بی ایس او ءَ گشتگ بلوچستان ءَ وڑوڑیں سیاسی ءُ درسیاسی پارٹی جوڑ کنگ بوئگ ءَ انت

بلوچ اسٹوڈنٹس آرگنائیزیشن ءَ تربت پریس کلب ءَ پریس کانفرنس کتگ ، پریس کانفرنس ءَ بی ایس او ءِ بُنجاہی کمیٹی ءِ باسک کریم شمبئے ءَ گشتگ بلوچ راج دوستی ءِ حلاف ءَ ، استان ءِ واہشت ءِ رِد ءَ یک کارستے سازگ ءِ بے سوبیں جہدے کنگ بوئگ ءَ انت ، بلوچ نودربر ءُ حاص جنکیں نودربراں چہ وانگ ءُ زانگ ءَ دُور دارگ ءَ اِستان وتی سریچک ءَ کارمرز کنگ ءُ سِلّیں مقصدءَ پیلو کنگ لوٹیت ۔ مردم نوں شر زان انت کہ بلوچستان ءَ سیاسی ءُ وانگ ءُ زانگی بحرانے ءِ دیمپان انت ، اگاں چمشانک دیگ بہ بیت بلوچستان ءَ وانگ ءُ زانگی جاور سک ناامیت کنت ، پریس کانفرنس ءَ گشگ بوتگ کہ بلوچ راج دوستی ءِ لیکہ ءِ سیاسی ادارہاں لنگ ءُ مُنڈ کنگ ءَ ماں بلوچستان ءَ وڑوڑیں سیاسی ءُ درسیاسی پارٹی جوڑ کنگ بوئگ ءَ انت ، دومی نیمگ ءَ راج دوستی ءِ حلافیں وفاقی پارٹیاں ماں بلوچستان ءَ جاہ دیگ ءَ راہ ءُ در گیشینگ بوئگ ءَ انت ، بلوچستان ءِ نوکیں راج دوستی ءِ سیاست چہ بُندر ءَ راج دوست ءُ دیم روی دوست بوتگ ، بلوچستان ءِ حقیں راج دوستیں پارٹی راجی حقانی واستہ جہد کنان ءُ پیداک انت ، بلئے ہمے سیاست ءَ نوکیں مردم آرگ بوئگ ءَ داں کہ حقیں بلوچ راج دوستانی راہ ءُ در گَٹّ کنگ بہ بنت ۔ پریس کانفرنس ءَ جستے ءِ جواب ءَ گشگ بوتگ کہ حق دو تحریک ءِ ملاہدایت ءَ جنکیں بلوچ نودربرانی حلاف ءَ سبکیں گپ جتگ ءُ پد ءَ پہلی لوٹ اتگ بلئے گشتگ کہ منی پیسری گپ ہم راست ، بزاں ملاہدایت وتی پیسری گپ ءِ منوک انت ، اے پیمیں کرد ءَ ما چون بچاریں ۔ اے پریس کانفرنس ءَ بی ایس او ءِ دگہ باسک ہم ساڑی بوتگ انت ۔