1 : انٹربینک نہادیگ ءَ ڈالر تاریخ ءَ اولی رَند ءَ 205 ءَ سربوتگ ۔
انٹربینک نہادیگ ءَ ڈالر ءِ ترندرواجی برجاہ انت ۔ سئے شمبئے ءِ روچ ءَ ڈالرءِ نہاد انٹربینک ءَ یک کلدارے ءُ 64 پیسہ ءَ گیش بوتگ ءُ ڈالر 205 کلدار ءُ 50پیسہ ءَ سر بوتگ ۔ روچ ءِ گڈ سر ءَ انٹربینک ءَ ڈالرءِ نہاد 1 کلدارے ءُ 30 پیسہ گیش بوتگ ءُ ڈالر 205 کلدار پوائنٹ 16 ءَ سربوتگ ۔ ءُ پچیں نہادیگ ءَ ڈالر اولی رند انت 206 کلدار ءَ سرگوستگ ۔
2 : اسرائیل ءِ وزیرخارجہ یائر لیپڈ ءَ اسرائیلیاناں زوت چہ تُرکی ءَ درکپگ ءُ رَوگ ءِ صلاھ داتگ ۔ آئی ء گشتگ ایرانی ماں استنبول ءَ اسرائیل ءِ جاہ مننداں جَنَگ ءِ سَوَڑگ کنگ ءَ انت ۔ اسرائیل ءِ وزیرخارجہ یائر لیپڈ ءَ اے تچکیں ءُ مُہریں کڈّن ہماوہدی کتگ وہدے یکے دومی ءِ بدواہ ایران ءُ اسرائیل ءِ میان ءَ جاور سک نگیگ انت ۔ تہران ءَ وتی جوہری تنصیبات ءُ فوجی مڈیانی سرءَ پدماں پدیں اُرُش ءِ ڈوبہ اسرائیل ءَ جتگ بگندئے شام ءَ بوتگیں اُرشانی سَوب اسرائیل لیک اِتگ ۔
یائر لیپڈ ءَ ایران ءَ بوتگیں ہچ اُرش ءِ بارو ءَ گپ نہ جتگ ، بلئے آئی ءَ گشتگ کہ تُرکی ءَ چہ ایرانی چاریگاں حقیں نقص ءِ شبین است ، آئی ءَ ماں تُرکی ءَ موکلاں نشتگیں اسرائیل ءِ جاہ منندانی حلاف ءَ چہ ایران ءِ نیمگ ءَ بوئوکیں ناشِری ءُ اُرشانی نام گپتگ ۔
3 : اقوام متحدہ ءِ میاں استمانی وراک ءِ پروگرام ءَ سئے شمبئے ءِ روچ ءَ قحط آماچیں ملک زرباری سوڈان ءِ واستہ 426 ملین ڈالر ءِ کمک ءِ دزبندی کتگ ۔
افریقہ ءِ اے ملک ءَ پدماں پد ءَ کُشت ءُ کوش ءُ ہار ءُ ایروپانی سَوَب ءَ لکھانی حساب ءَ مردم بے وردن انت ۔ ورلڈ فوڈ پروگرام ءِ رِد ءَ زرباری سوڈان ءَ زوتاں وراک سرکنگ المی انت ۔ داں کہ قحط ءِ اثرمندی کم کنگ ءُ مردم چہ گژنگی ءَ رکّینگ بہ بنت ، ادارہ ءَ اے ہم گشتگ کہ زرّءِ کمک ءِ نہ رسگ ءِ سَوَب ءَ زرباری سوڈان ءَ کمک کنگ ءِ وردنی شئے آنی سرکنگ ءِ کار کسانیں مدتے ءَ مہتل دارگ کپیت ، چریشی ءِ سوب ءَ یک لکھ ءُ ہفتاد ہزار مردم شدلاپی ءِ آماچ بوت کن انت ۔
