منی جُست ءُ پُرس ءِ حق منی راج ءَ انت, سردار اخترجان مینگل

بلوچستان نیشنل پارٹی ءِ بُنجاہی سروک سردار اخترجان مینگل ءَ گشتگ کہ وتی سرکار ءِ وہد ءَ زور بیگواہ کتگیں مردمانی بارو ءَ قانود ءِ حلافیں مردمانی زبان مروچی گُل ءُ گوہر درنزگ ءَ انت ، داں سئے ءَ زال انسانی حقانی وزیر اَت بیدئے ہمئے گپ ءِ گشگ ءِ کہ گاریں مردمانی قانود ءِ کاگد بیگواہ بوتگ دگہ کجام شریں کار ئِے کتگ ، پاکستان تحریک ءِ انصاف ءَ مئے جوڑکتگیں گاریں مردمانی قانود ءِ سیاہگ ءِ پلہ مُرزی نہ کتگ ، نوں پہ سیاسی سیت گرگ ءِ واستہ گاریں مردمانی پلہ مُرز جوڑ بوتگ انت ، امیت انت کہ وہدے آ دوبر انسانی حقانی وزیر گچین کنگ بیت چوش وتی سنگینیں جنک ءِ وڑءَ پہ گاریں مردماں توار ءَ بُرز کنت ، اے گپ سردار اختر جان مینگل ءَ پاکستان تحریک ءِ انصاف ءِ بُنجاہی رہشون ءُ انسانی حقانی وفاقی وزیر شیریں مزاری ءِ گوستگیں روچ ءَ داتگیں بیان ءِ پد ءَ گشتگ انت ،سردار اخترجان مینگل ءَ گشتگ کہ من ءُ محسن داوڑ ءَ گوں تو دزبندی کتگ ات کہ گاریں مردمانی قانود ءَ منارینگ ءَ کمک بکن ات ، بلئے تو آئی ءِ پلہ مُرزی نہ کت ، ماں وزیری تئی دست بستگ بوتگ انت ، منی دست بدوک نہ انت ، مروچی بازینے گشگ ءَ انت کہ سردار اختر مینگل حاموش انت ، اے پہ وتی سیاسی سیتّ ءَ پلینڈی کنگ ءَ انت ، منی جُست ءُ پُرس ءِ حق منی راج ءَ انت ، ما مزن وزیر ءَرا پہ کار کنگ ءَ مُدتے داتگ اگاں آئی ءَ مئے لوٹ سرجم نہ کتاں ما پد تَریں ۔