بلوچستان افیئرزءِ حاصیں رپورٹ
:لندن ڈیسک
“بلوچستان ءَپارلیمانی سیاست ءَوتی سندءُباریگ جتگ ءُآسربوتگ نوں دگہ چوشیں اوست ءُامیتے پشت نہ کپتگ “۔اے رِدءِگشوک بازیں ورناہ انت کہ آپاکستان ءِپارلیمانی سیاست ءَسوکیگ کتگ انت ۔گوں بازیں ورناہاں جتاجتائیں مجلساں ہمے گپ ءُگال اِش کنگ بنت کہ داں سیاسی عمل ءِجندآزات ءُوت واک نہ بیت پارلیمنٹ ءَسربوؤکیں ہمک گچین بوتگیں نمائندہ شکیگ انت۔بزاں آسوب مندکنگءَکوپگ چیردیئگ ءُسرکنگ بوتگ۔اے گپ ءَہمک بلوچ سرپداِنت کہ بلوچستان ءَ1988ءَبگردانکہ 2018ءَبوتگیں گچینکاری مقتدرہ ءِواہشت ءِپدءَبرجم دارگ بوتگ انت۔
گوستگیں روچاں دیوانے ءَسرکارءِٹوہیں ادارہے ءِمزنیں اُگدہ دارے ءَہمے گپ جتگ کہ چیریں ادارہ ہم پرے گپ ءَبَہمنتگ انت کہ بلوچ ورناپُرتشددجوڑبوتگ انت۔چہ 10ورناہاں 3ورناہ انچین بنت کہ آجنگ ءُمِڑءِپَلہ مرزبنت۔ اے گپ ہمے راستی ءِشونداری ءَکنت کہ ماں ورناہاں پارلیمانی سیاست ءَاوست دارگ ءِکساس سک کم پشت کپتگ۔
پاکستان ءِمقتدرہ ءَاے راستی ہچ رنگ ءَاثرمندنہ کنت کہ پاکستان ءِیک مزنیں زمین ءِبہرگے کہ بلوچستان ءِنام ءَزانگ بیت اوداایمنیں سیاست ءِجاگہ ءَتشددوتی پنجگاں ایردیان انت۔احوال کارءُتاریخ زانت گشنت کہ بلوچ ورناہ اے جاہ ءَکئی ءُکجام عمل ءِسوب ءَسربوتگ انت گورے گپاں آہاں ہچ پیمیں سرءُکارے نیست۔ پراہاں بس بلوچستان سلامت بہ بیت۔
سیاسی عمل ءِبے گِرءُداربوئگ ءُتشددءِجاہ ءَایمنی ءِواہگ چون رودینگ بیت۔ بلوچ چاگرءَزندءِہمک پڑءَسَیل بکن اے راستی جتاجتائیں دروشم ءَوتی ہست بوئگ ءِنشانداری ءَکنت۔ بلوچی لبزانک بہ بیت یاساززیمل ،احوالکاری بہ بیت یاچاگردی رسانک جاہ ہمک کَس وتی درشان ءَہمے مارشتاں گوں کنت ۔
ماں لبزانک ءَورناہانی لچہ کاری ءُکسہ کاری ءَبگندگیشترانچیں بنگپاں تخلیق سازی کنگ بیت ۔آہانی تخلیقاں چہ چاگردءَناوس بوئگ ءُباطنی پُرشت ءُپروش ءِاظہارءَابیدجنگ کنوکیں ورناہانی توصیف کنگ بیت ءُاے دگہ ورناہ سکین دیئگ بنت کہ بائدہمک کَس ہمے راہ ءَبہ رؤت۔
ہمے رنگ ءَساززیمل ءَجنگ ءُوطن دوستی ءِمارشتاں نبشتگیں تخلیق گشگ بنت ۔اگاں ورناہے جنگ ءِپِڑءَوتی سرءَبہ باہینیت پرائی ءَپہربندوکیں جزبگ درشان کنگ بنت۔
