زوربیگواہ کتگیں بلوچانی کَس ءُآزیزاں گورنرہاؤس ءِدیم ءَریڈزون ءَ28روچ بیت دھرناداتگ۔28می روچ ءِ سرجم بوئگ ءَچہ مُنّوجان چارراہ ءَداں گورنرہاؤس ءَ ریلی کنگ بوتگ۔
زیارت واقعہ ءِ حلاف ءَگورنرہاؤس ریڈزون ءَ بیگواہیں بلوچانی کَس ءُآزیزاں 28روچ بیت کہ دھرناداتگ ءُنشتگ انت۔
بیگواہیں بلوچانی کَس ءُآزیزاں چہ مُنّوجان چارراہ کِلّی ہُدّہ ءَداں گورنرہاؤس ءَریلی کُتگ۔ ریلی ءَ بیگواہیں بلوچانی کَس ءُآزیز، اے دگہ سیاسی ءُنودربرگَلانی رہشون ءُجہدکاراں بہرزُرتگ۔ ریلی ءَ بیگواہیں بلوچانی کَس ءُآزیزءُسیاسی ءُنودربرگَلانی رہشوناں گُشتانک داتگ ءُگُشتگ کہ بیگواہ کتگیں مردم ظاہرکنگ بہ بنت۔
آہانی ایوک ءَہمے یکیں لوٹ انت کہ آہانی دردءُدورمارگ بہ بنت ءُآہانی واہ ءُزاری گوش دارگ بہ بیت ءُآچہ بازیں دوریں دمگاں گوں ہمے اوست ءَپیداگ انت کہ آہانی پِریات گوشدارگ بیت ءُگاریں مردم ظاہرکنگ بنت۔ وائس فاربلوچ مسنگ پرسنزءِ لَس گشادکارسمّی دین بلوچ ءَ گُشتگ کہ مروچی ایں روتاکے ءِ یک جارے ءَمارءَسہیگ کتگ کہ صوبہ ءِ حکومت ءَ بیگواہ کتگیں بلوچانی باروءَ صوبہ ءِوزیرءداخلہ ءِسروکی ءَیک پارلیمانی کمیشنے ءِجوڑکنگ ءِجارپِرّینتگ۔ بلئے اے باروءَمارءَ،مئے گَل ءَ ءُبیگواہ کتگیں بلوچانی کَس ءُآزیزاں گوں ہچ پیمیں حال ءُاحوال کنگ نبوتگ۔ ءُنئے کہ مئے دیم داتگیں لوٹ ءُبیگواہ کتگیں بلوچانی لَڑءِباروءَگامگیج ءُپیش رفت ءَمارءَسہیگ کنگ بوتگ۔
ماہمے سرپدبیں کہ حکومت اے باروءَپہ دل ءُسِتک گامگیج زورگ ءَنہ انت۔ گورنرہاؤس ءِدیم ءَمئے دھرناءَماہے سرجم بوئگی انت بلئے حکومت مئے لوٹانی گوشدارگ ءُآہانی باروءَگامگیج زورگ ءَپدءُپیش کنگ ءَانت۔ سمّی دین بلوچ ءَگشتگ اگاں صوبہ ءِحکومت ءُحاکُم ہمے پیم ءَ مان میاتکی ءَبرجاہ داراَنت ءُمئے لوٹاں گوش نہ داراَنت ءُآہانی پیلوکنگ ءَگامگیج نہ زوراَنت ۔مادیمترءَترندی کنیں، ماحکومت ءَبازموہ داتگ ءُاوپارکتگ۔
Discover more from Balochistan Affairs
Subscribe to get the latest posts to your email.