بلوچ راجی جنز ءُ بلوچ نیشنلزم | بلوچستان افیئرز ایڈوٹوریل

کساس هپتاد ءُ پنچ سال ءَ پیسر وهد ءِ پاکستان کیت ءُ بلوچستان ءِ سرا کبزا کنت،  اِے کبزا ءِ وهد ءَ بلوچستان ءَ کساس شش ماه بیت که چه انگریز ءِ سد سالیگيں گلامیءَ چُٹ اتگ ءُ نوکیں بلوچستانے ءِ ٹاهینگ ءَ دست گٹ اِنت. بلے انگريز ءِ پالیسی په بلوچستان ءَ‏ انگت ءَ آزادی ءُ وت وجهی ءِ پالیسی نا اِنت. نوکیں بلوچستان ءُ سد سال پیسریگيں بلوچستان ءِ نیام ءَ مزنیں پرک ءُ درکے موجود  اِنت.

نوکیں بلوچستان وتی بازیں هند ءُ دمگاں چه زبهر اِنت ءُ همنکس کمزور اِنت که وتی پرشتگيں ٹُکرانی نام ءَ گيپت نه کنت. انچوش نزور ءُ نا توان اِنت که وتی جندے بهراں داشت نه کنت ءُ پاکستان مکران، خاران ءُ لسبیله ءَ اوں چه نوکیں بلوچستان ءَ سندیت ءُ گوں وتا بارت. راجدپتر مکران، خاران ءُ لسبیله ءَ ستّر میاریگ به کنت بلے وهدے که تئی آپ ءُ دانه کسے ءِ دست ءَ ببیت تو آ مرد ءِ دیم ءَ چوں سُرپُر کت کنے؟

بلے هیر یک چیزے که نوکیں بلوچستان ءَ چه کوهنیں بلوچستان ‏‏ءَ گِستا کنت آ نوکیں بلوچستان ءِ ورناهانی سیاسی ءُ تعلیمی بیداری اِنت که پاکستانی کبزا ءَ سد سال پیسر، انگریز ءِ کبزا ءِ وهد ءَ نه بوتگ. اِے سیاسی بیداری بیستمی سدی ءِ بندات ءَ بُنگيج بیت ءُ پاکستان ءِ کبزا ءِ وهد ءَ انگت ءَ ردوم گِرگ ءُ توانا بوگ ءَ اِنت. اِے سیاسی بیداری نا تهنا بلوچ سیکولر ورناهانی تها بوتگ که آهاں پاکستان ءِ جبری کبزا نه منّتگ بلکن ءَ بلوچستان ءِ پارلیمنٹ ءَ ساڑی ایں نواب ءُ سرداراں بگر داں که پارلیمنٹ ءَ ساڑی ایں ملا هاں کسے اوں اِے جبری کبزا ءِ حق ءَ نه بوتگ. بلے انگت ءَ سیاسی، مالی، سفارتی ءُ دگه بازیں پڑ ءَ بلوچستان چه پاکستان ءَ نزور تر ءُ کمزور تر بوتگ. پمشکه وتی آجوئی ءِ دارگ په بلوچستان ءَ گران بوتگ ءُ پاکستان ءَ بلوچستان گيپتگ. بلے بلوچ ءِ سیاست ءِ ردوم پاکستان ءَ داشت کُت نه کرتگ۔ بلوچ ءَ برے استمان گل ءُ نیشنل پارٹی ءِ رنگ ءَ وتی سیاسی چِست ءُ ایر برجم داشتگ اَنت ءُ برے بی۔ایس۔‏‏او ءُ ایندگه ناماں. پاکستان ءَ بلوچ ءِ سیاسی راهشون مدام ٹارگٹ کتگ اَنت که بلوچستان ءِ سیاسی میدان ءَ ‏‏هالیگ بکنت ءُ وتی داشتگيں سیاستداناں چه اِے هالیگيں میدان ءَ پُر بکنت. آئی ءَ وتی بازیں سیاست دان  آؤرتگ ءُ بلوچستان ءِ سیاسی میدان ء‏َ مان گيپتگ اَنت. بلے بلوچ ءَ وڑے نه وڑے ءَ وتی بلوچيت ءِ سیاست اوں برجم داشتگ. مروچی هما مردوم که بلوچستان ءِ سیاسی میدان گندگ بنت 1948 ءَ ایشاں چه کس اوں پیداک نه بوتگ.