ہمے رنگ ءَبلوچ احوال کاری ءَگوں جنگ ءُمِڑءِباروءَگیشترنبیسگ ءِرجحان گندگ بیت۔احوال کاری ءِپِڑءَہماورناہ گیشترکارءَہدوک انت کہ آوت بندیگ بوتگ انت یاآہانی کَسءُ وارس مقتدرہ ءِپالیسیانی سوب ءَآوارجنگ ءُبندیگ یاکُشگ بوتگ انت۔ احوال کاری ءِپِڑءَہماورناہم گیش دیماانت کہ چہ پارلیمانی سیاست ءَاختلاف دارانت یاآچاگردی گِرءُبندءِہلاپ انت۔
ہمے رنگءَ چاگردی رسانک جاہ ءَجتاجتائیں پِڑاں تعلق داریں ورناہ روچءُ شپ پہ چاگردی دیمروی ءُراج دوستی ءِجزبگاں چست ءُایراں ہواراَنت۔ ءُورناہ بازیں سوب مندیں جہدکنگ ءَانت۔
بلئے دومی نیمگ ءَماگندیں کہ بلوچ داناءُسوہوئیں راج دوست انگت ہم پارلیمانی سیاست ءَاوست بندوک انت آواب گندانت کہ بگندئے روچے ناروچے پاکستان ءِمقتدرہ ءِتلاریں دل پہ مئے بزگی ءُدرتہ پُچی ءَآپ بیت ءُجارءِبادشاہی پِرّینگ بیت کہ چہ مروچی ءَپدکَس ہم بلوچستان ءَگچینکاریاں وتی دل ءِتب ءِمردماں گچین نہ کنت ءُپارلیمنٹ ءِبکملیں تخت ءِسرءَنہ نادینیت۔
بلئے اے گپ ءَہمک بلوچ زانت کہ اے واب انت ءُہماواب کہ اشانی راست بوئگ نوں پنجاب ءِجاہمننداں ہم باورنہ کنت۔
پمشکہ اے جُست ءِانگریں تورشت مردم ءَنندگ ءَنئیلیت کہ گڑابلوچ ءِآکبت چون بیت ۔ ہماآکبت کہ آئی ءِجوڑکنوکانی مزنیں بہرے ماں بندیگ جاہاں “مسنگ پرسن” دِل بُرّیں نام ءَلَٹ ءُکُٹ بوئگ ءَانت ءُیک بہرے چرے پارلیمانی سیاست ءَتراس گپتگ ءُجنگ ءُمِڑءَلانک بنداِنت ۔ہست چوشیں دانائیں سَرے کہ وتی ٹَکّی ءُحاندانی سیت ءُنپ ءَیک کِربکنت ءُہبرءَپہ ہدابہ کنت، بِلّ اِت کہ برات وتی لَٹ ءَوت وارت۔
بلئے بگندئے اے گپ چوش مانابہ بیت کہ آس ءَگوں آس ءُآسن ءَگوں آسن مِڑءَدیم پہ دیم کنگ ءَمہتلیں ورناہ گوشدارگ بہ بنت ءُگوراہاں یک انچیں راہے ءَتپاک کنگ بہ بیت کہ بلوچ ءِرِتکگیں ہون ءُرپتگیں سَرءِمزن شانی سلامت بہ بیت ءُبندیگ دوبرواتربہ بنت ءُلانک بندیں ورناوتی ڈیھ ءَپہ بے تُرس ءُلَرزآسودگی زندکُت بہ کننت ۔بلئے اے گرانیں گَٹّ ءِگُشادکئی کِرّءَبیت یاپرے گُشادءَورناہانی چم کجام نیمگ ءَسکّ بنت ،دنیاءِروبرکتی حاکم چے گشنت ،اے جُست ءَآہاں کئے کنت ۔
Watch Latest Videos
