سندھ اسمبلی ءِ دیم ءَ بلوچ جنین آدمانی لٹّءُ کُٹّ کنگ قبائلی ربیّت ءِ حلاف انت, بی این پی

بلوچستان نیشنل پارٹی ءِ بُنجاہی بیان ءَ کراچی ءَ بیگواہیں بلوچانی کَس ءُ آزیزانی سرءَ ایمنیں زہرشانی ءِ وہد ءَ سندھ حکومت ءِ جَناوریں کِرد ءُ لٹّ ءُ کُٹ ءُ بلوچ دودانی لگتمالی ، جنین آدم ءُ کسانیں زہگانی شرفداری ءِ ڈلگ چار کنگ ایرجتگ ، ءُ گشتگ فورسز ءُ انتظامیہ ءِ اے کرد ڈوبارگ کرز انت ، بیان ءَ گشگ بوتگ کہ گاریں مردمانی جیڑہ بلوچستان ءِ جیڑہ ءِ مستریں تَک ءُ پہنات انت ، چریشی ءَ بلوچستان ءَ جیڑہ مستر بوہان انت ، مزنیں کساسے ءَ گاریں مردمانی کَس ءُ آزیز وتی توار ءَ بُرز کنگ ءَ انت ، پارٹی ءِ لیکہ انت کہ بلوچ ءِ جیڑہ ءُ بلوچستان ءِ جیڑہ گوں گپ ءُ تران ءَ گشاد بوت کن انت ، پارٹی ءَ مدام راجی سیتّ ءَ را ارزشت داتگ ، بیان ءَ گشگ بوتگ کہ ہرکس ءَ موکل انت کہ پہ وتی حق ءُ گاریں مردمانی بازیابی ءِ واستہ آواز چست بکنت ، پارٹی ءَ پیسر ءَ ہم جتاجتائیں جاہاں گاریں مردمانی بازیابی ءِ واستہ ءُ بلوچستان ءِ جاورانی گہتری ءَ جہدءُ جفا کتگ ، پارٹی انگت ہمے لیکہ ءِ منوک انت کہ گاریں مردمانی جیڑہ ءَ ہوار ، بلوچستان ءِ کُلیں جیڑہ سیاست ءِ بنپداں گشاد کنگ بہ بنت ، چدءُ پیش ہم زوراکی کنگ بوتگ ءُ انوں ہم زوراکی برجاہ انت اے جیڑہ ءِ راستیں گیش ءُ گیواری نہ انت ، گاریں مردمانی جیڑہ ءِ گشاد کنگ ءَ پارٹی وتی سیاسی ءُ جمہوری کردءَ پیلو کنت ، پارٹی ءِ سروک سردار اخترجان مینگل گاریں مردمانی جیڑہ ءَ ہوار آدگہ جیڑہانی گشاد کنگ ءَ پاداریں دروشمے ءَ جہد کنگ ءَ انت ، سپریم کورٹ بہ بیت کہ پارلیمنٹ یاکہ کِشک ءُ راہ سر مدام پہ گاریں مردماں جہد کتگ ءُ اے جہد مدام مانیت ، بیان ءَ لوٹ کنگ بوتگ کہ کلّیں گاریں مردم دَرا کنگ بہ بنت ۔ اے رِد ءَ نیشنل پارٹی ءِ بُنجاہی سروک ڈاکٹر عبدالمالک بلوچ ، بی این پی ثنابلوچ ءُ میرعبدالرشید مینگل ءَ وتی وتی بیان ءَ اے واقعہ ایرجتگ ۔ بلوچ نیشنل موومنٹ رہشون دلمراد بلوچ ءَ اے واقعہ ایرجتگ ءُ گشتگ پاکستان بلوچانی حلاف ءَ زوراکیں پالیسی کارمرز کنت ءُ ایشی ءِ ہمک پالیسی روچ پہ روچ ترند تر بوئان اَنت ۔