بہادر شاہ ظفر ، نامہہ ءَ ، ہندوستان ءَ مغلانی آخری بادشاہ ات۔ بابر ءُ اکبر ءِ نماسگ ات۔تَرّات ءُ شعرئِے جت۔ انگریزاں گپت ءُ قید کت۔ بادشاہی بُرت، بلئے پہ آئیءِ چک ءُ نماسگاں ماہانہ زَرّ یا تنخواہ مقرر کت۔ ہندوستان ءِبے حسابیں مال ءُ گنج ءُ حاکمیءِ بدل ءَ پنجا ءُ سد کلدار ءِ وظیفہ پرائی ءَ بس ات۔ ہمیش ات آئی ءِ قدّ۔
بلوچان ءَ ہم ملکے ہست ات ۔ خان ء بلوچ ،آہانی خان ات، حاکم ات۔ اے مردءَ پہ پاکستان ءِ محمد علی جناح ءُ نوکیں حاکمانی سنگتی ءُ ہمراہداریءَ مدام حُدا ءُ رسول ، برے ماں وابءَ ءُ برے ماں آگہیءَ دیست انت۔ اے مردءَ ہم ملکے دات ءُ سالانہ تنخواہ زُرت۔ بلوچانءَ گوں وت ءَ برباد ، رزوا ءُ بے وطن کت۔
قومے ءِ ،راجے ءِ بددعا سگگ نہ بنت۔ یکّے ءِ حق پچ دیگ نہ بنت، قومے ءِ حق چوں پچ دیگ بنت۔ اگن ہورت بچارئے ہرکس ءَ کہ گوں اے بلوچ ءُ پہوالیں قوم ءَ غداری کُتَگ، آ حدا ءَ گپتگ انت، روچ ء رحمانی ۔
خان احمد یار خان ءُ محمد علی جناح یا پاکستان ءِ حاکمانی سنگتی ہُشترءُ روباہ ءِ سنگتی ءِ مثال ات۔ گوٛش انت کہ اشتر ءُ روباہے سک سنگت ات انت۔ نندءُ نیاد اش یک ات، یکجا تَرّ اِت انت۔ یک روچے اشتر ءَ گوں روباہ ءَ گوٛشت کہ مئے دوستی بایدا نت کہ محکم تر بہ بیت ءُ آئیءِ شؤر ایش انت کہ باید انت کہ ما وتی لٹکاں یکجا بہ بندیں تاکہ ہچبر جتامہ بیں ۔ روباہ پمے حبرءَ راضی بوت۔ اشتر جُک اِت ءُ وتی لٹک ئے گوں روباہ ءِ لٹک ءَ مُہر بست۔ دوئیناں نشت ءُ گوں وت گوش ءُ کند کت۔ دمانے ءَ رند اشتر کہ پاد آتک، روباہ ءِ پاد چست بوت انت ءُ روباہ اُشتر ءِ پُشت ءَ لونجان بوت۔ تاں روچ ء مروچی ناں روباہ وتی عقل مندیءِ سرا پہر بندیت ءُ ناں وتی ءُ اشتر ءِ دوستیءِ سرا۔
(چہ شے رگام ءِ کتاب پہ شفاں کوہی چوٹواں عیب انت ءَ زُرتگ کہ بلوچی اکیڈمی کوئٹہ ءَ چھاپ کتگ)
Discover more from Balochistan Affairs
Subscribe to get the latest posts to your email.