جی سیون کا روسی سونے کی درآمد پر بھی پابندی لگا دینے کا فیصلہ

امریکی صدر جو بائیڈن نے آج اتوار کے روز کہا کہ امریکہ اور جی سیون کے رکن باقی چھ ممالک اپنے ہاں روسی سونے کی درآمد پر بھی پابندی لگا دیں گے۔ بائیڈن کے مطابق اس اقدام کے بعد یوکرین پر فوجی حملہ کرنے والا روس اقتصادی طور پر اور بھی تنہا رہ جائے گا۔ بائیڈن اور چھ دیگر عالمی رہنما آج سے جی سیون کی اس تین روزہ سمٹ میں حصہ لے رہے ہیں، جو جنوبی جرمنی میں ایلماؤ کے مقام پر ہو رہی ہے۔ اس سمٹ میں روسی یوکرینی جنگ کے ساتھ ساتھ توانائی کی فراہمی کو محفوظ بنانے اور عالمی سطح پر بڑھتی ہوئی مہنگائی کے بحران سے نمٹنے کے لیے مؤثر اقدامات کے بارے میں بھی بات چیت کی جا رہی ہے۔