نبشتہ کار : محب حمید
گِند ئِے ھرچ راج ءَ را پہ زند ءِ گوازینگ ءِ ھاترا یک زُبانے ءُ دودئے است۔ بلوچ ھم یک راجے آئی ءَ را اوں زُبانے است۔_ھرچ زِبان گوں دود ءُ ربیدگاں ھور رودیت ءُ مزن بیت۔ انچوش کہ یک راجے دیم ءَ جنزیت ءُ دپتراں زندگ کنت۔ زبان اوں یک راجے ءِ زندمانیءِ بھرے پمشکہ زبان ءَ را اوں یک راجدپترے است۔ زبان ءِ راجدپتر کم کم ءَ یکجا بیت ءُ لبزانک ءِ رنگ ءَ دیم ءَ کیت ءُ سھرا بیت۔ لبزانک ءَ اُردو ءَ ادب، انگریزی ءَ لٹریچر ، پارسئ ءَ ادبیات، ھِندی ءَ ساھِتیا، اربی ءَ المؤلفات گُشنت۔ لبزانک ءِ مانا ءُ بِزانت زُبان ءَ را چِنّگ ءُ نزّارگ ءُ آئی درپ کنگ ءُ آؤکیں پدریچ ءَ سر کنّگی اِنت۔ ھرچی نبشتہ ئِے دروشم ءَ کاگد ءُ کمپوٹراں بہ بیت آئی لبزانک گشنت۔ شھر، لچّہ، کسمانک، داستان ، کتاب ، ماھتاک، آزمانک ءِ نبشتہ کنگ ءَ لبزانک گُش انت۔ بلے نوکیں زمانگ ءِ لبزانک ءِ بِزانت ءَ ما بِہ چاریں گُڑا آئی بِزانت چو اے وڑ بیتگ ، تامُر بندی، اکس بندی، رسانکدر ءَ نبشتانک چھاپ کنگءَ اوں لبزانک گُش انت ۔
انچُش ما ھُورت چاری بکن اِنت لبزانک ءَ گُڑا لبزانک سکیں کوہنیں زانت ءُ علمے ۔ لبزانک 3000 ھزار سال کُہن انت۔ انچُش کہ چار آزمانی ءُ نیکراہی کِتاب لبزانکی دروشم ءَ پہ بنی آدم ءَ رستگ انت ایشاں چِہ پدّر بیت کہ لبزانک ھما زمانگ ءَ است بیتگ۔ لبزانک ءِ سیت ءُ نپ پہ زبان ءَ سک باز انت لبزانک زبان ءِ بُنیات اِنت۔ لبزانک ءِ سر ءَ کار کنگ ءَ چِہ تئ زبان دیمرئی کنت ءُ گار ءُ بیگواہ بوھگ ءَ رکیت۔ ھرچ راج ئِے زبان ءَ کہ دیمرئی کُتگ گُڑا آیاں الم وتئ لبزانک ءِ سر ءَ کار کُتگ۔
ما بلوچ وتی زبان ءِ رکینگ ءُ آئی ءِ دیم ءَ برگ ءِ ھاتر ءَ وتی زبان ءِ لبزانک ءِ سر ءَ کار بہ کناں۔ ما جُھد بکن ایں کہ کسمانک، کِتاب، آزمانک ءُ تامُر بندی ءِ پِڑاں کار بہ بیت دانکہ مئے نوکیں پدریچ زبان ءَ بزوریت ءُ دیمروئی بکن۔