیں مردمانی کشگ ءِ ھاتر ءَ ھچ دیمرئی نہ بوتگ۔
زیکیں بندات بوتگیں کار دوشی دارگ بوتگ ءُ مرچی پد ءَ بندات کنگ بوتگ۔
زانگ بہ بیت کہ مرچی سیمی روچ ءَ انگت کوہ ءِ کپے ءِ ڈُرگ ءَ چہ چار ورناہ ھاکانی چیر ءَ اَنت۔
ھندی مردمانی گُشگ انت کہ وئیل ءَ کلاکے ءَ رند اے ھال شنگ بوتگ بلے واکدارانی نابودی ءِ سبب ءَ آ دومی روچ ءِ نیمروچ ءَ جاگہ سر بوتگ اَنت ءُ زی آیاں گوں دو کَل جنوکیں مشیناں شوھازگ ءِ کار بندات کُتگ بلے دوشی پد ءَ کار دارگ بوتگ۔ مرچی سیمی روچ ءَ ھم چیر تراِتگیں ورنایانی شوھازگ ءَ ھچ حاسیں دیمرئی نہ بوتگ۔
بیران بوتگیں گونڈل ءِ نام تبریز نصیر بوتگ ءُ بیگواھیں مردمانی نام جواسد نوربخش، نجیب مولداد، ضمیر شاہ ءُ شُجاع نصیر انت۔
دمگی مردمانی گُشگ انت کہ گْوادر ءِ ضلعی واکدار وتی تمبو جتگیں اکساں سوشل میڈیا ءَ شِنگ کنگءَ اَنت کہ آ شپ ءُ روچ کار ءَ اَنت، بلے دومی واکدارانی نزوری ءِ سوب ءَ مرچی سئے روچ سرجم بوتگ بلے ھچ وڑیں دیمرئی گندگ بوھگ ءَ نہ انت۔
زانگ بہ بیت دومی نیمگ ءَ چاگردی رسانکدر آں بازیں ویڈیو ھم شنگ کنگ بوتگ ات کہ آیانی تہا ھندی مردم وتی تکانسری ءَدرشان کنگءُ گُشگءَ انت کہ واکدارانی نیمگ ھچ حاسیں گامگیج زورگ نہ بوتگ۔
آیانی گُشگ انت کہ ادارہ ایوک اکس کشگ ءِ وھد ءَ ساڑی انت پد ءَ آپُشت ءَ مان دینت ءُ رو اَنت۔
اگاں ادارہاں بہ لوٹ اِت انت گڑا مشینری ءِ کمک ءَ چیر تراِتگیں مردم یکیں روچ ءَ کشگ بوتگ ات انت بلے واکدارانی نابودی ءُ ایوکیں اکسکاری ءَ چہ مرچی سیمی روچ اِنت کہ ھچ دیمرئی نہ بوتگ۔
Watch Latest Videos
