مزنیں روت ءِ کینسر ءِ بابت ءَ سرپدی

وپا بلوچ

انچوشکہ شما سرپد ات بلوچستان ءُ بلخصوص مکران ءَ کینسر ءِ نادراہی ءَ یک وبا ءِ شکل یے اختیار کتگ ءُ اوست میڈیکل ٹیم انچارج ءِ اعداد ءُ شمار ءِ مطابق ءَ اے وھد ءَ سرجمیں بلوچستان ءَ کساس 2500 ءَ چہ گیش کینسر ءِ نادراہ ھست انت ءُ اشانی توکا بازیں بیران بوتگ۔کینسر ءِ گِر ءُ دار ءُ لس مھلوک ءِ علاج ءُ کمک ءِ واستہ اوست ویلفیئر آرگنائزیشن ءَ 3 سال بیت جدوجہد بندات کتگ، چہ بلوچ راج ءِ کمک ءُ مدد ءَ بازیں نادراہ علاج کتگ ءُ انگت کنگ ءَ انت۔

کینسر ءَ چہ مارا بازیں نوجوان کسانیں زھگ ءُ بہ بہائیں ھستی چہ مارا جتا کتگ ما جھد کن ایں وتی مھلوک ءِ سرپدی ءُ گر ءُ دار ءُ سر سوج ءَ بکن ایں۔

سرجمیں دنیا ءَ مارچ ءِ ماہ کولن کینسر بزاں مزنیں روت ءِ کینسر بابت ءَ یات کنگ بیت کہ ایشی ءِ مول ءُ مراد کولن کینسر ءِ بابت ءَ مردماں سرپدی دئیگ بیت بلے بد بہتی ءَ مئے کرا مارچ ءِ ماہ گوں ڈھول ءُ ناچاں گوازیت ءُ مارا پورا مزنیں روت ءِ جند مانیست کہ مارا ھچ پکر پر نیست۔

بلکیں مارا مزنیں روت مان ءُ مئے مزنیں روت ءَ کینسر ھم ھست بلے بس مارا سُد نیست۔

مزنیں روت ءِ کینسر دنیا ءِ توکا بریسٹ کینسر ءَ چہ پد مستریں کینسر انت ہر سال لکّانی کساس ءَ مردمانی مرگ ءِ سوب جوڑ بیت۔اے کینسر ھرچ بیست مردم ءِ توکا یکے ءَ گیپت۔ بازیں وجوہات ھست انت کہ اشانی سؤب ءَ کینسر ءِ ھترہ گیشتر بیت۔ اشانی توکا زنڈی ، مُرگی گوشت ، سگریٹ کشّگ ، وردش نہ کنگ ھونی پیچس ءُ دگہ۔

روت ءِ کینسر ءِ اے نشانی بوت کن انت

مزنیں پیشاپ ءَ ھون آئیگ یا کہ سیاہیں یشاب ءِ آئیگ۔
پیشاب ءِ شکل اناگہی مٹ بوھگ۔
-لاپ ءِ درد ءُ اناگہی قبض بوھگ۔
-ھون ءِ توکا ہیموگلوبن ءِ کم بوھگ۔
-وزن ءِ کم بوھگ۔

*بلے یات بدار – اے نشانی وھدیکے زاہر بنت 25%فیصد کیسز ءِ توکا اے کینسر پورائیں جسم ءَ شنگ بوتگ ءُ ایشی ءِ علاج ممکن نہ بیت۔ ایشی ءِ متلب ایش انت اے علاماتاں چہ پیسر اے کینسر ءِ گِر ءُ دار الّمی انت۔

*جست ایش انت کہ اے نشانیاں گندگ ءَ پد علاج بوت کنت ؟

*گڑا مئے پسو ایش بیت کہ الّم بوت کنت۔

ھرچ ھما انسان کہ آئی ءِ عُمر 50سال سرجم بیت آئی ءَ وتی “کولونوسکوپی کنگی انت۔ کولونوسکوپی تہنا یکیں طریقہ انت کہ کینسر ءِ نادراہی ءِ آماچی ءَ پیسر تو آئی ءَ پیسر ءَ گپت کت ءُ علاج کت کنے۔ اشی ءِ سوب ایش انت کہ کینسر درستاں پیسر مزنیں روت ءِ توکا کسانیں دانگ ءَ چہ بندات بیت کہ اشاں “پولیپ” گش انت۔ انسان ءِ مزنیں روت پنجاہ سال ءِ اُمر ءَ چہ پد “پولیپ” بندیت۔ اے پولیپ کینسر نہ انت بلے 4ءُ 5 پنچ سال ءَ پد کینسر جوڑ بیت۔اگاں پنجاہ سال ءِ عمر ءَ کولونوسکوپی ءِ کنگ ءُ در کنگ بہ بنت گڑا کینسر ءَداشت کت کنت۔امریکا ءِ توکا ھرچ مردم ءِ عمر پنجاہ سال ءَ سرجم بیت آئی ءِ واستہ کولونوسکوپی انشورنس الّمی کنگ بوتگ ءُ ھمیشی ءِ سؤب ءَ سک باز کم مردم اے کینسر ءِ سؤب ءَ بیران بوھگ ءَ انت۔

کولونوسکوپی یک ٹیسٹ یے کہ گوں کیمرہ ءِ گوما بیست منٹ ءَ کنگ بیت انجکشن یے جنْت کمے اوبینگ کنت ءُ ایشی ءَ مزنیں روت ءِ توکا را دنت، چاریت. اگاں پولیپ ھست انت گڑا ھمے کیمرہ ءِ گوما کش ایت ءِ، ءُ مریز گھنٹہ ءِ توکا وتی گِس ءَ بیت، اے آپریشن یے نہ انت۔ اے ٹیسٹ اسکریننگ گشگ بیت کہ کینسر ءَ چہ پیسر گر ءُ دار ، ءُ تپّاسگ بیت۔

ھمے ھساب ءَ کہ تو وتی گاڑی ءُ بائیک ءَ چیک کنے آئل ءُ تیل آں بدلی کنے ھمے دروشم ءَ انسان ءِ جسم ءَ اے وڑیں ٹیسٹانی زرورت ھست انت۔

نبشتہ کار اوست ویلفئیر آرگنائیزیشن ءِ وائس پریزیڈنٹ انت