آزمانکے چماں کپت ، پگر جت ءُ تکانسر بیتاں ہردیں پشدرسئیل کُت تہ جاور چٹ یک دگرءَ گوں سیالی نہ کننت۔
اینکدر ابسٹرکٹ چیا بوتگ اِت۔؟
آیا شما سادہ ءُ پُر پیچ بیانیہ ءِ امکانات درجت ءُ ھلاس کُت اَنت؟ ھمے رنگءَ سماجی حقیقت نگاری ءُ حقیقت نگاری ءِ اون امکانات درجتگ و ھلاس کُت اَنت۔؟ کہ نوں ابسٹرکشنءَ آتک و سر بوت اِت۔؟
بلے بیا کہ اے میانءَ مزنیں پندے بُرگی اَت ءُ گواچنی درگتءَ نظری و عملی کار ھژدری بیتگ ات ءُ ھمے درچءَ ساچشتی دروشمءَ اون یک نوکیں دابءُ مارشت ئَے گوں فکری مانزمان، سساساچی ءَ نگدی تناظرے ودی کنگی اَت۔
چوش کہ اے زانشتی، لبزانکی و دودمانی کار گوں سنگینی ءَ کنگ ھژدری ات دانکہ ھما جہتءَ کہ مروچی نبشتہ کنگءَ اِت۔ایشیءِ بابتءَ جوانیں پگری دروشمے سھرا بہ بیت۔
من سنگتےءَ را گوشت کہ چوکن یک سادہ بیانیہ آزمانک ے نبشتہ بہ کن۔
گڑا مرد سک تکانسر بیت کہ نوں چی ءُ چون بہ کنت۔
گوشتی، گوں من نہ بیت۔البت تجریدی آزمانک ے بگوش، الم نبشتہ ے کناں۔
اے بلوچی زبان ءِ کسہ ءِ جاور اِنت۔آ سنگت سادہ بیانیہ ے نبشتہ کُت نہ کنت بلے علامتی ، تجریدی ءُ ایدگہ مانگیش اِتگیں زبانءَ گوں بندوکیں یک آزمانک ے نبشتہ کنگ ءَ مدام ساڑی اِنت۔
عجب ایں دودے ،مرے زمانگ ءَ رواج گپتگ، اگں تو بگوشے کہ اے آزمانک، یار!
سمجھ ءَ نہ اِت یا ایشی ءِ سرپد بوگ گوں من گران اِنت ءُ سرپد بوت نہ کناں۔تہ درائنت ءُ گوشتی کہ اے آزمانک تئی واسطہ نہ اِنت۔ھمے دابءَ مرے زمانگءَ بلوچی یے تامر اوں ھمے جیڑہءَ گوں دُچار اَنت۔ءُ کسے سوال بہ کنت گڑا دومی نیمگءَ گوشگ بیت کہ توے سرپد نہ بئے۔
اگاں بچاراِت اے وتی واسطہ اوں نہ اِنت کہ جند اوں بمے چاگردءِ بھرے بلے چاگردءِ جیڑھانی تشخیص کنگ ءُ گھتریءِ تجزیہ کنگءَ سک ءَ بے کمار اِنت۔پرے ھاترا نبشتہ ے کنگءَ اِنت دانکہ پیش بدارایت کہ مناں بچار، من چون ساھگءَ زبان دیگءَ یاں ءُ ساھگ ءَ اسیلیں مردم ے اوں نہ مانیت۔ایوک و چٹ ساھگ ے، گڑا بزانکہ بلوچی لبزانک ءَ نوں ایوک ساھگ انت ءَ آدم زاد نیست۔
نوں ھمے میانءِ کارکہ کنگی ات کئے کنت اِش۔؟
چوشکہ بیانیہ درجنگ نہ بیت و نیکہ امکانات درجنگ بیت اَنت۔ءُ ھمے ڈَول حقیقت نگاری ءُ سماجی حقیقت نگاری اون سرجمءَ درجنگ نہ بوت ءُ نیکہ امکانات درجنگ بوت اَنت۔کہ اے جاہءَ سربیگی اَت۔
