آمنہ بلوچ ءَ گشتگ کہ کلفٹن تھانہ ءَ انسپکٹر سجاد ءَ بلوچ جنین آدم زاہ ءُ بد کتگ انت

کراچی پریس کلب ءَ ہوری ءَ پریس کانفرنس کنان ءَ بلوچ یکجہتی کمیٹی ءِ آرگنائزر آمنہ بلوچ ءُ وائس فار بلوچ مسنگ پرسنز ءِ کمک کار گشاد کار سمّی دین محمد بلوچ ءَ گشتگ گوستگیں روچ ءَ ما سندھ اسمبلی ءِ دیم ءَ جمہوری ڈول ءَ وتی گاریں وارثانی واستہ زہرشانی کنگ ءَ اتیں بلئے سندھ ءَ بلوچ مات ، گوہار ءُ ورناہاناں جتگ ءُ پروشتگ ، جنین آدمانی سریگ چگل دیگ بوتاں ، ءُ چوش ناشَرکارں آ پانچلاں گرگ ءُ پولیس ءِ گاڑیانی تہا دور دیگ بوتاں ، ءُ پولیس تھانہ ءَ آہاناں زاہ ءُ زِکت کنگ بوت ، اے کار بلوچی ربیت ءِ حلاف انت ، آہاں گشتگ اے 50 ایں مردم دزگیر کنگ ءُ کلفٹن ءُ اے دگہ تھانہاں بند کنگ ءُ ورناہ لٹ جنگ بوتاں ، آمنہ بلوچ ءَ گشتگ کہ کلفٹن تھانہ ءَ انسپکٹر سجاد ءَ بلوچ جنین آدم زاہ ءُ بد کتگ انت ، آئی ءِ لوٹ کتگ کہ چوشیں رشوت زوریں پولیس کارندہ چہ کار ءَ درکنگ بہ بیت ،
آمنہ بلوچ ءَ گشتگ کہ پولیس کارندہاں بلوچ جنین آدمانی گور ءِ تلاہ ءِ چین ، ایدگہ سہت ءُ زیور ءُ موبائل پُل اتگ انت ، پرے کارءَ آ لجّ بکن انت ، آئی ءَ گوں سندھ سرکار ءَ لوٹ کتگ جنین آدم ءُ جنک زہگانی سہت ءُ زیور ءُ قیمتی ایں شئے دوبر آہاں دیگ بہ بنت ، وائس فار بلوچ مسنگ پرسنز ءِ کمک کار گشاد کار سمّی دین بلوچ ءَ گشتگ تنیگتہ ماں سندھ ءَ مئے بازیں ورناہ ءُ کماش سیکورٹی گَلانی بندیگ جاہاں بند انت ، آئی ءِ گشتگ کہ نوربخش ءِ حبیب گوستگیں روچ ءَ کراچی ءِ دمگ رئیس گوٹھ ءَ بیگواہ کنگ بوتگ ، آ کیچ ءِ نندوکے ، ہمے پیما چہ ملّیر ءَ سعید ءِ محمد عمر آوار جنگ بوتگ آ کھڈان ءِ نندوک انت ، چریشاں ابید کراچی ءَ سنگھور پاڑہ ماری پور ءَ 3 ورناہ علی ءِ بخشی ، اسرار ءِ انور عمر ءُ اصغر ءِ عیسیٰ ادارہ ءِ کارندہاں بیگواہ کتگ انت ۔