کوئٹہ ریڈزون ءَزوربیگواہ کتگیں بلوچانی کَس ءُآزیزانی دھرناءَ29روچ سرجم بوت،ہورءَسریلہ داتگ ءُگدان نشین ایں بیگواہیں بلوچانی تاسُپیں بچ ءُدُتُکیں جَنکانی دلاں پاہارکتگ بلئے نام بلوچیں حاکُم تُکّ ءُنُک اَنت۔ زوربیگواہ کتگیں بلوچانی کَس ءُ آزیزانی گورنرہاؤس ریڈزون ءَ برجاہیں دھرناءَ29قیامتیں شپ روچ کتگ انت ۔زیارت ءَبیگواہیں بلوچانی کُوش ءِحلاف ءَآہانی کَس ءُآزیزاں ریلی کُتگ ءُگورنرہاؤس ءِدیم ءَدھرناداتگ داتگ۔ 29می روچ ءِدھرناءَ5فروری 2015ءَبیگواہ کتگیں کیچ ءِجاہمننداِسراربرکت ءِکَس ءُآزیزاں ہم بہرزُرتگ ۔ اِسراربرکت ءِبانکیں گوہارعاشہ برکت ءَچاگردی رسانک جاہ ءَوتی ویڈوکُلوہ ءَوتی بیگواہیں براتءِبازیاب کنگ ءِلوٹ کتگ۔
زوربیگواہ کتگیں بلوچانی کَس ءُآزیزانی دھرناءَیک ماہے سرجم بوئگی انت بلئے انگت آہانی لوٹ منّگ ءُآہانی پیلوکنگ ءَہچ پیمیں پیش رفتے گندگ نہ بیت۔ زیکیں روچ ءَبیگواہیں بلوچانی کَس ءُآزیزانی دھرناءَاے دگہ سیاسی پارٹی ءُنودربرگلانی جہدکاراں ہمبراہ داری کتگ۔ ہورءَوہدے سریلہ داتگ بیگواہیں بلوچانی کَس ءُآزیزماں گداناں نشتگ انت ءُآہانی کساں سالیں جنکک ءُبچککانی چم آزمان ءُحاکُمانی درءَسک بوتگ انت۔بلئے نام بلوچیں حاکُماں سوگندوارتگ کہ دانکے پراہاں شاتک نہ کننت۔