بلے بلوچستان ءِ هما که سیاسی موقف گوستگيں 75 سالاں بوتگ آ انگت ءَ هما وڑا اِنت. بلوچستان ءِ قوم دوستی ءُ قومپرستی سیاست انگت ءَ یا تو جنگ ءَ اِنت آجوئی لوٹگ ءَ اِنت یا دومی بهر اِنت که پاکستان ءِ الکٹورل سیسٹم ءَ بهر زوریت ءُ صوبائی خودمختاری لوٹیت. بلوچ ءِ سیاسی بهر ءُ بانگ ءَ بلو‏چ راجی جنز تاؤن وا داتگ بلے بلوچ راجی جنز، هر دوهیں بزاں پارلیمانی قوم پرست پارٹی ءُ آزادی پسند پارٹیاں دوهیناں بلوچ نیشنلزم ءَ را raw material در گيپتگ ‏‏ءُ داتگ مسلاَ شهید گلام ممد، لالا منیر که هردوهیں کوهنیں بی-این-ايم ءَ ڈاکٹر عبدالحئی ءُ ڈاکٹر مالک ءِ لیڈرشپ ءَ کار ‏ءَ بوتگ اَنت، بلے رند ءَ همے مردوماں  که بلوچستان ءِ آزادی پسند تحریک ءِ دیمروئی ءِ هاترا کار کن اَنت ، جنّگ بنت ءُ بلوچستان ءِ هاک ءَ نمیران بنت.

همے هساب ‏ءَ چیئرمین خلیل که بی ایس او (بی۔این۔پی مینگل)  ءُ ڈاکٹر الله نزر بی ایس او  (بی۔این۔ایم ) ءِ اُگده دار بوتگ انت۔ بلے مروچی په بلوچستان ءِ آجوئی ءَ جد ءُ جُهد کنگ ءَ اَنت۔ اسل ءَ بلوچ ءِ پارلیمنی سیاست ءَ هپتاد ءِ دهک ءَ ، هشتاد ءُ نوّد دهک ءَ اوں آزادی پسند پیداک کتگ ، بلے پارلیمانی سیاست ءَ چه بلوچ آزادی پسند گيشتر 2000 ءِ دهک ءَ جوڈ بیت،  وهدے بی۔ایس۔او وتا چه پارلیمنی سیاسی پارٹیاں آزاد کنت ءُ ‏بی۔این۔ایم ء‍َ گلام ممد نوک کنت۔ بلے بلوچ سیاست ءَ اِے ٹرنزیشن مدامی بوتگ ءُ دیم ءَ انگت ءَ بیت۔ وهدے اِے ٹرانزیشن لازم ءُ ملوزم اِنت گڑآ اِے سیاسی تقسیم بلوچ راجی جنز ءِ raw material پد جنّگ ءُ درگيجگ ءِ پروسسس ءَ نزور کنت۔ همے سوب اِنت که همک دهک ءَ پاکستان ء‍َ اوں جهد کتگ که بلو چستان ءِ سیاسی میدان ءَ  وتی مردوم اوں مان بکنت ءُ اِے سلسله ءَ  هپتاد ءِ دهک ءَ بگر داں روچ ء مروچی برجاه اِنت. پرچه که پاکستان اِے زانت که بلوچ آزادی پسندی ءِ روٹس، بلوچ قوم پرستی ءِ یک پروسسے ء‍َ گوں بندوک اِنت ءُ اِے پروسس بلوچ قوم پرستی ءِ سیاسی تقسیم ءِ باوجود بلوچ ءِ هردوهیں سیاسی فکٹریاں بوهگ ءَ اِنت. همے پروسس پاکستان ءِ ٹارگٹ ءَ اِنت.

بائید اِنت که بلوچ ءِ هردوهیں گرو‏پ بزان اَنت که پرچه بلوچ چاگرد بار بار چاگردی جنز  یا سوشل مومنٹسانی کمک ءَ بلوچ ءِ جیڑه ءُ جنجلاں ایڈریس کنگ ءِ جهد ءَ کنت. بوت کنت که همے واسته اِے سوشل مومنٹس بوهگاں اَنت که بلوچ ءِ سیاسی تقسم ءَ بلوچ  سیاسی پارٹی نزور کتگ اَنت ءُ چاگرد ءَ مارتگ که سیاسی پارٹیاں چاگردی چینجز ءُ چيلنجزاں گوں کار نیست  گڑا بائد اِنت که چاگرد وتی ٹپّاں وت درمان بکن. بلے دیر وا انگت ءَ نه اِنت‏. بائد اِنت بلوچ سیاست ءِ دوهیں سکشن بلوچ يکجهتی کمیٹی ءِ ڈیمانڈانی سرا گوں بلوچ یکجهتی کمیٹی ءَ هور کار بکن اَنت ءُ اِے تسلسل ءَ آ ئندگ ءَ اوں بدار اَنت، دانکه بلوچ قوم پرستی ءِ پروسس تسلسل ءَ گوں برجاه ببیت ءُ بلوچ راجی جنزے raw material ءِ درگيجگ ءِ پروسس ءُ پروڈکشن مه اوشیت…….