دمگی ءُ میاں استمانی حال

1:
ایران ءَ وردءُورگی شئے آنی نہادانی گیشی ءِ سَوَب ءَ حکومت ءِ حلاف ءَ تہران ءَ ہوار شش صوبہان زہرشانی کنگ بوتگ ۔ میاں استمانی رسانک جاہ ءِ رِدءَ ہمے ماہ ءِ بندات ءَ ایران کارمستر ابراہیم رئیسی ءَ چیزانی سر ءَ رعایت ہلاس کتگ چریشی ءَ آرت ، روغن ءُ شیر ءُ ایدگہ وردءُورگی شئے آنی نہاد گیش بوتگ انت۔

2:
امریکہ ءِ صدر جو بائیڈن گوریچانی کوریا ءِ جوہری سِلاہانی آزمودگ ، یوکرین جنگءِ رِد ءَ ایشیائی ملکانی سئے روچ ءِ تَرّ ءُ گَردءَ زرباری کوریاءَ سربوتگ ۔ چدءُ پد امریکہ کارمستر جاپان ءَ روت ۔ حالانی رِد ءَ جوبائیڈن وتی گچین بوئگ ءَ پد اولی تَرّ ءُ گرد ءَ ایشیائی ملکاں رؤگ ءَ انت ۔ ءُ اشی ءِ بندات چہ زرباری کوریاءَ کنگ بوتگ ۔ جاپان ءَ جوبائیڈن ٹوکیو ءَ بوہوکیں انڈوپیسیفک اکنامک فریم ورک ءِ بنداتی مراگش ءَ بہرزوریت اےفریم ءَ امریکہ۔ ہندوستان ۔ آسٹریلیا ءُ جاپان ہوار انت

3:
روس ءَ سئے ماہ ءِ جنگ ءَ پد یوکرین ءِ اہمیں بندنی شہر ماریوپول قبضہ کتگ ۔ درملکی حالانی رِدءَ ماسکوءِ حاکمانی گشگ انت ماریوپول شہرءِ ازووسٹل اسٹیل پلانٹ ءِ دیمپانیں یوکرینی سِپاہ ءَ سِلاہ دور داتگ انت ۔

4:
چین ءَ مزنیں تلاوگے ءِ چیر ءَ قدیمیں جنگلے درگیجگ بوتگ ۔ اے کوہنیں جنگل ءَ چِل میٹر بُرزیں درچک مان ۔ سائندانانی گشگ انت اے جنگل ءَ درگیجگ نبوتگیں درچک ءُ ساہدار موجود بوت کن انت

5:
اقوام متحدہ ءِ گَل ءِ انسانی حقانی کمشنر میشیل بیچلیٹ دوشمبےءِ روچ ءَ سنکیانگ ءَ تَرّءُگَرد ءَ کنت ۔چین ءَ ہبدہ سال ءَ پد میاں استمانی گَلے ءِ جاہ گیرے سنکیانگ ءِ تَرّ ءُ گَرد ءِ اجازت داتگ ۔بیجنگءِ سرءَ بہتام انت کہ ایغور مسلمانانی انسانی حقانی پادمالی کنگءَ انت