برطانیہ کے بادشاہ شاہ چارلس سوم نے رشی سوناک کو ملک کا نیا وزیراعظم مقرر کردیا۔
بِکنگھم پیلس کی جانب سے تصدیق کی گئی ہے کہ شاہ چارلس سوم نے رشی سوناک کو برطانیہ کا نیا وزیراعظم مقررکردیا ہے۔
وزیراعظم مقرر کیے جانے کے بعد ٹین ڈاؤننگ اسٹریٹ پر اپنے پہلے خطاب میں رشی سوناک نے سابقہ وزیراعظم لزٹرس کو خراج تحسین پیش کیا۔
انہوں نے کہا ہے کہ برطانیہ کو اس وقت بڑے معاشی بحران کا سامنا ہے جس کی وجہ سے انہیں وزیراعظم کے دفتر کے لیے چنا گیا ہے تاکہ وہ سابقہ حکومت کی غلطیوں کو سدھار سکیں۔
نومنتخب وزیراعظم کا کہنا تھا کہ لز ٹرس نے تبدیلی کے لیے انتھک محنت کی لیکن ان سے کچھ غلطیاں سرزدہوئیں۔
رشی سوناک نے کہا کہ وہ بورس جانسن کے بطور وزیراعظم لیے گئے زبردست اقدامات پر ہمیشہ ان کے شکر گزار رہیں گے، اب ان کی حکومت میں ہر سطح پر دیانتداری، پروفیشنلزام اور احتساب نظر آئے گا۔
