نبشتہ کار: ھاتر اسلم
سکیں سارتی یے ءَ میتگ پتاتگ اَت ھر کس لوگانی توک ءَ اَت ءُ شپ ءَ وتی بادشاھی بنا کتگ اَت. مُشریپ ءُ بالاچ چہ ڈگاراں پیداک اِت اَنت. مشریپ ءَ چہ کسانی ءَ شپ ءَ ڈگارانی ترّگ وش بیت. آ دویں پیداک اِت اَنت.
مشریپ ءَ داں بازیں بے تواری ءَ پد گوشت
“من شت آں ، وتی ھیال ءَ بدار ساہ.”
“شپی بے وڑ سارت اِنت شپی بہ جل باندا سلامتی برو.” بلاچ ءَ چڑیکہ کت.
سارتی؟ سارتی من ءَ گیش مھکم کنت، من اے باور کنایئنت منی راج بزّگ اِنت، من ءَ سک باز جیڑگ پرماینیت ءُ سارتی ءِ سما نہ بیت داں شپ آسر بیت”
“گڑا تو برو، من ءَ سک سارت کنگ ءَ اِنت، من گڑا روان لوگ ءَ” بلاچ ءَ گوشت.
“شپ وش بات من شت آں گڑا”
شپ آسر بوت بلاچ سھب ءِ سر ءَ 10:00 چہ واب ءَ پاد آتک. چہ واب ءَ پادایگ ءَ گوں شریں شماتے جت ئےِ وتی تیپلیں چک ءَ را ، “کور ءِ من واب آں تو دپے پچ کتگ بس کنگ نہ زان ئے جھندم ئے.”
جن ءَ گُشت” وپتگیں مرد ءِ میش نَر کاریت”
“او تو مزنیں زانتکارے ئے برو آپاں گرم کن من جان شود آں واب ءَ وَ شما نیل اِت گرک اِت.”
ھمے وھد ءَ آئی ءَ وٹسپ چار اِت داں کسے ءَ نبشتہ کتگ اَت، ” مشریپ گُلباگ ءَ بات ئے ارواہ”
آئی وھدے مشریپ ءِ ھونیگیں آکس دیست،” او جن تو کجا گرک ئے، منی پشک ءَ بدے من شت آں اے میتگ وَ تئی برات ءَ وتی وڈ ءَ کتگ نوں نندگی نہ اِنت. من ءَ کلام ءَ جتگ اَت کہ تئی سر ءَ گنوک اِت آں.” آئی ءَ دیگا پشکے گور ءَ کت ءُ چہ میتگ ءَ دیم پہ بال ءَ رپت.
داں زرگل ( بلاچ ءِ جن ءُ مُشریپ ءِ گوْار) ءَ راجدوستیں مشریپ ءِ گمیگیں ھال سر بوت ، گڑا آئی ءِ زند ءَ پدا پروش وارت. “مشریپ بابا تو گوشتگ اَت زند وشی ءِ نام اِنت ءُ منی وشی ھما وھد ءَ بیت کہ منی گلزمین آجو ییت ءُ منی مات ءِ واھشت سرجم بیت ” زرگل ءَ بلاچ ءِ گوشتگیں گپ یادت پیداک اِت اَنت. آ نوں گنوکو گنوکو گپ جنگ ءَ اَت،” لالا تئی مات….. تئی مات ءِ گڈی واھشت اوں ھمے بوتگ …..” زرگل ءَ دیست میر جان( زرگل ءُ بلاچ ءِ چک) اوں گریوگی اَنت، گڑا آئی ءَ وت ءَ تسلی دات کہ میر جان مھکم بات ءُ بلوچے بات.
چوناھا زرگل سرجمیں میتگ ءَ نامدار ءَ کہ دلیریں زالے بلے کس ءَ اے ھبر نہ زانتگ اَت کہ زرگل ءَ مُشریپ ءِ جدائی وار ءُ بزّگ کنت. نوں انچو سما بوھگ ءَ اَت کہ زرگل ءِ زند مُشریپ ءَ اوں وتی ھمراھی ءَ برتگ گون
سمی روچ ءِ بیگاہ اَت گونڈوے تچان ءَ آتک ” زرگل زرگل! بلاچ ءِ جون تپنگی آں دگ ءِ سرا دور داتگ”
” ماندارگ کرزیت” زرگل ءَ درائنت
ھاتر اسلم شاعر ءُ نبشتہ کارے،خضدار گریشاءِ نندوک انت
