پنجگور ءِ نگیگیں جاورانی حلاف ءَ گوادر ءِ باپاریاں ماں پسّنی ءَ زہرشانی کتگ ءُ دھرنا داتگ

پنجگور ءَ دزّی ءُ ڈنگی ءُ بے ایمنی ءِ حلاف ءَ باڈر ٹریڈ یونین گوادر ءَ پسّنی پریس کلب ءِ دیما زہرشانی کیمپ جتگ ءُ دھرناداتگ ، اشی ءَ جتاجتائیں پارٹیانی سروکاں بہرزرتگ ، ءُ باڈر ٹریڈ یونین ءِ پلہ مُرزی کتگ ، یونین ءِ سروک امان جمعہ ءَ گشتانک ءُ گشتگ کہ ماں پنجگور ءَ بے ایمنی ءِ وارداتانی سَوَب ءَ ٹرانسپورٹراں ہوار لس مردم اثر مند انت ، ءُ باپاری مردم لپرزگ انت ، آئی ءَ گشتگ کہ سی پیک شاہ دگ ءَ ہوار پنجگور ءُ آئی ءِ آتراپ ءِ دمگاں سلاہ بندیں مردماں کیچّ ءُ تُوتّ ئِے پِر نیست ، ءُ انتظامیہ بیوس انت ، ہمک روچ پنجگور ءَ دُزّی ءُ ڈُنگی بیت ، مکران ءَ گوں کوئٹہ ہم گرنچ کنوکیں ایم 8 شاہ دگ ءَ بار جنوکیں گاڑی آوار جنگ بنت ءُ اشانی پُلگ ءِ واردات گیش بوتگ انت ، بارڈر ٹریڈ یونین ءِ جیڑہانی گشاد کنگ ءَ ہمے وہداں اسسٹنٹ کمشنر پسّنی محمدجان بلوچ دھرنا ءَ سربوتگ ءُ زہرشانی کنیں مردماناں جیڑہانی گشاد کنگ ءَ زبان داتگ ئِے ، چِد ءُ پد باڈر ٹریڈ یونین گوادر ءَ ریلی کتگ ءُ ریلی پسّنی پریس کلب ءَ بندات بوتگ ءُ شَہر ءِ جتاجتائیں دگاں تَرّان ءَ غریب آباد ءَ جلسہ کنگ بوتگ ، ریلی ءَ یونین ءِ سروک امان جمعہ ، انجمن تاجران ءِ مزن کارگشاد لالامراد جان ءُ باڈر یونین ءِ گشادکار جمیل احمد ءَ گشتانک داتگ ءُ گشتگ ماں پنجگور ءَ مردم ڈنگیانی ءُ کُشت ءُ کُوش ءِ سَوَب ءَ دماغی نادُراہ جوڑ بوتگ انت ، بازیں ہَندے پہ لس مہلوک ءِ رَوَگ ءَ پابندی جتگ اِش ، سلاہ بندیں مردم قیمتی ایں گاڑیاں جمّاز انت وتی سلاہانی شاندازی ءَ پہ آزاتی کن انت جُست ءُ پُرس اِش پر نیست ، بلئے لس مردم کارچے ہم زرت نہ کنت ، آہاں گشتگ کہ ہمے زوتاں ٹیل کشوکیں ٹینکرے آوار جتگ ءُ لکھانی ٹیل گوں ایمنی ءَ پُل اتگ انت ، مردم بہمانگ بیت کہ ہمے نزیکاں فورس ءَ چیک پوسٹ موجود انتت ، آہاں گشتگ کہ اگاں دمگ ءِ ایمنی ءِ برجاہ دارگ ءَ سکّیں گامگیج زورگ نہ بوت ، بلوچستان ءِ کُلیں یونین ، سیاسی پارٹی ءُ گوں باپاری مردماں ہور بیں ءُ وتی آؤکیں کار رہبند ءِ جار ءَ جنیں ءُ زہرشانی ءِ شہار ءَ مستر کنیں ۔