ہردیں بلوچ چاگردءَ سئیل کن اِت ءُ چاراِت تہ اے چو وتی لوکیل ءِ کارست ھاں گوں اسٹل آرٹ ئے چارگ ءَ جنت ءُ اسٹل آرٹ ئیگءَ اوشتاتگ ءُ اے لبز و استعارہ بدلی کنگ ءَ چہ اندرءَ ساجو نہ اِنت۔ءُ نیکہ ساچشتکار اے درگتءَ جہد کنگءِ تب و مئیل ے دارایت۔
نوں اے شرعءَ کئے بہ جنت ءُ اے کارءَ کئے بہ کنت۔؟ چوکہ ندکار و ساچشتکار وَ تجرید آماچ بوت ءُ لس مھلوک وتی ھیداں گرفتار اِنت۔
البت اے درگتءَ من نامیگیں گدار نویس و لبزانت واجہ منیر احمد بادینی جُست کُتگ ات کہ اے میانءَ نہ بوتگیں کار کہ پشت کپتگ اَنت ایشاں کئے بِرج بہ کنت۔؟ انکس ایں گیپ ے کہ میان ءَ است ۔ایشیءَ را کئے دُرست کنت۔ یا وَ شما وت کارءَ بہ کن اِت۔؟
گڑا واجہ ءَ درائنت کہ اے گوں من نہ بیت۔بلے ایشیءِ اے دابءَ بوگ اوں جوانی یے نہ اِنت۔من ہردیں میان اُستمانی ردا چاراں و پگر کناں گڑا اودءَ یک دگرئےءِ ایکسٹنشنءِ دروشمءَ گندگ کاینت۔چے ڈول رد کنگ بیت و چے پیم منگ کپ ایت ءُ اے درگتءَ سساساچ ءِ پگرءِ تچک و سھرا بوگ المی انت کہ چوں وتی ساچشتی سپرءَ سوج کنت ءُ سوال ودی کنت۔
مئے گورا جاور یکسر جتا انت ءُ چاگردی جاور ھچ رنگءَ یک دگرءِ توثیق ءَ نہ کنت۔
چیاکہ قولے حسن عسکری ئیگ ءَ اول مارا چاگردی نگدءَ را مھکم کنگ کپ ایت ۔ءُ پدا لبزانکی نگد ءِ زانشتی ربیت ءَ را سھرا کنگی انت چوشکہ مئے گورا وَ دنیگہ جاور پہ لبزانکی نگدءَ دلدوست ایں نیاں، پرے ھاترا اے کار ءِ کنگءَ تچک ءَ ھژدری بیت چوش کہ اے گپ واجہ عسکری ءَ ہندوستان ءِ تقسیمءَ چار و پنچ سال پیش جتگ ات۔
نبشتانک ءِ گونڈ گیرگ ھاترا گوں پکاسوے اے درورءَ ایشیءَ را ھلاس کناں۔اگاں یک ازم کارے وتی ازمی کتہ کاری ءَ حقیقت نگاری یاحقیقت پسندیءَ گوں یک اسیلیں اسپ ے جوڑ کُت مہ کنت گڑا آ ھجبر تجریدی آڑت جوڑ کُت نہ کنت۔
پمیشکہ اے گپ ھژدری بیت کہ پیسرا سادہ بیانیہ و حقیقت نگاری ءِ امکانات ھاں سرجم ءَ دربجنت ءُ نی دیم پہ علامت ءُ تجریدءَ بُرو۔چیاکہ اے یک دِگرءِ ارجءِ نسبت وتءَ دروشم کننت۔
اے دوئیں دانک بلوچی آزمانک ءِ نظری، ساچشتی ءُ علمی و عملی جہت ءَ گوں بندوک اِت اَنت۔چوشکہ ھالترانی ءِ درگتءَ الم دلگوش کنگ کپ ایت تہ ما وتی کسہی لبزانکءِ جیڑہءِ گیشواری ءَ پہ جوانیں رنگےءَ ذہن سازی ءُ روایت و درایت ءِ درچءَ پگری دروشم ے ودی کت بہ کنیں۔
دلگوش: اے نبشتانک ءِ تہا درائیں حیال ءُ مارشت نبشتہ کار ءِ جند ئیگ انت۔
بلوچستان افیئرزءِ ادارہ ءِ ایشاں گوں تپاک بوھگ المی نہ انت۔
